Əli Əlirzayev: “Vahid məqsədə çatmaq üçün hər bir tərəf üzərinə düşən öhdəlikləri yerinə yetirməlidir”
“Dövlət özəl sektora daim diqqət və dəstək göstərir”. Bunu Goranboy rayonunda “Region Aqropark”ın açılışında iştirak edən Prezident İlham Əliyev aqroparkın kollektivi ilə görüşündə deyib.
Prezidentin açılış zamanı səsləndirdiyi fikirlərdən belə məlum olur ki, dövlət özəl sektorla əməkdaşlığa xüsusi önəm verir: “Dövlət öz dəstəyini növbəti dəfə göstərmişdir. Bildiyiniz kimi, Azərbaycanda aqroparkların yaradılması dövlət xətti ilə həyata keçirilir. Dövlət özəl sektora daim diqqət və dəstək göstərir. Vaxtilə istifadəsiz qalmış bu ərazidə dövlət xətti ilə böyük infrastruktur layihələri icra edilmişdir. Yollar, qaz, elektrik və su xətləri çəkildi, suvarma işləri görüldü, dövlət xətti ilə ən müasir texnika alındı. Bu texnikanın bir hissəsi burada nümayiş etdirilir. Bu, dünyanın ən aparıcı şirkətinin texnikasıdır. Dövlət xətti ilə 40-dan çox texnika gətirilmiş və bu aqroparka lizinqə verilmişdir. Ölkəmizdə kənd təsərrüfatı ilə bağlı siyasətimiz uğurla icra ediləcəkdir. Kənd təsərrüfatına böyük diqqət göstərilir. Azərbaycanda kənd təsərrüfatı prioritet sahələrdən biridir”.
Prezident İlham Əliyev onu da qeyd edib ki, regionların kompleks inkişaf konsepsiyası həyatda öz əksini tapır. İş yerləri, yerli istehsal yaradılır: “Bir daha deyirəm ki, dünyanın bir nömrəli şirkətinin texnikası bu gün Goranboydadır, ölkəmizin hər bir yerindədir. Biz son illər ərzində kənd təsərrüfatı üçün minlərlə texnika almışıq və yenə də alacağıq”.
Bütün bu deyilənlərin fonunda maraqlıdır, ölkə başçısı niyə dövlətlə özəl sektorun əməkdaşlığına bu qədər önəm verir? Məsələyə münasibət bildirən iqtisadçı-alim Əli Əlirzayev bunu bir sıra amillərlə əlaqələndirdi. Onun fikrincə, iqtisadiyyatın kompleks və davamlı inkişafı dövlətlə özəl sektorun qarşılıqlı əməkdaşlığından asılıdır: “Ona görə də bu sahədə əməkdaşlığa xüsusi önəm verilir. İqtisadiyyatın inkişafına dair Strateji Yol Xəritəsi qəbul olunub. Nəzərə almaq lazımdır ki, elə sahələr var mütləq orada dövlət aktiv iştirak etməlidir. Çünki dövlətin maliyyə baxımından imkanları daha böyükdür. Həm miqyas baxımından, həm də onun iqtisadi əsasları baxımından dövlətin imkanları böyükdür. Məsələn, iqtisadiyyat üçün vacib olan sahələrdən biri də infrastrukturdur. Müvafiq infrastruktur olmalıdır ki, kənd təsərrüfatı və iqtisadiyyatın digər sahələri inkişaf etsin. Ona görə də sözügedən məsələlərdə dövlət aparıcı həlqədir. Dövlətin himayəsi, dəstəyi və nəzarəti olmadan bütün bunları həyata keçirmək mümkün deyil. Bir sıra böyük layihələrin həyata keçirilməsi məhz dövlət dəstəyi hesabına mümkündür. Elə sahələr də var ki, özəl sektorun yardımı olmadan işləmək çətindir. Dövlət də özəl sektorun inkişafına şərait yaradır. Bu, xarici ölkələrdə də belədir. Yəni təşəbbüskarlıq özəl sektordan, o cümlədən kiçik və orta sahibkarlıqdan gəlməlidir. Belə olduqda daha çevik qərarlar qəbul etmək mümkün olur. Nəticədə sahibkarlıq inkişaf edir, rəqabət mühiti yaranır və s. Ona görə də belə bir şəraitin yaradılması dövlətin vəzifəsidir. Bütövlükdə, dövlətlə özəl sektor arasında əlaqələrin bir sıra mexanizmləri var. Qanunların qəbul olunmasını, normativ-hüquqi sənədlərin yaradılmasını, təhlükəsizlik məsələsini dövlət həyata keçirir. Həmçinin, tariflərin müəyyən olunması da bura daxildir. Ancaq bir sıra dövlət sifarişlərinin reallaşdırılmasını isə özəl sektor icra edir. Ona görə də dövlətlə özəl sektor arasında əməkdaşlığın genişlənməsi iqtisadiyyatın inkişafına müsbət təsir göstərir. Azərbaycanda iqtisadiyyatın bölmələrinin 75 faizi özəl sektorun payına düşür. Vahid məqsədə çatmaq üçün hər bir tərəf üzərinə düşən öhdəlikləri yerinə yetirməlidir”.
Vidadi ORDAHALLI
