Vüqar Bayramov: “Bütün bunlar həm də sərhədyanı bölgələrdə gənclərin məşğulluğunun təmin olunmasında müəyyən rol oynayır”
Azərbaycan iqtisadi baxımdan inkişaf etdikcə, bir sıra sahələrdə daha böyük layihələrə imza atır. Ölkədə aparılan islahatlar çoxşaxəli iqtisadiyyatın qurulmasına, onun inkişaf etdirilməsinə xidmət edir. Ən başlıcası isə bu, ölkədə qeyri-neft sektorunun inkişafına öz töhfəsini verir. Diqqətçəkən məqamlardan biri də ondan ibarətdir ki, bir sıra beynəlxalq təşkilatlar Azərbaycanla birgə regional layihələrin həyata keçirilməsinə xüsusi maraq göstərirlər.
Bu arada məlum olub ki, Avropa İttifaqı Azərbaycanla Gürcüstan arasında sərhədyanı əməkdaşlığın genişləndirilməsi çərçivəsində altı layihə həyata keçirib. Bu barədə mətbuata hökumətdəki mənbədən məlumat verilib. Sözügedən məqsəd üçün Aİ tərəfindən 1,35 milyon avro ayrılıb. Məlumata əsasən, layihələr “Şərq Tərəfdaşlığı” ölkələrinin Ərazi Əməkdaşlığı Proqramı çərçivəsində həyata keçirilir: “Bu layihələr Azərbaycanla Gürcüstan arasında transsərhəd əməkdaşlığın gücləndirilməsinə, yerli icmaların yaşayış şəraitinin yaxşılaşdırılmasına, turizmin inkişafına, ətraf mühitə və gənclərin məşğulluğuna dair problemlərin həllinə yönəlib”.
Məlumat üçün qeyd edək ki, “Şərq Tərəfdaşlığı” ölkələrinin Ərazi Əməkdaşlıq Proqramı sərhəd bölgələrində ümumi problemlərin birgə həll yollarının inkişafına yardım göstərməkdir. Proqramda Gürcüstanla sərhədlərarası əməkdaşlığın genişləndirilməsi nəzərdə tutulur. Əməkdaşlıq başladıqdan bəri Avropa İttifaqı Azərbaycana 582 milyon avroyadək texniki yardım və qrant ayırıb.
Ümumilikdə, sözügedən sahədə əməkdaşlıq çərçivəsində bir sıra proqramların həyata keçirilməsinə, bunun əhəmiyyətinə ekspertlər necə yanaşırlar?
Məsələyə münasibət bildirən iqtisadçı-ekspert Vüqar Bayramovun sözlərinə görə, iki ölkə arasında sərhədyanı sahədə əməkdaşlığın bir sıra iqtisadi üstünlükləri var: “Burada söhbət əsasən sərhədyanı əməkdaşlıq çərçivəsində birgə layihələrin həyata keçirilməsindən gedir. Gürcüstan Azərbaycan üçün çox vacib ölkələrdən biridir. Bu baxımdan Azərbaycanla Gürcüstan arasında əməkdaşlığın gücləndirilməsi hər iki ölkənin maraqlarına uyğundur. Aİ tərəfindən sözügedən layihələrin dəstəklənməsi innovasiya baxımından mühüm əhəmiyyət kəsb edir. Yəni sözügedən yeniliklərin gətirilməsi və tətbiq olunması baxımından vacibdir. Digər tərəfdən, sərhədyanı bölgələrin sosial-iqtisadi inkişafı baxımından bu kimi layihələrin müəyyən iqtisadi əhəmiyyəti var. Bu, həmin ərazilərdə fəaliyyət göstərən sahibkarların bilik və bacarıqlarının artırılmasına xidmət edir. Texniki yardımlar onların bilik və bacarıqlarının artırılması ilə yanaşı, idarəetmənin təkmilləşdirilməsinə xidmət edir. O üzdən, bu istiqamətdə əməkdaşlıq və bir sıra proqramların həyata keçirilməsi, iki ölkə arasında əməkdaşlığın gücləndirilməsinə töhfə verməklə yanaşı, idarəedici orqanların bilik və bacarıqlarının artmasına öz müsbət təsirini göstərəcək. Bu, daha müasir texnologiyadan, innovasiyadan istifadə imkanlarının genişlənməsinə xidmət edir. İki ölkə arasında əməkdaşlıq sərhədyanı bölgələrdə turizmin inkişafına öz müsbət təsirini göstərə bilər. Nəzərə almaq lazımdır ki, hər iki ölkənin bununla bağlı potensialı böyükdür. Bu potensialdan daha səmərəli istifadə olunması baxımından, əlbəttə ki, belə layihələrin özünəməxsus əhəmiyyəti var. Bütün bunlar həm də sərhədyanı bölgələrdə gənclərin məşğulluğunun təmin olunmasında müəyyən rol oynayır. Nəzərə almaq lazımdır ki, sərhədyanı ərazilərdə məşğulluğun təmin olunması günün vacib məsələlərindən biridir”.
Vidadi ORDAHALLI
