Rəsul Cahangirli: “Bakıda velosiped üçün infrastruktur lazımi səviyyədə qurulsa, o zaman daxili bazarda istehsal olunan yerli velosipedlərə maraq daha da artacaq”
Qafqazdakı yeganə velosiped zavodu olan “Isma Bikes” iki ay əvvəl Batumidən (Gürcüstan) dağ turizmi üçün 10 min ədəd velosiped sifarişi alıb. Bunu jurnalistlərə açıqlamasında İsmayıllı Rayon İcra Hakimiyyətinin başçısı Mirdaməd Sadıqov deyib.
Məlumat üçün qeyd edək ki, ötən ilin avqust ayında İsmayıllının Diyallı kəndi ərazisində “Isma Bikes” velosiped istehsalı zavodu istifadəyə verilib. Sözügedən zavodun istehsal gücü ildə 20-30 min velosipeddir. Bu da hazırkı şəraitdə normal göstərici hesab olunur. Digər tərəfdən, müəssisə Bolqarıstan, Danimarka, Niderland, Çin və Türkiyə istehsalı olan avadanlıqlarla təchiz edilib. Zəruri infrastrukturu ilə Qafqazda yeganə olan bu zavodun məhsulları yüksək keyfiyyəti ilə seçilir. Bunun nəticəsidir ki, Gürcüstan dağ turizmi üçün on min velosiped sifariş verib. Onu da qeyd edək ki, müəssisənin ərazisində müasir velotrek meydançası da yaradılıb. Üç hektar sahəsi olan velotrekdə idman yarışlarının keçirilməsi üçün hər cür şərait var.
Azərbaycanda velosiped istehsalı ölkədə qeyri-neft sektorunun inkişaf etməsinin bir göstəricisidir. Xarici dövlətlərdən sifarişlər artarsa, bu daha çox velosiped ixrac etməyə imkan verəcək.
Məsələyə münasibət bildirən ekspert Rəsul Cahangirlinin sözlərinə görə, ekoloji cəhətdən ən təmiz nəqliyyat vasitəsi olan velosipedə ölkəmizdə əsasən uşaqlar üçün nəzərdə tutulan əyləncə vasitəsi kimi baxılır: “Halbuki, Avropa ölkələrində nəqliyyat vasitələrindən birinə çevrilmiş velosipedin təkcə sağlamlığa deyil, eyni zamanda cəmiyyətə də xeyri var. Bir sıra Asiya dövlətlərində, məsələn, Vyetnamda, Kambocada, Myanmada, Laosda, Çində və s. ölkələrdə velosiped sürməyin çox populyar olması kasıbçılıqdan irəli gəlsə də, digər ölkələrdə mənzərə fərqlidir. ABŞ-da, Yaponiyada, inkişaf etmiş Avropa ölkələrində də velosiped çoxişlənən minik vasitəsinə çevrilir. Ancaq sözügedən ölkələrdən fərqli olaraq, Azərbaycanda velosipedə əsasən uşaqların əyləncə və ya idman növü vasitəsi kimi baxırlar. Lakin bir çox cəhətlərinə görə velosiped sərfəli və sağlamlıq üçün xeyirli minik vasitəsidir. Ümumən götürəndə Azərbaycanda velosipedə olan maraq kifayət qədər böyükdür. Lakin gənclərin böyük qisminin velosipedi yoxdur. Bunun əsas səbəbi nəqliyyat yollarının əlverişsizliyi, yollarda velosipedçinin təhlükəsizliyinin qorunmamasıdır. Velosipedin nəqliyyat növü kimi geniş yayılması üçün ən vacibi velosiped üçün cığırların olmasıdır. Hesab edirəm ki, Bakıda velosiped üçün infrastruktur lazımi səviyyədə qurulsa, o zaman daxili bazarda istehsal olunan yerli velosipedlərə maraq daha da artacaq. Nəticədə minik vasitəsi olaraq velosiped daha çox ölkə daxilində satılacaq. Düzdür, ölkəyə daha çox valyutanın daxil olması baxımından həmin velosipedlərin dünya bazarına çıxarılması yaxşıdır. Ancaq nəzərə almaq lazımdır ki, bununla bağlı rəqabət yetərincə güclüdür. Xüsusən də keyfiyyəti aşağı, Çin istehsalı olan velosipedlər geniş yayılıb. Bu baxımdan dünya bazarında uğurlu rəqabət aparmaq üçün istehsal olunan velosipedlərin keyfiyyəti daha da artırılmalıdır”.
Vidadi ORDAHALLI
