Samir Əliyev: “MİDA-nın təqdim etdiyi sosial evlər…”
Aztəminatlı və gənc ailələrin mənzillə təminatı ilə bağlı ciddi problemlər yaşanırdı. Bu istiqamətdə ipoteka kreditləşməsi ilə bağlı işlər görülsə də, kreditləşməyə əlçatanlıq istənilən səviyyədə olmadı. Digər ölkələrin təcrübəsində olan sosial evlərlə bağlı layihə gündəmə gətirildi. Artıq bu istiqamətdə lazımi işlər görüldü. Prezident İlham Əliyevin sərəncamından sonra ilkin olaraq paytaxt Bakı ərazisində sosial mənzillər tikilməyə başladı.
Qeyd edək ki, Azərbaycan Respublikasının Mənzil İnşaatı Dövlət Agentliyi ilk layihəsi – Yasamal Yaşayış Kompleksində mənzillərin güzəştlə satışı barədə elan verib. MİDA-nın yaydığı məlumatda qeyud olunur ki, Bakı şəhəri, Yasamal rayonu, Xarici dairəvi yolu 8 ünvanında yerləşən Yasamal Yaşayış Kompleksinin 1, 2, 3 və 4 saylı binalarında mənzillərin satışı mayın 7-si, saat 10:00-da başlayacaq və avqustun 7-si, saat 10:00-dək davam edəcək.
Məlumat üçün bildirək ki, satışa 260 mənzil çıxarılır. Bütün mənzillər tam təmirli, mətbəx mebeli, kombi isitmə sistemi (kombi cihazı daxil olmaqla), su, qaz və elektrik sayğacları ilə təmin edilmiş vəziyyətdə təklif olunur. Bütün binalar Azərbaycan Respublikasının Dövlət Tikinti Normalarına (AzDTN) uyğun layihələndirilib və inşa olunur. Bununla bağlı Azərbaycan Respublikası Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Təsisatdankənar Dövlət Ekspertiza Baş İdarəsinin 15.11.2016-cı il tarixli, 22880 nömrəli və 27.12.2016-cı il tarixli, 23089 nömrəli müsbət rəyləri mövcuddur.
Vətəndaşlara güzəştli şərtlərlə təklif olunan mənzillərin satış qiyməti Azərbaycan Respublikasının İpoteka və Kredit Zəmanət Fondu tərəfindən təyin edilmiş orta bazar qiymətindən aşağı müəyyən olunub. Belə ki, 1 otaqlı mənzillərin qiyməti 29 925 manatdan, 2 otaqlı mənzillərin qiyməti 47 282 manatdan, 3 otaqlı mənzillərin qiyməti 65 626 manatdan başlayır.
Mənzilə güzəştli ipoteka krediti vasitəsilə sahib olmaq istəyən vətəndaş minimal ilkin ödənişdən artıq ödənilən məbləğə görə, mənzilin satış qiymətini tam həcmdə öz vəsaiti hesabına birdəfəlik ödəyən vətəndaş isə bütün məbləğə əlavə 10% endirim əldə edəcək.
İpoteka krediti ilə ödənişlər 1 otaqlı mənzil üçün 129-136 manat, 2 otaqlı mənzil üçün 203-236 manat, 3 otaqlı mənzillər üçün isə 282-288 manat olacaq.
Sosial evlərin satış qiyməti barədə fikir bildirən iqtisadçı-ekspert Samir Əliyev “Bakı-Xəbər”ə açıqlamasında qeyd etdi ki, sosial mənzillər daşınmaz əmlak bazarında nisbətən ucuz qiymətə təklif olunan evlərdir: “Hansısa kommersiya şirkəti qeyd olunan məbləğlə evlərin satışa çıxarıldığını elan etsəydi, biz bunu alqışlayardıq. Ancaq sosial mənzilləri MİDA təqdim edirsə, o zaman qiymət təqdim olunandan aşağı olmalıdı idi. Nəzərə almaq lazımdır ki, özəl şirkətdən fərqli olaraq, dövlət tərəfindən tikintisi həyata keçirilən evlərdə qeyri-rəsmi ödənişlər olmur”.
Həmsöhbətimiz hesab edir ki, sosial mənzillərin satış qiyməti daha ucuz olmalı idi: “Bəllidir ki, sosial mənzillər əhalinin aztəminatlı təbəqəsi üçün nəzərdə tutulub. Mənzilin kvadratmetrinin 850-900 manat olduğu qeyd olunur. Aztəminatlı ailə bu qiymətə mənzil ala bilərmi? Sosial evlərin mahiyyəti odur ki, dövlət həmin evi tikir və yaşayış üçün kirayə haqqı ödəmək şərtilə mənzili aztəminatlı ailəyə verir. Kirayə haqqı da simvolik olur. Belə halda məbləğ 100 manat olmalı idi. Bu baxımdan düşünürəm ki, MİDA-nın təqdim etdiyi sosial evlər daha çox kommersiya xarakteri daşıyan nisbətən ucuz mənzillərdir”.
Günel CƏLİLOVA
