Aydın Hüseynov: “Bütün bunlar ölkədə iqtisadiyyatın inkişafında çox mühüm rol oynayır”
Son 10 ildə Azərbaycanda yaradılan infrastruktur ölkədəki sürətli iqtisadi inkişafdan xəbər verir. Məsələ ondadır ki, bu illər ərzində çoxsaylı infrastruktur layihəsinin həyata keçirilməsi nəticəsində ölkənin iqtisadi inkişafı üçün güclü baza formalaşdırılıb.
Yeni qaz və su kəmərləri çəkilib, yollar salınıb. İstər böyük şəhərlərdə, istərsə də regionlarda bununla bağlı geniş işlər görülüb. Yeni-yeni məktəblər, xəstəxanalar, iaşə obyektləri və s. tikilib istifadəyə verilib. Bu tədbirlər, eyni zamanda, yeni iş yerlərinin açılması insanların firavan yaşayışı üçün həyata keçirilən sosialyönümlü strategiyanın mühüm tərkib hissəsinə çevrilib.
Bu istiqamətdə görülən işlər dövlətin məqsədyönlü şəkildə həyata keçirdiyi sosial siyasətin tərkib hissəsi olmaqla yanaşı, həm də ölkənin sürətli iqtisadi inkişafı ilə bağlıdır. Yüksək səviyyədə qurulan yol-nəqliyyat infrastrukturu insanlara böyük rahatlıq gətirdiyi kimi, həm də ölkənin iqtisadi potensialının artmasına stimul verən vacib amillərdən biridir. Rahat yollar olmadan Azərbaycanın dinamik iqtisadi inkişafını təsəvvür etmək belə mümkün deyil. Digər tərəfdən, postneft dövrünün çağırışlarına uyğun olaraq, Azərbaycan iqtisadiyyatı son illər əhəmiyyətli transformasiya mərhələsinə qədəm qoyub. İqtisadiyyatın diversifikasiyası, inklüziv, balanslı və dayanıqlı iqtisadi inkişafın möhkəmləndirilməsi Azərbaycan iqtisadiyyatı üçün prioritet hədəflərə çevrilib. Bu da yeni iqtisadi modelin formalaşmasına şərait yaradıb. Bu baxımdan görülən işlər, müşahidə olunan iqtisadi inkişaf Azərbaycan üçün yeni, dayanıqlı mərhələnin əsasını qoymaqla regionların balanslı iqtisadi inkişafına və formalaşmasına müsbət təsir göstərib. Görünən odur ki, son 10 ildə həyata keçirilən irili-xırdalı infrastruktur layihələri ölkənin ümumi mənzərəsini əhəmiyyətli şəkildə dəyişib. Ümumilikdə, son on ildə bu istiqamətdə görülən işlər Azərbaycanın inkişafında necə rol oynayıb?
Məsələyə münasibət bildirən millət vəkili Aydın Hüseynovun sözlərinə görə, bununla bağlı görülən işlər ölkənin inkişafında mühüm rol oynayıb: “Cənab Prezident İlham Əliyevin həyata keçirdiyi iqtisadi siyasətin prinsiplərinin həyata keçirilməsində regionların sosial-iqtisadi inkişafına dair dövlət proqramları mühüm rol oynayır. Sözügedən proqramların tərkibinə baxanda görürük ki, birinci növbədə infrastrukturun yenilənməsinə xüsusi önəm verilib. Yeni məktəblərin, xəstəxanaların, mədəniyyət evlərinin tikilməsi, yol, enerji infrastrukturunun yenilənməsi və digər işlər bura daxildir. Nəticədə əhali fasiləsiz olaraq elektrik enerjisi, su və təbii qazla təmin olunub. Sözügedən infrastruktur layihələri həyata keçiriləndən sonra regionlarda, böyük şəhərlərdə investisiya qoyuluşu ilə bağlı maraq artıb. Bütün hallarda, hər hansı bir regionun iqtisadi inkişafını təmin etmək üçün başlıca məsələlərdən biri orada infrastrukturun qurulmasıdır. Belə olduqda istər yerli, istərsə də xarici sərmayədarlar investisiya yatırmaqda, istehsal və xidmət sahələrinin qurulmasında maraqlı olurlar. Bu nəinki bizdə, bütün dünyada belədir. Reallıq ondan ibarətdir ki, Azərbaycanda artıq infrastruktur layihələri yüksək səviyyədə qurulub. Bunun nəticəsidir ki, regionlarda həm aqrar sektor, həm turizm, həm də sənaye sektorunun inkişafı üçün bir baza yaranıb. Yeni iş yerlərinin açılmasında, əhalinin məşğulluğunun təmin olunmasında sözügedən işlərin böyük əhəmiyyəti var. Çünki bütün bunların sayəsində çoxsaylı iş yerləri açılıb. Ölkədə dinamik sosial-iqtisadi inkişaf təmin olunub. Bütün bunlar ölkədə iqtisadiyyatın inkişafında çox mühüm rol oynayır. Həm vətəndaşların rahatlığı baxımından, həm də investorların marağı baxımından sadalanan faktorların rolu böyükdür”.
Vidadi ORDAHALLI
