Vahid Məhərrəmov: “Yalnız bu halda yüksək nəticə əldə edə bilərik və idxaldan asılılığı aradan qaldırmaq olar”
“Ərzaq təhlükəsizliyi məsələsi öz həllini tapacaq və idxaldan asılılığımızı daha da azaldacağıq”. Bu fikirləri Goranboy rayonunda “Region Aqropark”ın açılışında iştirak edən Prezident İlham Əliyev aqroparkın kollektivi ilə görüşündə deyib. Dövlət başçısının sözlərinə görə, bununla bağlı yaradılacaq aqroparklar öz töhfəsini verəcək.
Onun fikrincə, bütövlükdə, bu gün Azərbaycanda aqroparkların yaradılması geniş vüsət alıb: “Nəzərdə tutulan 45 aqroparkdan 4-ü artıq istifadəyə verilib: Yalama, Şəmkir, Cəlilabad və bu gün Goranboy rayonunda. Mən dördünün də açılışında şəxsən iştirak etmişəm. Bu bir daha onu göstərir ki, dövlət bu məsələlərə çox böyük diqqət göstərir və dəstək verir. Bu 45 aqroparkın yaradılmasına 1,4 milyard manat sərmayə qoyulacaq, onun bir hissəsi qoyulub. Bu aqroparkların ərazisi 191 min hektara bərabərdir. Bax, bu qədər torpaq istifadəsiz qalmışdı. İndi isə tezliklə bu 45 aqroparkın yaradılması nəticəsində kənd təsərrüfatı məhsullarımızın istehsalı böyük dərəcədə artacaq. Beləliklə, ölkə qarşısında duran əsas vəzifələrdən biri - ərzaq təhlükəsizliyi məsələsi öz həllini tapacaq və biz idxaldan asılılığımızı daha da azaldacağıq”.
Prezident onu da vurğulayıb ki, yaradılan aqroparklarda ən müasir texnologiyalar tətbiq olunur, müasir suvarma texnologiyaları, pivot suvarma sistemləri quraşdırılır: “Bu sistemlərin tətbiqi Azərbaycanda geniş vüsət alacaq. Bu məqsədlə artıq bu sistemlərin istehsalı ölkəmizdə təşkil edilib ki, xaricdən asılılıq azalsın və xaricə valyuta getməsin”.
Dövlət başçısı deyib ki, beləliklə, aqroparkların yaradılması və fəaliyyəti nəticəsində ərzaq təhlükəsizliyi məsələləri öz həllini tapacaq, yerli istehsal inkişaf edəcək, ixrac imkanlarımız da genişlənəcək.
Reallıq ondan ibarətdir ki, aparılan iqtisadi siyasət ölkənin kənd təsərrüfatı məhsullarına olan tələbatını daxili istehsal hesabına təmin etməyə və xaricdən ərzaq idxalı asılılığını aradan qaldırmağa hesablanıb. Bu baxımdan yaradılacaq aqroparklar nə dərəcədə perspektivlidir?
Məsələyə münasibət bildirən kənd təsərrüfatı sahəsi üzrə mütəxəssis Vahid Məhərrəmov buna bir neçə kontekstdən yanaşdı. Onun fikrincə, aqroparkların müəyyən sahələr üzrə ixtisaslaşmasına xüsusi diqqət göstərmək lazımdır: “Qərb ölkələrində aqroparklar müəyyən sahələr üzrə yaradılır. Məsələn, heyvandarlıq, bitkiçilik üzrə aqroparklar yaradılır. Yaxud da xüsusi toxumçuluq üzrə aqroparklar yaradılır. Bizdə aqroparkların yaradılmasında bu təcrübədən yararlanmalıyıq. Sözügedən aqroparklarda əsasən elmi müəssisələr, yəni institutlar işləyir. Həmin müəssisələrdə bilik və bacarıqların əldə edilməsi, daha sonra bunların fermerlərə, kəndlilərə ötürülməsi həyata keçirilir. Əsasən bu işlərlə məşğul olurlar. Ona görə də yaxşı nəticə əldə edirlər. Hesab edirəm ki, Azərbaycanda da aqroparklar məhz sözügedən prinsiplər üzrə qurulmalıdır. Yalnız o halda biz xaricdən ərzaq asılılığını minimum səviyyəyə endirə bilərik. Təkcə kəndlilərdən mal və məhsulun tədarük edilməsi, saxlanması və onun nəql edilməsi ilə bütün bunları yoluna qoymaq çətin məsələdir. Mütləq deyil ki, ölkədə yaradılan aqroparkların sayı daha da artırılsın. Düzdür, buna da müəyyən mənada ehtiyac var. Ancaq hesab edirəm ki, bütün bunlarla yanaşı, regionlarda aqroparkların ixtisaslaşmış formada yaradılmasına ehtiyac var. Regionlarda yaradılan aqroparklarda o sahə üzrə elmi müəssisənin yerləşdirilməsi, yeni texnologiyanın əldə olunması, onun tətbiqi vacibdir. Fikrimcə, yalnız bu halda aqroparklardan yüksək nəticə əldə edə bilərik və idxaldan asılılığı aradan qaldırmaq olar. Hesab edirəm ki, səylərimizi bu istiqamətdə artırmalıyıq”.
Vidadi ORDAHALLI
