Aydın Hüseynov: “İxracyönlü, rəqabətqabiliyyətli məhsulların artıq ölkədən kənara çıxarılması ilə bağlı baza formalaşdı və nəticədə qeyri-neft sektoru üzrə ixracatın həcmi artdı”
İqtisadi İslahatların Təhlili və Kommunikasiya Mərkəzinin “İxrac İcmalı”nın 2018-ci ilin mart ayı üçün sayı təqdim olunub. İcmalın bu sayında göstərilir ki, 2018-ci ilin yanvar-fevral ayları ərzində qeyri-neft sektoru üzrə ixrac 241,7 milyon ABŞ dolları təşkil edib. 2017-cı ilin müvafiq dövrü ilə müqayisədə cari ilin yanvar- fevral aylarında qeyri-neft sektoru üzrə ixrac 37,4 faiz artıb.
Dövlət Statistika Komitəsinin məlumatına əsasən, cari ilin yanvar-fevral aylarında ən çox qeyri-neft məhsullarımız Rusiya Federasiyasına ixrac edilib. Belə ki, yanvar-fevral ayları ərzində Rusiyaya 67,8 milyon, Türkiyəyə 65,4 milyon, İsveçrəyə 25,6 milyon, Gürcüstana 17,4 milyon və Çinə 7,6 milyon ABŞ dolları dəyərində qeyri-neft sektoruna aid mal ixrac olunub.
Cari ilin ilk iki ayı ərzində qeyri-neft sektoru üzrə ixracın 37 faiz artmasına münasibət bildirən millət vəkili Aydın Hüseynov “Bakı-Xəbər”ə açıqlamasında qeyd etdi ki, hazırda ölkədə aparılan iqtisadi siyasətin başlıca istiqamətlərindən biri qeyri-neft sektorunun inkişaf etdirilməsidir. Eyni zamanda, qeyri-neft sektorunun diversifikasiyasıdır: “Qeyri-neft sektorunun inkişaf etdirilməsi ilə yanaşı, biz ixrac potensialını artırmalıyıq. Ölkəyə daxil olan bütün valyutalar iqtisadi aktivlik şəklində gətirilməlidir. Sevindirici haldır ki, görülən işlər gözlənilən nəticəni doğrultdu. Məlumdur ki, ötən il 4 milyarddan çox valyuta ehtiyatlarımız artdı. İxracyönlü, rəqabətqabiliyyətli məhsulların artıq ölkədən kənara çıxarılması ilə bağlı baza formalaşdı. Əsasən kənd təsərrüfatı sahəsində, eyni zamanda, pambıqdan ölkəyə valyuta daxil oldu. Nəzərə almaq lazımdır ki, pambıq strateji məhsuldur və ölkəyə valyuta gətirir. Məlumat üçün bildirim ki, ötən il pomidordan ölkəyə 100 milyondan çox vayuta daxil oldu”.
A.Hüseynovun sözlərinə görə, qızıl məmulatlarından da ölkəyə valyuta daxil olması prosesi yaşandı. Sonrakı mərhələlərdə Azərbaycandan təkcə xammal yox, əsasən istehsal yönümlü, rəqabətqabiliyyətli məhsullar ixrac olunacaq. Bunun sayəsində birinci rübdə ölkənin ixracatında 37 fazi artım qeydə alınıb. Zaman keçdikcə ixracat daha da artacaq və stimullaşacaq.
Millət vəkili onu da vurğuladı ki, qarşıya qoyulan başlıca məqsədlərdən biri də ixracyönümlü məhsulların dünya bazarına çıxarılmasıdır: “Burda “Azİmport”, “Made in Azerbaijan” və “Azexport.az” kimi təşviqat işləri yüksək səviyyədə həyata keçirilir”.
Günel CƏLİLOVA
