Elşən Bağırzadə: “Layihə Naxçıvanın hazırkı iqtisadi təcridini gələcəkdə ciddi şəkildə aradan qaldırmağa xidmət edir”
Qars-İqdır-Aralıq-Dilucu dəmir yolu xətti tikintisinin Naxçıvan Muxtar Respublikası istiqamətində davam etdirilməsi işlərinə 2018-ci ilin sonu - 2019-cu ilin əvvəlində start veriləcək. Yayılan məlumata görə, bu barədə yerli jurnalistlərə açıqlamasında Türkiyənin nəqliyyat, gəmiçilik və kommunikasiyalar naziri Əhməd Arslan məlumat verib.
Yeni nəqliyyat layihəsinə əsasən, tikintisi nəzərdə tutulan iki yoldan ibarət dəmir yolu xəttinin uzunluğu 224 kilometr olacaq. Nazirin sözlərinə görə, bu xətt Bakı-Tiflis-Qars dəmir yolu ilə birləşdiriləndən sonra Şərqdən Qərbə tərəf bütün Türkiyə ərazisindən keçən Qars-Kapıkule xəttinə, daha sonra Avropaya doğru uzanacaq.
Beləliklə, Kapıkule-Ədirnə-İstanbul-Eskişehir-Ankara-Yozqat- Sivas-Ərzincan-Qars dəmir yolu İqdır əyalətindən keçməklə Azərbaycan və İran dəmir yollarına birləşdiriləcək. Yeni dəmir yolu xətti çəkilərkən sürəti saatda 160 kilometrədək olan qatarlardan istifadə etmək imkanı nəzərə alınacaq.
Şübhəsiz ki, sözügedən layihənin reallaşması Naxçıvan MR-in blokadadan çıxmasında mühüm rol oynayacaq. Ona görə ki, dəmir yolu sərnişin və yükdaşımalarda əhəmiyyətli rol oynayır. Bir sıra məhsulların Naxçıvana daşınması üçün əlverişli şərait yaranacaq. Eyni zamanda, Naxçıvanda istehsal olunan məhsulların ixracı üçün əlverişli şərait yaranacaq. Başqa bir tərəfdən, Naxçıvanın tranzit əhəmiyyəti artacaq.
Ümumilikdə, ekspertlərin bundan gözləntiləri nədir? Sözügedən məsələni dəyərləndirən ekspert Elşən Bağırzadənin fikrincə, bu, Naxçıvanın blokadadan çıxmasına müsbət təsir göstərəcək: “Ermənistan müharibədən sonra çalışırdı ki, Naxçıvanın iqtisadi təcridini həyata keçirsin. Hazırda Bakı ilə Naxçıvan arasında əlaqələrdə müəyyən problemlər var, çünki biz İran üzərindən və digər yollarla əlaqə saxlayırıq. Artıq Bakı ilə Qars birləşəndən sonra Türkiyənin başqa bir layihəsi də gündəmdədir - Qars-İğdır-Naxçıvan xətti. Bu qısa bir dəmir yolu xəttidir. Bu layihə də başa çatdıqdan sonra Naxçıvan Qars vasitəsilə birbaşa Bakı ilə əlaqə saxlaya biləcək. Həm də Avropa ilə fasiləsiz yükdaşımaları təmin edə biləcək. Yəni bu, eyni zamanda, Naxçıvanın hazırkı iqtisadi təcridini gələcəkdə ciddi şəkildə aradan qaldırmağa xidmət edir. Bütün bunlar Azərbaycanın geosiyasi və iqtisadi mövqeyini gücləndirir, eyni zamanda, bu, Azərbaycan üçün çox ciddi gəlir deməkdir. Digər tərəfdən, 1993-cü ildə Türkiyə Ermənistanla sərhədlərini bağladıqdan sonra Türkiyənin Cənubi Qafqaz və Orta Asiya ilə dəmir yolu əlaqəsi də qırıldı. Çünki Sovet dövründə Türkiyənin bu dəmir yolu xətti Ermənistan üzərindən keçirdi. Belə olan halda, Cənubi Qafqaz və Orta Asiya ölkələrinin Türkiyə üzərindən Avropa ilə əlaqəsində dəmir yolu xətti baxımından müəyyən məhdudiyyətlər yarandı. BTQ işə düşəndən sonra bu problem öz həllini tapdı”.
Vidadi ORDAHALLI
