Könül Nuriyeva: “Yerli brend mağazaların Şopinq Festivalına qoşulması kiçik sahibkarların gəlirini artıracaq” Eyyub Qarabağlı : “İkinci Şopinq Festivalının aprel ayında keçirilən festivaldan fərqli cəhəti odur ki, insanların alış-veriş dərəcəsi artıq yüksələcək” Azər Əliyev: “Bir neçə gündən sonra keçiriləcək Şopinq Festivalının fərqli cəhəti burada bəzi stimullaşdırıcı tədbirlərin həyata keçirilməsidir”
Bakıda keçiriləcək ikinci Şopinq Festivalına sayılı günlər qalıb. Budəfəki festivala 400-dən artıq ticarət obyekti qoşulacaq. Birinci festivalda tərəfdaş qismində çıxış edən müəssisələrin sayı 33 idisə, indi həmin say 111-dir. Bu da üç dəfə artım deməkdir.
Bəllidir ki, ötən il paytaxt ərazisində keçirilən Şopinq Festivalında ƏDV-ni cəmi 72 şirkət qaytarıb. İndi isə 467 müəssisənin əlavə dəyər vergisini qaytarması nəzərdə tutulur. Festivala ümumilikdə 578 müəssisə qatılacaq.
Noyabrın 15-dək davam edəcək festival çərçivəsində müştərilər dünya brendlərinə məxsus geyim, elektronika, məişət texnikası, mebel, ətriyyat və kosmetika, eləcə də digər məhsulları Bakıda yerləşən mağazalardan xüsusi kampaniya və endirimlərlə əldə edə biləcəklər.
Budəfəki festivalda bir çox yeniliklər gözlənir. Festival çərçivəsində xüsusi mükafatlar təsis ediləcək. Bu da alış-verişin əhəmiyyətini artıracaq. İlk dəfə olaraq supermarketlər də festivala qoşulmağa qərar veriblər. Amma endirimlər qida məhsullarına şamil edilməyəcək. Bundan əlavə, bir sıra apteklər də festivalda iştirak edəcək. Növbəti ildə turistlər üçün xüsusi imtiyaz kartının tətbiq olunması gözlənir.
Ekspertlər bildirirlər, ikinci Şopinq Festivalının keçirilməsi turizm sektoruna deyil, eyni zamanda, ölkə iqtisadiyyatına da müsbət təsir edəcək.
İqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, bir sıra ölkələrdə şopinq festivalları keçirilir. Bu cür festivalların keçirilməsi ilk növbədə ölkənin tanıdılmasında mühüm rol oynayır. Həmçinin, turistlərin cəlb olunması baxımından olduqca vacibdir: “Bəllidir ki, hazırkı şəraitdə neft gəlirləri azalıb. Belə olan şəraitdə turizm sahəsinin qeyri-neft sektorunda əhəmiyyəti daha çoxdur. “Strateji Yol Xəritəsi”ndə də turizmin inkişafına dair proqram var. Və həmin proqramda şopinq festivallarından danışılır”. Həmsöhbətimizin sözlərinə görə, artıq ikinci dəfədir paytaxt Bakl Şopinq Festivalına evsahibliyi edəcək: “Ötən il keçirilən festival bir çox elementləri ilə yadda qaldı. Onu da unutmaq lazım deyil ki, ilk dəfə keçirilən festivalda, təbii ki, nöqsanlar olacaq. Ancaq bu il həmin nöqsanların aradan qaldırılması üçün bütün tədbirlər görülüb. Daha mükəmməl və təcrübəli şəkildə Şopinq Festivalı bir ay müddətində keçiriləcək.
Yerli brend mağazaların da Şopinq Festivalına qoşulması sevindiricidir. Sahibkarlar rahat şəkildə öz brendlərini təqdim edəcəklər və onların gəlirlərində artım müşahidə oluna bilər”.
