Zakir Əhmədov: “Bunun sayəsində daha uyğun qiymət tarifi müəyyən olunacaq”
Azərbaycanda aparılan islahatlar idarəçiliyin bütün sahələrində, ictimai həyatın bütün sferalarının tənzimlənməsində, davamlı inkişafın, rifahın təmin olunmasında, peşəkar və səmərəli xidmətin formalaşdırılmasında mühüm rol oynayır. Spesifik fəaliyyət növünə görə bir sıra sahələrdə zaman-zaman islahatlar aparılır.
Müasir dövrdə idarəetmə sistemində də təzahür edən modernləşmə yeni idarəetmə modellərinin, müasir, vətəndaşa yönümlü, onu məmnun edən idarəetmənin qurulmasının zəruriliyini üzə çıxarıb. Müvafiq olaraq ölkədə aparılan ardıcıl islahatlar da bununla bağlı işlərin təkmilləşdirilməsinə, səmərəli olmasına xidmət edir. Bununla bağlı Azərbaycanda zaman-zaman sistemli islahatlar aparılır və bu davamlı hal alıb.
Məlum olub ki, istehlakçı tərəfindən texniki şərtlərə uyğun olaraq layihələndirilmə və tikinti-quraşdırma işləri yerinə yetirildikdən sonra sənaye qaz qurğularının qazpaylayıcı şəbəkəyə fiziki qoşulmağa görə məbləğ Tarif (qiymət) Şurası tərəfindən müəyyənləşdiriləcək.
Bu, Azərbaycan Prezidenti İlham Əliyevin imzaladığı “Qaz təchizatı haqqında” Qanunda dəyişikliklər edilməsi barədə” Qanunun tətbiqi və “Qaz təchizatı haqqında” Qanunun tətbiq edilməsi barədə” Azərbaycan Prezidentinin 1998-ci il 28 sentyabr tarixli, 773 nömrəli Fərmanında dəyişiklik edilməsi haqqında” Fərmanında əksini tapıb.
Sənaye qaz qurğularının qazpaylayıcı şəbəkəyə qoşulmasına görə sənaye qaz qurğusunun istifadəçiləri qaz paylayıcısına Tarif (qiymət) Şurası tərəfindən müəyyən olunmuş qoşulma xidmətinə görə ödəniş həyata keçirəcəklər. Qaz paylayıcıları tərəfindən təyin edilmiş qaz təchizatı qiymətləri də məhz Tarif Şurası tərəfindən müəyyən edilmiş tariflərə müvafiq olmalıdır.
Ümumən bu yeniliyə ekspertlər necə yanaşırlar?
Məsələyə münasibət bildirən ekspert Zakir Əhmədovun sözlərinə görə, bu, müasir dövrün tələblərinə uyğun olaraq mütərəqqi yenilikdir: “Bənzər təcrübə bəzi ölkələrdə var. Çünki elə sahələr var ki, orada qiymətlərin tənzimlənməsini bazar müəyyən edir. Yəni tələb və təklif əsasında qiymətlər tənzimlənir. Elə sahələr də var ki, orada qiymətləri Tarif Şurası müəyyən edir. İstehlakçı tərəfindən texniki şərtlərə uyğun olaraq layihələndirilmə və tikinti-quraşdırma işləri yerinə yetirildikdən sonra sənaye qaz qurğularının qazpaylayıcı şəbəkəyə fiziki qoşulmağa görə məbləğin Tarif Şurası tərəfindən müəyyənləşdirilməsi optimal yanaşmadır. Bunun sayəsində daha uyğun qiymət tarifi müəyyən olunacaq. Nəticədə sənaye qaz qurğusunun istifadəçiləri qaz paylayıcısına qabaqcadan müəyyən olunmuş qoşulma xidmətinə görə ödəniş həyata keçirəcəklər. Daha buna görə müxtəlif qiymətlərin müəyyən olunmasına ehtiyac qalmayacaq. Hesab edirəm ki, dövlət başçısının məlum fərmanı hər iki tərəfin mənafeyinə uyğun olacaq. Eyni zamanda, bu, indiki dövrdə ən optimal yanaşmadır. Onu da nəzərə almaq lazımdır ki, son illər ölkənin qazlaşdırılmasında çox ciddi işlər həyata keçirilib. Ölkə ərazisinin böyük hissəsi qazlaşdırılıb. Eyni zamanda, abonentlər qaz çəkilişi ilə bağlı çox rahat şəkildə “ASAN xidmət” mərkəzlərinə müraciət edirlər. Bir neçə gündən sonra müvafiq prosedurlara uyğun olaraq istehlakçı qazla təmin olunur. Bütün bu deyilənlərlə yanaşı, sənaye qaz qurğularının qazpaylayıcı şəbəkəyə qoşulmasına görə Tarif Şurasının müəyyən etdiyi qiymətlərə əsasən ödənişlərin aparılması optimal yanaşmadır”.
Vidadi ORDAHALLI
