Qabil Hüseynli: “Düşünürəm ki, bu amil Azərbaycanın sürətli inkişafına yeni nəfəs verəcək”
Seçki günü yaxınlaşdıqca hamını bir sual düşündürür: görəsən, seçkidən sonra nə baş verəcək? Bəzi radikal dairələrin proqnozlarını istisna etsək, ümumən nikbin fikirlərin səsləndiyinin şahidi oluruq. Bədbin notlara köklənmişlər hətta seçki öncəsi situasiyanın gərgin olacağını söyləyirdilər. Amma onların proqnozları həmişəki kimi özünü doğrultmadı.
Seçki ilə bağlı bir neçə mərhələ arxada qaldı. Hazırda son mərhələdəyik, məntəqələrdə hazırlanmış qutular vətəndaşları gözləyir. Ən maraqlısı budur ki, seçkilərə beynəlxalq diqqət də böyükdür. Xüsusilə də xarici media və beynəlxalq ekspertlər seçkidən sonra Azərbaycanda nələrin gözlənildiyinə dair rəylər, fikirlər bildirirlər. Onların əksəriyyətinin gözləntiləri pozitivdir.
Beynəlxalq ekspertlər və xarici media seçkidən sonra Azərbaycanda əhəmiyyətli dəyişikliklərin baş verəcəyinə, müsbətə doğru ciddi islahatların aparılacağına ümid bəsləyirlər. LİNKS təhlil mərkəzinin direktoru doktor Dennis Sammut seçkidən sonra Azərbaycanda böyük siyasi islahatlara start verilməsinə imkan yaradılacağına dair ümidli olduğunu xarici mediada yazıb. Seçkilərdən sonra Azərbaycanda böyük mənada müsbət dəyişikliklərin olacağına dair gəlinən qənaət nəyə əsaslanır və ehtimalları nə dərəcədə real saymaq olar?
Politoloq Qabil Hüseynli qəzetimizə açıqlamasında bildirdi ki, belə qənaətlərə gəlinməsi təbiidir: “Çünki Azərbaycanda buna ehtiyac duyulur. Açığını deyim ki, prezident seçkiləri həm də yeni xəttə startın verilməsi anlamına gəlir. İndiyə kimi ölkənin idarəetmə kursunu qənaətbəxş saymaq olar. Kimin seçiləcəyindən asılı olmayaraq, kadr islahatlarına ehtiyac var. Çünki etiraf etməliyik ki, komandada etibarı doğrultmayan və yaşı keçmiş şəxslər də var. Elə adam var ki, uzun müddətdir eyni vəzifəni tutub dayanıb. Təbii ki, bunu uzun müddət eyni postda çalışan və uğurlara imza atan məmurlarımıza şamil etmək olmaz. Ancaq elə kadrlar var ki, onlar islahatları tormozlayırlar. Xüsusən də bunu Nazirlər Kabinetinin fəaliyyətinə aid edə bilərik. Yeniləşməyə ciddi ehtiyac var. Çünki Azərbaycanın real durumu bunu tələb edir. Ölkədə neft erası, demək olar ki, başa çatır. Bizim hərtərəfli inkişafa ehtiyacımız var. Bir amildən asılılığa son qoyulmalıdır. Söhbət qeyri-neft sektorunun, xüsusən də aqrar sektorun sürətli inkişafından gedir. Bu istiqamətdə nailiyyətlərə imza atmaq üçün səriştəli, peşəkar kadrlara və yeni təfəkkürün daşıyıcılarına ehtiyac var. Belə bir islahatların aparılması zamanın tələbidir. Xaricdəki media orqanları, analitiklər bunu yaxşı dərk edirlər və əminəm ki, onların proqnozları özünü doğruldacaq. Belə qənaətə yalnız onlar gəlmir, şəxsən mən də bu fikirdəyəm ki, ölkədə ciddi dəyişikliklərin şahidi olacağıq. Düşünürəm ki, bu amil Azərbaycanın sürətli inkişafına yeni nəfəs verəcək”.
Məhəmmədəli QƏRİBLİ