K.Nuriyeva onu da bildirdi ki, festivalın keçirilməsində əsas məqsəd ölkəyə daha çox turist cəlb etməkdir. Kütləvi turizm inkişaf etdikcə, ölkəyə daha çox valyuta axını cəlb olunur. Təşkil olunan Şopinq Festival Qafqazda və Orta Asiyada ilk dəfə Azərbaycanda keçirilib. Yəni belə demək olarsa, təcrübə ilk dəfə Azərbaycanda sınaqdan keçirilir. Bu isə nəinki Qafqaz ölkələri, hətta fars körfəzi ölkələrində də ölkəmizə marağın yaranmasına gətirib çıxardı. Birinci dəfə keçirilən Şopinq Festivalda bunun şahidi olduq: “Dünya Turizm Təşkilatı öz saytında dünyada keçirilən bu festivalların ölkənin turizm gəlirlərini 30 faizə qədər artıra biləcəyini qeyd edir. Təşkilat, həmçinin, sözügedən ölkələrin problemləri və inkişaf perspektivləri ilə də maraqlanır. Bu mənada hesab edirəm ki, belə bir festivalın ölkəmizdə keçirilməsi yüksək qiymətləndirilməlidir. Əgər bunu yaxşı təşkil edə bilsək, daha çox gəlir əldə etmiş olarıq.
Biz bu il Şopinq Festivalında daha yüksək nəticə gözləyirik. Ötən ilin təcrübəsindən yararlanıb daha yüksək nəticə əldə edə bilərik. Şopinq Festivalı ilə bağlı gələn turistlərin bizdən razı qalması üçün elə bir sistem təşkil etməliyik ki, turistlər məmnum şəkildə geri qayıtsınlar. Onlara keyfiyyətli xidmət göstərilməlidir ki, növbəti illər ərzində də əcnəbilər Azərbaycana gəlsinlər”.
K.Nuriyeva xüsusi olaraq vurğuladı ki, yeni dükanların Şopinq Festivalına qoşulması turizm gəlirinin artmasına səbəb ola bilər.
Marketoloq Eyyub Qarabağlı qəzetimizə açıqlamasında qeyd etdi ki, Şopinq Festivalının paytaxt ərazisində keçirilməsi ölkə üçün olduqca vacibdir: “Bəllidir ki, bir sıra dünya ölkələrində bu cür festivallar keçirilir. Türkiyə və digər ölkələrdə də şopinq festivalları keçirilir. Şopinq festivallarının əsas məğzi alış-veriş sevənlərin bu festivaldan yararlanmasıdır. İkinci Şopinq Festivalının aprel ayında keçirilən festivaldan fərqli cəhəti odur ki, insanların alış-veriş dərəcəsi artıq yüksələcək. Həmçinin, bu tipli şopinq festivalları və ya beynəlxalq əhəmiyyətli tədbirlər ölkə iqtisadiyyatına müsbət təsir edəcək”.
Turizm sahəsiz üzrə ekspert Azər Əliyev bizimlə söhbətində bildirdi ki, bir çox ölkələrdə şopinq festivalları keçirilir. Bu cür tədbirlər şopinq həvəskarlarının Azərbaycana gəlməsinə səbəb olur. Hər bir ölkədə keçirilən bu tip festivallar ölkənin tanıdılması baxımından olduqca vacibdir: “Bir neçə gündən sonra keçiriləcək Şopinq Festivalı ötən festivaldan fərqli olacaq. Fərqli cəhət burada bəzi stimullaşdırıcı tədbirlərin həyata keçirilməsidir. Həmin tədbirlər sayəsində ölkəyə gələcək turistlərin sayı aprel ayında gələnlərdən qat-qat çox olacaq. Biz bunu təxminən 10-15 gündən sonra müşahidə edəcəyik. Festivaldan əldə olunan gəlirin bu il daha artıq olması gözlənir. Çünki bu dəfə festivalda iştirak edən ticarət obyektlərinin sayı daha artıqdır”.
Günel CƏLİLOVA
