Bakı Şopinq Festivalı Azərbaycana turist axınına səbəb ola bilər. Trend-in məlumatına görə, bunu Bakı Şopinq Festivalının rəsmi saytına (www.bakushopfest.com) müsahibəsində beynəlxalq media təlimçisi və məsləhətçi Den Meyson deyib.
O bildirib ki, Azərbaycanın milli valyutası olan manatın hazırki məzənnəsi ölkədə əcnəbilər üçün yaxşı şərait yaradır: "Əvvəlki illərdən fərqli olaraq, Azərbaycana səyahət vizası əldə etmək indi daha asandır. Bakı istirahət etmək üçün möhtəşəm şəhərdir. Şəhər həm də təhlükəsizdir. Bu isə çox mühümdür. Bakı Şopinq Festivalı getdikcə böyüyür, festival çərçivəsində həvəsləndirici tədbirlər, o cümlədən “Tax Free” kampaniyası keçirilir. Festival doğru istiqamətdə yol alıb”.
D.Meyson qeyd edib ki, bu möhtəşəm tədbiri mətbuat və sosial media kanalları vasitəsilə dünyaya çatdırmaq lazımdır.
Şopinq Festivalının Azərbaycan üçün əhəmiyyətindən danışan təlimçi qeyd edib ki, festival çərçivəsində Azərbaycanı hərtərəfli dünyaya tanıtmaq vacibdir: “Pərakəndə satış iqtisadiyyata təkan verən mühüm faktordur. Ölkəyə xaricdən nə qədər çox nağd pul vəsaiti daxil olarsa, pərakəndə satışla məşğul olan sahibkarlar üçün də bir o qədər stimul və şərait yaranar. İstərdim ki, festivalda yalnız mağazalar deyil, Azərbaycana xas bütün ən yaxşı xüsusiyyətlər nümayiş olunsun. Məsələn, mən bu il Bakıda keçirilən “Formula 1” yarışlarında nümayiş olunan sənətkarlıq və mədəniyyət nümunələri, o cümlədən Azərbaycan yeməklərindən çox zövq aldım. Niyə bu festivaldan Azərbaycanın özünəxas incəsənəti, sənətkarlığı və regional mətbəxini təbliğ etmək üçün istifadə olunmasın? Çünki festival Azərbaycanı daha yaxşı tanıtmaq üçün əsl fürsətdir – bura ənənə və müasirliyin bir-birinə qovuşduğu ölkədir”.
D.Meyson əlavə edib ki, Şopinq Festivalının keçirilməsi üçün Bakı uğurlu seçimdir: “Mən Dubay, o cümlədən dünyanın bir çox yerlərində keçirilən şopinq festivallarında iştirak etmişəm. Şübhəsiz, belə festivallar keçirildiyi şəhərdə hər zaman əks-səda yaradır. Səyahət etmək getdikcə asanlaşır, buna görə də dinamik şəhərlər turist cəlb etmək üçün yalnız bir səbəblə kifayətlənmək istəmirlər. Bu baxımdan şopinq festivalları ölkəyə beynəlxalq səyahət bazarının daha çox inkişaf etmiş seqmentlərini cəlb etmək üçün ən mükəmməl vasitədir. Bu, həm də şəhərlər arasında rəqabətin artması deməkdir. Xəritədə Bakıya baxsaq, şəhərin həm şərq, həm də qərb ticarət yolunun kəsişməsində yerləşdiyini görə bilərik. Turistlərin cəlbi üçün Bakı mükəmməl coğrafi mövqeyə malikdir. Bütün bunlar şopinq festivalı üçün əsasdır”.
Şopinq festivalları Azərbaycanın iqtisadi inkişafına müsbət təsir göstərəcək
Krinisa şəhərində keçirilən Krinisa İqtisadi Forumunun Proqram Şurasının sədri, forumun ilk təsisçilərindən biri Ziqmunt Berdıçovski əmindir ki, Bakı Şopinq Festival (Baku Shopping Festival) birmənalı olaraq, Azərbaycana turist səfərlərinin artmasına səbəb olacaq. "APA-Economics"in xəbərinə görə, bakushopfest.com saytına müsahibəsində cənab Berdıçovski qeyd edib ki, bu festival sayəsində turist artımı təkcə Azərbaycanda yox, qonşu Gürcüstanda da hiss olunacaq.
Z.Berdıçovski festivalın kiçik və orta sahibkarlığın da inkişafına müsbət təsir göstərəcəyini qeyd edib: “Məhz bu sahələr ölkədəki iqtisadi artımın əsasını təşkil etməli və ümummilli gəlirin formalaşmasında vacib rol oynamalıdırlar”.
Cənab Berdıçovski etiraf edir ki, bu layihənin tam effektli olması üçün zamana ehtiyac var. Misal olaraq, o, hazırda rəhbərlik etdiyi Krinisa İqtisadi Forumunun tarixini göstərib: “1991-ci ildə mən Krinisa İqtisadi Forumunu yaradanda forum cəmi 100 nəfəri toplaya bilirdi. İndi isə forumu dünyanın ən müxtəlif bölgələrindən 4500-ə yaxın iştirakçı ziyarət edir". Amma o, əmindir ki, Bakı Şopinq Festivalının inkişaf etməsi üçün Krinisa forumundan daha az vaxt tələb olunur. İndiyədək Bakıda “Avroviziya” və “Formula-1” kimi mötəbər yarışların yüksək səviyyədə təşkil edildiyini deyən Z.Berdıçovski Azərbaycanı regionda sürətlə inkişaf edən ölkə adlandırıb: ”Bununla yanaşı Azərbaycan başqa mədəniyyətlər, xalqlar, konfessiyalar üçün də açıq, tolerant ölkədir. Bu ölkədə istənilən şəxs özünü təhlükəsizlikdə hiss edir”.
Xatırladaq ki, cənab Berdıçovskinin təsisçisi olduğu Polşanın Krinisa şəhərində keçirilən Krinisa İqtisadi Forumu Davosdan sonra Avropanın ən böyük iqtisadi forumlarından biri hesab edilir. İştirakçılar arasında bir sıra Mərkəzi və Şərqi Avropa ölkələrinin dövlət və hökumət başçıları, beynəlxalq transmilli şirkətlərin rəhbərləri və menecerləri, beynəlxalq aləmdə tanınmış biznesmenlər və ictimai xadimlər olur.
Qeyd edək ki, ilk Bakı Şopinq Festivalı bu ilin 10 aprel – 10 may tarixlərində keçirilib. Prezident İlham Əliyevin 2016-cı il 1 sentyabr tarixli “Azərbaycan Respublikasında turizmin inkişafı ilə bağlı əlavə tədbirlər haqqında” sərəncamına əsasən keçirilən Festivalın təşkilatçısı Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib. Bakı Şopinq Festivalının təşkil olunması ölkə başçısının 2016-cı il 6 dekabr tarixli fərmanı ilə təsdiq edilmiş “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”ndə də öz əksini tapıb.
