Ramil Osmanlı: “Xəzər” avtomobil zavodunda avtomobillərin mühərrik və ötürücü qutularından başqa, digər hissələrinin istehsalı da həyata keçiriləcək, bu hal bazarda normal qiymət siyasətini həyata keçirməyə imkan verəcək”
Məlumdur ki, ölkəmizdə növbəti avtomobil zavodu fəaliyyətə başlayıb. Neftçala Sənaye Məhəlləsində inşa olunan “Azərmaş” ASC və “İran Khodro” şirkətinin birgə “Xəzər” avtomobil zavodunun ötən həftə açılışı oldu. Martın 29-da Azərbaycan və İran ildə 10 min maşın istehsal etmək gücündə olan birgə zavod istifadəyə veriblər. Rəsmi mənbələrə görə, zavodun məhsulları hələlik yerli bazar üçün nəzərdə tutulub, amma xarici bazara çıxarılması da nəzərdən keçirilir.
Məlumat üçün bildirək ki, Neftçaladakı Azərbaycan-İran müəssisəsi olan “Xəzər” avtomobil zavoduna indiyədək 21 milyon manat sərmayə yatırılıb. Azərbayan tərəfinin payı burada 75 %-dir.
Zavodda istehsal olunacaq avtomobillər xarici bazarlarda “Made in Azerbaijan” brendi altında satılacaq. Bu avtomobillər daxili bazardakı tələbatı təmin etməklə yanaşı, idxalı da əvəz etməlidir.
Qeyd edək ki, Neftçala avtomobil zavodu fəaliyyətə başlayanadək Şamaxıda da avtomobil zavodu fəaliyyət göstərib. Amma bu zavodun istehsal etdiyi avtomobillərin keyfiyyəti, mühərrikin gücü, ümumilikdə, standartlara cavab vermədiyi və bu, alıcıları qane etmədiyi üçün, sonda fəaliyyətini dayandırmağa məcbur oldu. Ona görə həmin zavoda ayrılan vəsait də səmərə vermədi.
Maraqlıdır, Neftçala Sənaye Məhəlləsində inşa olunan “Azərmaş” ASC və “İran Khodro” şirkətinin birgə “Xəzər” avtomobil zavodunun avtomobilləri bazara daxil ola biləcəkmi? Bu zavodun istehsal etdiyi avtomobillərin normal alıcısı tapıla biləcəkmi?
Əmlak məsələləri üzrə ekspert Ramil Osmanlı “Bakı-Xəbər”ə açıqlamasında qeyd etdi ki, keyfiyyət və qiymət alıcı tələbatına uyğun olarsa, avtomobillər bazara girə bilər: “Yeni zavodun təqdim etdiyi biznes plana əsaslansaq, onun məqsədi tək yerli deyil, xarici bazara çıxacaq avtomobil istehsal etməkdir. Bu, zavodun istehsal edəcəyi avtomobillərin keyfiyyətindən, həmçinin, tətbiq edəcəyi qiymət siyasətindən asılıdır. Həmçinin, həmin avtomobillərin rəqabətə davamlılığı əsas məsələdir”.
R.Osmanlının sözlərinə görə, bir zamanlar Azərbaycanda “Azsamand” avtomobilləri yığılırdı. Və həmin maşınların satışı da təşkil olunurdu: “Kifayət qədər həmin nəqliyyat vasitələrinə tələb var idi. Qeyd olunan avtomobillər sadəcə Azərbaycanda yığılırdı. Ancaq “Xəzər” avtomobil zavodunda avtomobillərin mühərrik və ötürücü qutularından başqa, digər hissələrinin istehsalı da həyata keçiriləcək. Bu hal bazarda normal qiymət siyasətini həyata keçirməyə imkan verəcək. Zənnimcə, ucuz avtomobil təklifinə tələbat olacaq. Nəzərə almaq lazımdır ki, bu gün Azərbaycan bazarında 20-yə yaxın ölkənin istehsalı olan 100-ə yaxın adda maşın var. Azərbaycanda Rusiya, İran, Çin istehsalı olan avtomobilləri çıxmaqla, digərlərinin qiymətləri orta bazar dəyərindən çox yüksəkdir. “Xəzər” avtomobil zavodunda istehsal olunan maşınların satış qiyməti onlardan aşağı olarsa, bazarda həmin minik vasitələrinə tələb olar”.
Günel CƏLİLOVA
