Müslüm İbrahimov: “Görünən odur ki, bir sıra beynəlxalq banklar Azərbaycanla işbirliyi qurmaqda çox maraqlıdırlar”
Yüksək inkişaf dinamikasına malik Azərbaycanın sosial-iqtisadi sahədə qazandığı böyük uğurların kökündə dayanan əsas amillərdən biri iqtisadiyyatın diversifikasiyası istiqamətində həyata keçirilən məqsədyönlü siyasətdir.
Bunun nəticəsidir ki, Azərbaycan iqtisadiyyatının tərəqqisi məhdud sfera üzərində köklənməyərək, çoxcəhətli, genişmiqyaslı xarakterə malikdir. Ölkə iqtisadiyyatının müxtəlif sahələrində inkişafın paralel şəkildə getməsi, bir-birini tamamlaması hər zaman xüsusi diqqət mərkəzində olub. Bu səpkidə görülən işlər ölkənin iqtisadi inkişafını daha da sürətləndirib. Azərbaycanın əldə etdiyi nailiyyətlər dünya miqyasında da diqqətlə izlənilməkdədir. Azərbaycanın həyata keçirdiyi islahatlar, qazandığı uğurlar beynəlxalq maliyyə qurumlarının da diqqət mərkəzindədir. Bunun nəticəsidir ki, ötən il Avropa Yenidənqurma və İnkişaf Bankı Azərbaycana manatla kreditlərin verilməsi ilə bağlı təkliflə çıxış etdi.
Artıq növbəti belə bank bənzər qərar vermək fikrindədir. Belə ki, Qara Dəniz Ticarət və İnkişaf Bankı (QDTİB) Azərbaycan hökuməti ilə ölkəyə manatla kreditlərin verilməsi imkanlarını müzakirə edir. Məlumata görə, QDTİB Azərbaycana milli valyuta ilə kreditlər verməkdə maraqlıdır və kredit portfelində payı genişləndirməyi planlaşdırır. Məlumatda o da bildirilir ki, manatla kreditlərin verilməsinə maraq Azərbaycan banklarının dollar fondları ilə maraqlanmamağı ilə bağlıdır. Banklar manat vəsaiti tapmaqda daha çox maraqlıdırlar, nəinki dollar kreditləri tapmaqda.
Məlumat üçün qeyd edək ki, QDTİB Azərbaycan, Albaniya, Bolqarıstan, Gürcüstan, Yunanıstan, Moldova, Ermənistan, Rumıniya, Türkiyə, Ukrayna və Rusiya tərəfindən təsis edilib. Bankın nizamnamə kapitalı 3,45 milyard avrodur. Belə bir bankın Azərbaycana manatla kreditlərin verilməsini nəzərdən keçirməsi, bu istəkdə olması Azərbaycan iqtisadiyyatına, onun milli valyutasına etimadın göstəricisidir.
Maraqlıdır, bəs ekspertlər buna necə yanaşırlar?
Məsələyə münasibət bildirən iqtisad elmləri doktoru Müslüm İbrahimovun söslərinə görə, beynəlxalq maliyyə qurumları tərəfindən Azərbaycana manatla kreditlərin təklifi ölkə iqtisadiyyatına göstərilən inam və etimadın göstəricisidir: “Bu, Azərbaycan manatının nüfuzunun artması deməkdir. Bu gün hər hansı bir ölkənin valyutası beynəlxalq maliyyə qurumları tərəfindən tanınırsa, ona etimad göstərilirsə, bu artıq həmin dövlətin iqtisadi və siyasi nüfuzunun artması deməkdir. Görünən odur ki, bir sıra beynəlxalq banklar Azərbaycanla işbirliyi qurmaqda çox maraqlıdırlar. Təbii ki, manatla kreditlər təklif olunursa, ölkə iqtisadiyyatında sabitlik yaranır. Yəni ölkə artıq dünya iqtisadiyyatında konvertasiya olunmuş valyutaların kurslarının dəyişilməsinə görə asılı vəziyyətdə deyil. Ölkə əsasən öz daxili iqtisadiyyatına arxalanır. Biz onu başa düşürük ki, bir sıra ölkələr müəyyən qədər iqtisadi proteksionist siyasət həyata keçirirlər. Ona görə ki, dünya iqtisadiyyatında olan şoklar milli iqtisadiyyata təsir etməsin. Burada söhbət birinci növbədə milli valyutadan gedir. Əslində, beynəlxalq maliyyə qurumları bununla Azərbaycan iqtisadiyyatı üçün ola biləcək risqlərin dərəcəsini aşağı salırlar. Burada digər bir məsələ ondan ibarətdir ki, yerli banklar manatla kredit verməkdə çətinlik çəkməyəcəklər. Bu da ölkə iqtisadiyyatının xeyrinədir. Nəzərə almaq lazımdır ki, bir sıra kommersiya banklarında milli kapitalla yanaşı, xarici kapital da iştirak edir. Bütün bunlar manatla olan kapitalın dövriyyəsinə müsbət təsir göstərir. Bu həm də manatın likvidliyinin artırılmasına öz müsbət təsirini göstərəcək. Ona görə də bu tendensiya ölkə iqtisadiyyatının xeyrinədir və bunu dəstəkləyirəm”.
Vidadi ORDAHALLI
