Rəsul Cahangirli: “Azərbaycanın bu sahədə əldə etdiyi böyük uğurları görüb çox güman ki, bundan sonra daha inamlı addımlar atacaqlar”
Azərbaycan qazının Avropaya çatdırılmasını nəzərdə tutan “Cənub Qaz Dəhlizi” layihəsi regionda əməkdaşlığa, o cümlədən Asiya İnkişaf Bankının üzvü olan digər ölkələrin qaz mənbələrinin diversifikasiyasına müsbət təsir göstərəcək. Bunu Asiya İnkişaf Bankının Azərbaycandakı ofisinin rəhbəri Nəriman Mannəbəyov deyib.
O bununla bağlı bir sıra məqamlara toxunub: “AİB-in əsas məqsədlərindən biri enerji təhlükəsizliyinə ehtiyacı olan ölkələr, o cümlədən, onun üzvləri arasında regional əməkdaşlığı təşviq etməkdir. “Cənub Qaz Dəhlizi” bu kimi məsələlərə cavab verir. Bu layihə dövlət üçün əlavə gəlir mənbəyi ola bilər ki, bundan sosial proqramlar və ya iqtisadiyyatın diversifikasiyası üçün istifadə olunmalıdır. Layihə başa çatdıqdan sonra ən azı 1800 daimi iş yerinin açılması gözlənir”.
Qeyd edək ki, indiyə qədər AİB “Cənub Qaz Dəhlizi” üçün bir milyard dollar məbləğində vəsait ayırıb. Sözügedən layihənin ərsəyə gəlməsində AİB öz imkanlarını əsirgəməyib. Yəni layihənin reallaşması üçün kredit ayırib.
Görünən odur ki, “Cənub Qaz Dəhlizi” layihəsi həm də bir sıra ölkələrə qaz mənbələrini diversifikasiya etməyə kömək edəcək. Yəni onları bu istiqamətdə işlər görməyə həvəsləndirəcək. Bu baxımdan, ekspertlərin sözügedən məsələ ilə bağlı gözləntiləri nədir? Məsələyə münasibət bildirən ekspert Rəsul Cahangirlinin sözlərinə görə, digər ölkələr Azərbaycanın bu sahədə gördüyü işlərdən nümunə götürəcək və öz enerji mənbələrini diversifikasiya edəcəklər: “Əvvəla Azərbaycan bu layihədə həm ixrac edən, həm də tranzit ölkə kimi öz iqtisadi səmərəsini götürəcək. Bununla yanaşı, ölkəmizə böyük həcmdə investisiya cəlb olunacaq, xeyli sayda iş yeri açılacaq. Eyni zamanda, yüksək maliyyə qaynaqlarına malik olan transmilli şirkətlər də burada fəaliyyətə başlayacaq. Bu şirkətlərdə çalışan işçilərin ən azı 90 faizi də Azərbaycan vətəndaşları olacaq. Layihənin əhatə etdiyi ölkələrlə mədəni, iqtisadi və ticarət əlaqələrimiz daha da genişlənəcək. Azərbaycanın Avropanın enerji təhlükəsizliyində bir qarant rolu oynaması ilə yanaşı, Avropa ölkələrinin də Azərbaycana siyasi dəstəyi, iqtisadi partnyorluğu daha da güclənəcək. Bütövlükdə isə “Cənub Qaz Dəhlizi” Azərbaycanın müstəqilliyinin, onun nüfuzunun daha da artmasına, möhkəmlənməsinə xidmət edir. Bununla belə, enerji resurslarına sahib olan ölkələr qaz mənbələrini diversifikasiya edəcəklər. Bu zaman onlar CQD-nin imkanlarından da faydalanmağa çalışacaqlar. Yəni bu kəmər vasitəsilə öz qaz resurslarını dünya bazarına çıxaracaqlar. Nəzərə almaq lazımdır ki, Asiya ölkələri zəngin təbii resurslara malikdirlər. Azərbaycanın bu sahədə əldə etdiyi böyük uğurları görüb çox güman ki, bundan sonra daha inamlı addımlar atacaqlar. Çalışacaqlar ki, çoxşaxəli enerji xətləri vasitəsilə qaz resurslarını dünya bazarına çıxarsınlar. Bu baxımdan həmin ölkələr üçün yeni perspektiv imkanların açılacağı gözlənir”.
Vidadi ORDAHALLI
