Bahadur Bilalov: “Yaxın gələcəkdə öz sağlamlıqlarının bərpası üçün Azərbaycana gələcək xarici ölkə vətəndaşlarının sayı daha da artacaq”
“Müalicəvi turizmin inkişafı üçün Azərbaycanda bütün imkanlar var”. Bunu Naftalan Şəhər Mərkəzi Xəstəxanasının açılışında iştirak edən Prezident İlham Əliyev səhiyyə müəssisəsinin kollektivi ilə görüşən zaman deyib.
Prezident çıxışı zamanı qeyd edib ki, Naftalan şəhərinin ümumi inkişafı sürətlə gedir: "Mən Prezident kimi Naftalan şəhərinə ilk dəfə olaraq on il bundan əvvəl gəlmişdim. O vaxt gördüyüm mənzərə, sözün düzü, məni çox narahat etdi, çox məyus etdi. Çünki şəhər çox ağır vəziyyətdə idi. Vaxtilə Sovet İttifaqının turizm mərkəzlərindən biri olan Naftalan bu adı demək olar ki, itirmişdi. Nəinki başqa ölkələrdən, hətta Azərbaycanın heç bir yerindən buraya gələn yox idi. Ona görə mən dərhal kompleks tədbirlərin görülməsi üçün müvafiq tapşırıqlar verdim. Naftalanın hərtərəfli inkişaf planı hazırlandı və mən bu planı təsdiqlədim. Bu gün biz aparılan bu işlərin real nəticələrini görürük.
Biz Naftalanı müasir turizm mərkəzinə çevirmək üçün konkret addımlar atmağa başlamışıq. Mənim iştirakımla 3 böyük sanatoriya, - indi onlar mehmanxana sayılırlar, - yenidən tikildi, əsaslı şəkildə təmir edildi və istifadəyə verildi. Birinci "Çinar" sanatoriyası, ondan sonra "Qaşaltı", ondan sonra isə "Qarabağ". Bu 3 sanatoriya-mehmanxanada mindən çox otaq var. Burada həm ən yüksək səviyyədə müalicə işləri aparılır, həm də vətəndaşlar və qonaqlar istirahət edirlər. Yaxın gələcəkdə yeni mehmanxananın açılışı gözlənir. Mənə indi bu barədə məlumat verildi. O qədər də böyük olmayan digər mərkəzlər, istirahət zonaları yaradılır. Beləliklə, Naftalan nəinki ölkəmizin, dünyanın nadir turizm mərkəzlərindən birinə çevrilir. Azərbaycan indi dünya miqyasında gözəl turizm mərkəzi kimi tanınır. O cümlədən müalicəvi turizmin inkişafı üçün bizdə bütün imkanlar var, həm Naftalanda, həm digər şəhərlərdə. Belə şəraiti olan şəhərdə əlbəttə ki, qonaqların sayı artmalıdır".
Qeyd edək ki, Azərbaycanda sağlamlıq turizminin inkişaf etdirilməsi üçün müəyyən işlər görülür. Sağlamlıq istirahət mərkəzləri açılaraq əhalinin ixtiyarına verilir və digər kompleks tədbirlər həyata keçirilir.
Turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, Azərbaycanın sağlamlıq turizmini inkişaf etdirmək üçün unikal imkanları var: “O imkanlardan biri Naftalan nefti və müalicəvi Duzdağ sanatoriyasıdır. Zaman-zaman duz çıxarılmış məkanda asma xəstəliyinin müalicəsi üçün çox böyük imkanlar var. 2016-cı ildə turizm sənayesinin inkişafına dair Strateji Yol Xəritəsi təsdiq olunub. Həmin xəritədə də müalicə-sağlamlıq turizminin inkişafı prioritet sahə kimi göstərilib. Məlumndur ki, bu sahənin inkişafı üçün Azərbaycanda Sağlamlıq Turizm Assosiasiyası yaradılıb və fəaliyyət göstərir. Bütün bunlar onu deməyə əsas verir ki, müalicə turizminin perspektivi çox böyükdür”.
Həmsöhbətimiz onu da bildirdi ki, əvvəllər ölkə vətəndaşları sağlamlıq turizmi üçün qonşu ölkələrə üz tuturdular: “Sevindirici haldır ki, artıq vəziyyət müsbətə doğru dəyişib. Yaxın gələcəkdə öz sağlamlıqlarının bərpası üçün Azərbaycana gələcək xarici ölkə vətəndaşlarının sayı daha da artacaq”.
Günel CƏLİLOVA
