Rəsul Cahangirli: “Ölkəyə yatırılan sərmayənin 93 faizi məhz bu illər ərzində qoyulub”
“Son 15 ildə Azərbaycan iqtisadiyyatı 3,2 dəfə artıb, zənnimcə, bu, dünya rekordudur”. Bunu Prezident İlham Əliyev Rusiyanın TASS informasiya agentliyinin baş direktorunun birinci müavini Mixail Qusmana müsahibəsində bildirib. Dövlət başçısı qeyd edib ki, bu gün Azərbaycan iqtisadi baxımdan özünü tamamilə təmin edən və heç bir iqtisadi çətinliyi olmayan ölkədir.
Onun sözlərinə görə, çox böyük investisiya layihələrinə baxmayaraq, ölkədə xarici borcun sabitləşdirilməsi üzrə də iş aparılıb. Bu gün xarici borc ümumdaxili məhsulun təxminən 20 faizinə bərabərdir. Son 15 ildə Azərbaycan iqtisadiyyatına 230 milyard dollardan artıq sərmayə qoyulub.
Həqiqətən də son 15 ildə ölkə iqtisadiyyatının inkişaf etdirilməsi ilə bağlı xeyli iş görülüb. Böyük layihələr həyata keçirildi. Ölkə iqtisadiyyatında sürətli artım qeydə alındı. Bu bir həqiqətdir ki, ötən bu illər ərzində heç bir sosial layihə təxirə salınmadı. Azərbaycan investisiya cəlb edən ölkədən investisiya yatıran və xüsusilə strateji əhəmiyyətli layihələrdə nümunə göstərən, öz təbii ehtiyatlarından, coğrafi mövqeyindən uğurla faydalanan ölkəyə çevrildi. Özünün keyfiyyətcə yeni iqtisadi modelini formalaşdıraraq Avropa və Asiya arasında siyasi və ticarət əlaqələrini genişləndirdi. Qafqaz nəqliyyat dəhlizinin inkişafı ilə yanaşı, nəhəng layihələrin gerçəkləşməsində mühüm rol oynadı. İcra edilən köklü iqtisadi islahatlar, bölgələrdəki infrastruktur layihələri həm ölkəmizin ümumi inkişafına böyük təkan verdi, həm də Azərbaycanın nəhəng transmilli infrastruktur layihələri Avrasiyanın enerji və nəqliyyat xəritəsini dəyişdi. Bu illər ərzində regionlar sürətli inkişaf edib, istər sənayedə, istərsə də kənd təsərrüfatında artım qeydə alınıb. İnfrastruktur əsaslı şəkildə yenilənib. Ötən bu illər ərzində ölkə iqtisadiyyatına 231 milyard dollar sərmayə qoyulub, valyuta ehtiyatları 23 dəfə artıb. İqtisadiyyat 3,2 dəfə, qeyri-neft iqtisadiyyatı isə 2,8 dəfə artıb. Həmçinin, 3100-dən çox məktəb inşa edilib, 642 tibb müəssisəsi tikilib. Ölkədə qazlaşdırma 93 faizə çatıb.
Ümumilikdə, bütün bunları ekspertlər necə dəyərləndirirlər? Məsələyə münasibət bildirən ekspert Rəsul Cahangirlinin sözlərinə görə, həqiqətən də son 15 ildə Azərbaycan böyük iqtisadi uğurlara nail olub: “Bunların miqyasi həqiqətən də böyük rəqəmlərlə ölçülür. Təkcə bir faktı xüsusi qeyd edim ki, Azərbaycana yatırılan sərmayənin 93 faizi məhz son 15 il ərzində qoyulub. Bunun özü ölkə iqtisadiyyatının necə sürətlə inkişaf etməsinin göstəricisidir. Sözügedən proses bu gün də davam edir. Təsadüfi deyil ki, təkcə 2017-ci ildə Azərbaycan iqtisadiyyatına 14,6 milyard dollar sərmayə qoyulub. Bu ilin investisiya proqramına əsasən də kifayət qədər sosial layihə icra ediləcək. Bütün bunlar böyük iqtisadi göstəricilərdir. Ölkədə aparılan genişmiqyaslı tədbirlər sayəsində regionlar sürətlə və dinamik inkişaf edir. Artıq əvvəlki illərdə olduğu kimi, rayonlardan əhali iş dalınca paytaxta və digər böyük şəhərlərə getmir. Çünki regionlarda istehsal, emal və xidmət sahələri yaradılıb. Kənd təsərrüfatında ilbəil artım qeydə alınır. Kənd təsərrüfatı məhsulları həm istehsal olunur, həm də emal olunaraq qablaşdırılır. Bu da, öz növbəsində, işsizliyin azalmasına və məşğulluğun artmasına səbəb olub. Aparılan köklü islahatlar sayəsində Azərbaycanın qeyri-neft sektoru dinamik və sistemli şəkildə inkişaf edir. Bütün bunlar, əlbəttə ki, ötən 15 ildə əldə olunan böyük iqtisadi uğurlardır”.
Vidadi ORDAHALLI
