Fikrət Sadıqov: “Bu həm də rəsmi Bakının prinsipial və eyni zamanda, çoxvektorlu xarici siyasət yeritməsi ilə bağlıdır”
“Bir çox ölkələr var ki, onların bizdən qat-qat böyük neft resursları, neft hasilatı var. Ancaq ölkələrin uğurlu inkişafını təbii resurslar həll etmir. Düşünülmüş siyasət, xalq-iqtidar birliyi, şəffaflıq, bütün azadlıqların təmin edilməsi, düzgün iqtisadi siyasət və regional əməkdaşlıq uğurlu inkişafın əsas amilləridir”. Bunu Prezident İlham Əliyev “Cənub Qaz Dəhlizi”nin rəsmi açılış mərasimində bildirib.
Dövlət başçısının sözlərinə görə, bu işlərin təməlində düşünülmüş siyasət dayanır. Bu gün Azərbaycan ayaqda möhkəm duran, müstəqil ölkədir. Eyni zamanda, müstəqil siyasət aparan və güclü iqtisadiyyata malik olan bir ölkədir.
Prezident İlham Əliyev çıxışında onu da vurğulayıb ki, bu gün enerji təhlükəsizliyi ilə bağlı məsələlər dünya gündəliyində çox ciddi şəkildə dayanıb. Ölkələrin milli təhlükəsizliyi o cümlədən enerji təhlükəsizliyindən böyük dərəcədə asılıdır: “Cənub Qaz Dəhlizi” enerji resurslarının şaxələndirilməsi işində də çox önəmli layihədir və hesab edirəm ki, əvəzolunmaz layihədir. Biz bu layihədə həm mənbələrin, həm də marşrutların şaxələndirilməsini görürük. Çünki ancaq bu təqdirdə tam mənada enerji resurslarının diversifikasiyası, şaxələndirilməsi haqqında danışa bilərik. Sadəcə olaraq yeni marşrutların açılması və eyni mənbədən qidalanması tam mənada enerji şaxələndirilməsi məsələsi deyil. Biz isə, sözün əsl mənasında, enerji şaxələndirilməsi layihəsini icra edirik”.
Həqiqətən də bir sıra ölkələr var ki, bizdən qat-qat böyük enerji resurslarına malikdirlər, amma həmin ölkələr bunu dünya bazarına çıxarıb rasional, dinamik inkişafa nail ola bilmirlər. O baxımdan maraqlıdır, Azərbaycan nəyin hesabına stabil, uğurlu inkişafa nail olub?
Məsələyə münasibət bildirən keçmiş diplomat, politoloq Fikrət Sadıqov bunu bir sıra faktorlarla, əsasən də Azərbaycanın düşünülmüş siyasət yeritməsi ilə əlaqələndirdi: “Enerji xətlərinin şaxələnməsində, neft-qaz kəmərlərinin çəkilməsində Azərbaycanın rolu kifayət qədər böyükdür. Çünki biz təşəbbüskar ölkə olmaqla yanaşı, sözügedən layihələrin həyata keçirilməsində aparıcı rol oynayan bir dövlətik. Təbii ki, belə layihələrin həyata keçirilməsi Azərbaycanın prinsipial və eyni zamanda düşünülmüş çoxvektorlu xarici siyasət yeritməsi ilə bağlıdır. Belə bir siyasət olmasaydı, o zaman ciddi uğurlara nail ola bilməzdik. Məhz Azərbaycanın bir sıra məqamları nəzərə alması, aparıcı dövlətlərlə düzgün münasibətlər qurması, onlarla bir sıra layihələrdə iştirak etməsi sözügedən uğurların əldə olunmasına gətirib çıxardı. Bütün bunlar bizə faktiki olaraq imkan verdi ki, Avropanın enerji təhlükəsizliyini təmin edək. Çünki onların bizim təbii resurslara böyük ehtiyacları var. Avropanın aparıcı dövlətləri başa düşürlər ki, Azərbaycan etibarlı bir oyunçu və partnyordur. Sözügedən formatda resurslardan istifadə etmək, Azərbaycanla tərəfdaşlıq əlaqələri qurmaq hər iki tərəfin xeyrinədir. Münasibətləri düşünülmüş şəkildə qurmaq, inkişaf etdirmək Avropa dövlətlərinin marağı çərçivəsindədir. Öz diplomatik səylərimizi bundan sonra gücləndirərək, bu istiqamətdə böyük işlər görməliyik. Nəzərə almaq lazımdır ki, gələcəkdə bir sıra layihələrin həyata keçirilməsi gözlənir. Bir sözlə, Azərbaycanın düşünülmüş siyasət yeritməsi uğurlu neft strategiyasının reallaşmasına gətirib çıxardı”.
Vidadi ORDAHALLI
