Fikrət Yusifov: “Burada başlıca məqsəd vəsaitlərin idarə olunmasında səmərəlilik prinsiplərinə əməl etmək və risqlərdən maksimum sığortalanmaqdan ibarətdir”
Azərbaycan Respublikası Dövlət Neft Fondunun (SOFAZ) səhmlərə investisiyalarının artması dünya iqtisadiyyatında müşahidə olunan trendlərdən də asılı olacaq. Bu barədə mətbuata Neft Fondundan məlumat veriblər.
SOFAZ-dan bildirilib ki, bundan əvvəl deyildiyi kimi, fondun strategiyasının əsas istiqamətlərindən biri tamamilə şaxələndirilmiş portfelin yaradılmasıdır: “2012-ci ildən Dövlət Neft Fondu özündə müxtəlif şirkətləri, ölkələri və sahələri birləşdirən dünya səhm bazarına investisiya qoymağa başladı. Qeyd olunmalıdır ki, bu proses həm xarici menecerlərin, həm də fondun mütəxəssislərinin köməyi ilə həyata keçirilib”.
SOFAZ-dan xatırladıblar ki, 2018-ci ilin birinci rübünün sonuna investisiya portfelində səhmlərin payı 14,2 faiz təşkil edib. Fondun investisiya siyasətinə uyğun olaraq, səhmlərə portfelin 25 faizinədək investisiya qoyula bilər: “Gələcəkdə səhmlərə yeni yatırımlar dünya iqtisadiyyatındakı trendlərdən, həmçinin, səhmlər, gəlirlər, volatillik və bir çox digər amillər daxil olmaqla, səhm bazarındakı vəziyyətdən asılı olacaq”.
O da qeyd olunub ki, 2018-ci il aprelin 1-nə Dövlət Neft Fondunun investisiya portfelinin ümumi həcmi 37,63 milyard ABŞ dolları (ötən il 35,806 milyard dollar) və ya ümumi aktivlərin təxminən 100 faizini təşkil edib. Beləliklə, fondun investisiya portfelinin 3,4 faizi həcmində sərmayə qızıla, 5,8 faizi daşınmaz əmlaka, 14,2 faizi səhmlərə, 76,6 faizi isə istiqrazlar və digər pul bazarı alətlərinə qoyulub.
Görünən odur ki, vəsaitin çoxu istiqrazlar və digər pul bazarı alətlərinə qoyulub. Ancaq reallıq ondan ibarətdir ki, Neft Fondu sözügedən məsələdə düşünülmüş strategiya həyata keçirir və balanslaşdırılmış siyasət aparır. Bunun nəticəsidir ki, Azərbaycan ötən illər ərzində hər hansı ciddi iqtisadi itkilərlə üzləşməyib.
Ümumən, Neft Fondunun investisiya portfeli ilə bağlı bu nisbəti ekspertlər necə dəyərləndirirlər?
Sözügedən məsələni “Bakı-Xəbər”ə şərh edən iqtisad elmləri doktoru, professor Fikrət Yusifov buna bir neçə kontekstdən yanaşdı: “Dövlət Neft Fondunun vəsaitləri Azərbaycan Respublikası Prezidentinin 2001-ci il 19 iyun tarixli, 511 nömrəli Fərmanı ilə təsdiq edilmiş “Azərbaycan Respublikası Dövlət Neft Fondunun valyuta vəsaitlərinin saxlanması, yerləşdirilməsi və idarə edilməsi haqqında qaydalar”a əsasən idarə olunur. Qaydalar Neft Fondunun valyuta vəsaitinin təhlükəsiz saxlanması və onların səmərəli idarə edilməsi üçün zəruri olan bütün məsələləri özündə əks etdirir. Burada başlıca məqsəd vəsaitlərin idarə olunmasında səmərəlilik prinsiplərinə əməl etmək və risqlərdən maksimum sığortalanmaqdan ibarətdir. Bu səbəbdən də Neft Fondu vəsaitləri yerləşdirərkən, mövcud qaydaların tələblərinə uyğun olaraq, onların mümkün qədər şaxələndirilməsini təmin edir. Dünya iqtisadi və maliyyə müstəvisində baş verən bəzi proseslərin məntiqi inkişaf prinsiplərindən kəskin fərqləndiyi indiki dönəmdə vəsaitlərin bu qaydada idarə edilməsi ən səmərəli yoldur. Hesab edirəm ki, bu, Azərbaycan iqtisadiyyatı üçün məqsədəuyğundur. Eyni zamanda, ölkə iqtisadiyyatının maraqlarına uyğundur”.
Vidadi ORDAHALLI
