Əli Əlirzayev: “… bu, sahibkarların dövriyyə və gəlirlərinin artmasına gətirib çıxaracaq”
Vergi sisteminə ediləcək dəyişikliklər açıqlanıb. Azərbaycanda Sahibkarlar Gününə həsr edilmiş konfransda çıxış edən vergilər naziri Mikayıl Cabbarov vergi sistemində aparılan islahatlar və vergi qanunvericiliyində gözlənilən dəyişikliklərlə bağlı bir sıra açıqlamalar verib.
O qeyd edib ki, sahibkarların vergi yükü əhəmiyyətli dərəcədə azaldılacaq: “Bu il büdcə paketinə bir sıra təkliflər təqdim olunacaq. Bunlar artıq aidiyyəti qurumlarla müzakirə edilir. Təklif edilən dəyişikliklər mikro və kiçik sahibkarlıq subyektlərinin vergi yükünün əhəmiyyətli dərəcədə azaldılmasına yönəldiləcək”.
Kiçik və mikro sahibkarlıqla məşğul olanların vergi yükünün azaldılmasının sahibkarlıqla məşğul olanlara nə kimi faydası olacaq?
İqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, vergi güzəştinin tətbiq olunması sahibkarların xeyrinə olur. Ancaq bu işdə ədalətlilik təmin olunmalıdır: “Kiçik və mikro sahibkarlığın inkişafını təmin etmək üçün bu sahə ilə məşğul olanlara xırda həcmli kredit verilə bilər. Bu, kiçik sahibkarlıqla məşğul olanların sayının artmasına təsir edəcək. Kiçik və mikro sahibkarlıqla məşğul olanların sayının artması iş yerlərinin sayının artmasına səbəb olacaq. Vergi yükünün azaldılması imkan verəcək ki, kiçik sahibkarlar ev təsərrüfatı ilə məşğul olsunlar”.
Həmsöhbətimiz hesab edir ki, kiçik sahibkarlığın inkişafı iri sahibkarlıqdan daha sərfəlidir.
Ə.Əlirzayevin sözlərinə görə, bir neçə gün öncə keçirilən konfransda kiçik və orta sahibkarların güzəştlərdən daha çox istifadə etməsi ən çox müzakirə edilən məsələlərdən idi: “Hazırda kiçik və orta sahibkarlar üçün sadələşdirilmiş vergi dövriyyəsi illik olaraq 200 min manatdır və yeni müzakirələrdə həmin dövriyyənin iki dəfə artırılaraq 400 min manata çatdırılması nəzərdə tutulur. Bu imkan verəcək ki, sadələşdirilmiş vergiyə cəlb olunmuş sahibkarların sayını artırmaq mümkün olsun və nəticədə onlar daha çox vergi güzəştlərindən istifadə edə bilsinlər”.
İqtisadçı qeyd etdi ki, kiçik və mikro sahibkarların vergi yükünün azaldılması onların xərclərinin azaldılmasına və həmin sektorların dəstəklənməsinə imkan verəcək: “Gəlir vergisinin dərəcələrinə baxılması da gündəmdə olan məsələlərdəndir. Fiziki şəxslərin gəlir vergisi çox vacibdir. Bu həm əmək müqavilələrinin leqallaşdırılması, həm də sahibkarların leqal işləməsi baxımından önəmlidir. Kiçik sahibkarlıqla məşğul olanlar üçün vergi yükünün azaldılması təklifi qəbul olunarsa, bu, sahibkarların dövriyyə və gəlirlərinin artmasına gətirib çıxaracaq”.
Günel CƏLİLOVA
