Fikrət Yusifov: “Azərbaycanın iqtisadi qüdrəti artdıqca, dünya siyasi meydanında onun nüfuzu daha da güclənir”
“Azərbaycan iqtisadi cəhətdən tam müstəqil dövlətdir və məhz buna görə də inamla öz müstəqil siyasətini aparır”. Bunu Prezident İlham Əliyev Azərbaycan Xalq Cümhuriyyətinin 100 illik yubileyi münasibətilə təşkil olunan rəsmi qəbulda çıxışı zamanı deyib.
Dövlət başçısının sözlərinə görə, ölkədə güclü iqtisadiyyat yaradılıb və təbii resurslardan çox böyük səmərə ilə istifadə edilib: “İqtisadi müstəqillik siyasi müstəqilliyimizin əsas amilidir. İqtisadi müstəqillik olmadan siyasi müstəqillikdən söhbət gedə bilməz. Güclü iqtisadi əsaslar gələcəkdə də imkan verəcək ki, Azərbaycan heç kimdən asılı olmayaraq uğurla inkişaf etsin”.
Prezident qeyd edib ki, bu gün Azərbaycan iqtisadi cəhətdən tam müstəqil dövlətdir, heç kimdən asılı deyil və məhz buna görə də inamla öz müstəqil siyasətini aparır: “Bizim iqtisadi uğurlarımız mötəbər beynəlxalq iqtisadi qurumlar tərəfindən də yüksək qiymətləndirilir. Rəqabətqabiliyyətliliyə görə Azərbaycan dünya miqyasında 35-ci yerdədir, inkişafda olan ölkələr arasında inkişafa görə üçüncü yerdədir. Bunu biz demirik, bunu dünyanın birinci iqtisadi forumu olan Davos İqtisadi Forumu deyir. Yəni bu güclü iqtisadiyyat imkan verir ki, biz Azərbaycanda istənilən sosial layihəni, infrastruktur layihələrini icra edək və edirik”.
Həqiqətən də siyasi müstəqilliyin əsas indiqatorlarından biri də iqtisadi müstəqillikdir. Ölkə iqtisadi baxımdan hansısa ölkədən, beynəlxalq maliyyə qurumundan asılı olmadıqda müstəqil siyasət yeridir.
Bu baxımdan Prezidentin səsləndirdiyi fikirləri ekspertlər necə şərh edirlər? Sözügedən məsələ ilə bağlı fikirlərini “Bakı-Xəbər”lə bölüşən iqtisad elmləri doktoru, professor Fikrət Yusifovun sözlərinə görə, ölkənin iqtisadi inkişafı Azərbaycanın siyasi gücünün artmasını şərtləndirən əsas amildir: “Son üç ay ərzində götürülən iqtisadi inkişaf sürəti bizə cari ili yüksək nəticələrlə başa vurmaq şansları yaradır. Beləliklə, cari ilin birinci rübündə Azərbaycan iqtisadiyyatı 2,3 faiz, onun qeyri-neft sektoru 3 faiz, sənaye istehsalı 2 faiz, qeyri-neft sənayesi isə rekord həddə - təxminən 10 faiz artıb. Kənd təsərrüfatında 4,2 faiz artım qeydə alınıb ki, bu artımın da əsas hissəsi bitkiçiliyin payına düşür. Hesabat dövründə valyuta ehtiyatlarımız 2,2 milyard dollar artaraq 44,2 milyard dollara çatıb. Son üç ayda xarici ticarət dövriyyəmiz 31 faiz, ümumi ixrac 24 faiz, qeyri-neft ixracı isə 37 faiz artıb. Qeyri-neft sektorunda ixracın həcmində baş verən bu sıçrayış hökumətin ölkə iqtisadiyyatının real sektorunun sürətli inkişafına hesablanmış qətiyyətli addımlarının məntiqi nəticəsidir. Hazırda beynəlxalq təşkilatlar tərəfindən Azərbaycanda aparılan iqtisadi islahatlara və əldə olunan nəticələrə çox yüksək qiymət verilir. Davos İqtisadi Forumunun hesabatında Azərbaycan dünyanın 35 ən rəqabətqabiliyyətli ölkəsindən biri, inklüziv inkişaf baxımından isə inkişafda olan ölkələr arasında üçüncüdür. Bu göstəricilərin əldə olunmasında Azərbaycan hökumətinin azad sahibkarlığın inkişafı istiqamətində gördüyü tədbirlərin rolu əvəzsizdir. Hökumət sahibkarlığın inkişafına maneə olan bütün neqativ hallara qarşı mübarizə aparmaqla yanaşı, dünya praktikasında bu sahədə mövcud olan mütərəqqi təcrübənin tətbiqi baxımından çox iş görür. Bu baxımdan investisiyaların və ixracın dövlət tərəfindən təşviq edilməsi ölkə iqtisadiyyatına həm daxili, həm də xarici investorların cəlb edilməsi işində əvəzsiz rol oynayır. Cari ilin birinci rübündə iş adamlarına 28 investisiya təşviqi sənədi verilib. Bu günə qədər isə 229 sahibkar 257 investisiya təşviqi sənədi alıb. Nəticədə reallaşacaq layihələrə 2,3 milyard manat sərmayə qoyulub. Azərbaycanın iqtisadi qüdrəti artdıqca, dünya siyasi meydanında onun nüfuzu daha da güclənir. Bu gün “Cənub Qaz Dəhlizi” layihəsinin açılışı əsrin ən böyük enerji layihəsinə evsahibliyi edən Azərbaycanın iqtisadi qüdrətini səciyyələndirən ən yaxşı göstəricilərdən biridir. Bundan sonra Azərbaycan Avropanı qazla təmin edəcək və deməli, siyasi müstəvidə öz çəkisini bir qədər də artıracaq”.
Vidadi ORDAHALLI
