Rəsul Cahangirli: “Bütün bunlar ölkə iqtisadiyyatına müxtəlif mənbələrdən investisiyaların cəlb edilməsi ilə bağlı yaxşı zəmin yaradır”
Beynəlxalq Maliyyə Korporasiyası (IFC) Azərbaycana valyuta axını üçün alternativ mənbələr yaratmaqda kömək etməyə hazırdır. Bunu IFC-nin Cənubi Qafqaz üzrə regional meneceri Yan van Bilsen mətbuata açıqlamasında bildirib. Onun sözlərinə görə, IFC müxtəlif istehsal sektorunda şəffaf idarəetmə ilə rəqabətqabiliyyətli müəssisələrə, o cümlədən ölkəyə xarici valyuta axınına alternativ mənbələr yaratmaqda kömək üçün ixraca meylli sahələrə investisiyalar yatırılmasına açıqdır.
Yan van Bilsenin fikrincə, korporasiya, həmçinin, özəl sektorun rolunu gücləndirməyə kömək etməklə Azərbaycan iqtisadiyyatının diversifikasiyası prosesini dəstəkləməyə çalışır.
Regional menecer hesab edir ki, investisiya mühiti və tənzimlənməsi sahəsində davam edən islahatlar sərmayədarların özəl sektora kapital qoyması məsələsində etimadın möhkəmlənməsi baxımından vacibdir və ölkənin iqtisadi diversifikasiyasına öz töhfəsini verir: “Son hadisələr, o cümlədən, 2014-cü ildə neftin qiymətinin düşməsi göstərdi ki, Azərbaycan da daxil olmaqla, bir çox region ölkələri daha az dövlət resurslarına və daha çox özəl sektora bel bağlayaraq digər artım modelinə keçməlidirlər. Bu o deməkdir ki, yeni artım mənbələrini istifadə etmək lazımdır. Bir çox hökumətlər bunu etiraf edir və bu istiqamətdə addımlar atırlar. Tərəqqinin sürətləndirilməsi və dəstəklənməsinin başlıca amillərindən biri özəl sektorun əsas artım amilinə çevrilməsi sayılır”.
Görünən odur ki, Azərbaycanda aparılan çoxşaxəli islahatlar, iqtisadiyyatın diversifikasiyası beynəlxalq maliyyə qurumlarının ölkəyə marağını artırır. Bu baxımdan, ekspertlər ölkəyə valyuta axını üçün alternativ mənbələrin perspektivlərini necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, burada söhbət iqtisadiyyatın maksimum liberallaşdırılmasından gedir: “Belə olduqda, ölkə iqtisadiyyatının müxtəlif sahələrinə xarici sərmayə axını artır. Xarici kapitalın iştirakı ilə ölkədə bir sıra istehsal və xidmət sahələri yaradılır. Nəticədə həm qeyri-neft sektorunun inkişafı sürətlənir, həm də məşğulluğun səviyyəsi yüksəlir. Beynəlxalq Maliyyə Korporasiyası Azərbaycanda neftdən asılılığın azaldılması ilə bağlı aparılan siyasətin, bu yöndə görülən işlərin fərqindədir. Onlar görürlər ki, son illər bununla bağlı hökumət tərəfindən bir sıra proqramlar qəbul olunub. Azərbaycanda azad iqtisadi zonaların yaradılması ilə bağlı işlər görülür. Azərbaycan sürətlə regionda nəqliyyat-tranzit mərkəzinə çevrilir. Bütün bunlar ölkə iqtisadiyyatına müxtəlif mənbələrdən investisiyaların cəlb edilməsi ilə bağlı yaxşı zəmin yaradır. Özü də söhbət özəl mənbələrdən gedir. O baxımdan hesab edirəm ki, biz maksimum bu imkanlardan səmərəli istifadə etməliyik. Ölkədə elə əlverişli iqtisadi və biznes mühiti yaradılmalıdır ki, xarici sərmayələr Azərbaycan iqtisadiyyatının müxtəlif sahələrinin inkişafında fəal rol oynasınlar. Bununla bağlı rəqabətə davamlı emal və istehsal sahələrinin yaradılmasına, ölkə iqtisadiyyatında ən müasir texnoloji vasitələrdən istifadə olunmasına ehtiyac var. Belə olarsa, o zaman Azərbaycan iqtisadiyyatının inkişafında dövlətin üzərinə böyük yük düşməz. Nəzərə almaq lazımdır ki, dövlət vəsaiti hesabına ölkədə müasir infrastruktur yaradılıb. İndi lazımdır ki, özəl sektor bundan səmərəli istifadə edib iqtisadi inkişafa böyük töhfələr versin”.
Vidadi ORDAHALLI
