Aydın Hüseynov: “Kənd təsərrüfatının müasir texniki vasitələrlə təmin olunması böyük bir inkişaf mərhələsinin bərqərar olunması deməkdir”
“Bu il kənd təsərrüfatı texnikasının alınması ilə bağlı rekord il olub. Mənə müşavirədən əvvəl verilən məlumata görə, bu il artıq 8 min texnika gətirilib. Biz bu il 10 min texnika gətirməli idik. Yəqin ki, qalan texnika da ilin sonuna qədər gətiriləcək. Deməliyəm ki, mən indi bölgələrdə olarkən texnika ilə bağlı heç bir şikayət, yaxud da əlavə təklif yoxdur. Biz, demək olar ki, bu məsələni də həll etmişik. Əlbəttə ki, bəzi kənd təsərrüfatı sahələrinin inkişafı üçün xüsusi texnikanın alınması davam etdirilməlidir və biz bunu edəcəyik. Amma, prinsipcə, hesab edirəm ki, biz bu problemi də köklü şəkildə həll etmişik”.
Bu barədə Prezident İlham Əliyev Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Ölkənin kənd təsərrüfatı texnikası ilə təmin olunması aqrar sahənin inkişafına necə təsir göstərəcək?
Millət vəkili Aydın Hüseynov “Bakı-Xəbər”ə açıqlamasında qeyd etdi ki, bu gün bölgələrdə çox geniş aqroparklar yaradılır: “Yaradılan aqroparkların, demək olar ki, əksəriyyəti müasir texnologiya ilə təmin olunub. Maşın mexanizmləri və bir çox aqrar sahədə istifadə olunan texniki vasitələr müasir standartlara cavab verir. Müasir maşın mexanizmləri məhsuldarlığın artmasına və keyfiyyətin yüksək səviyyədə olmasına səbəb olur”.
A.Hüseynov onu da vurğuladı ki, qarşıya qoyulan məqsədlərdən biri də qeyri-neft sektorunun kənd təsərrüfatı sahəsinin inkişaf etdirilməsidir. Aqrar sahənin inkişafı ilk növbədə texniki vasitələrin müasir standartlara cavab verməsidir: “Ölkə başçısı İlham Əliyev öz çıxışında bildirib ki, il ərzində 8 min texnika gətirilib və 2 min texnikanın da ilin sonuna qədər gətiriləcəyi artıq nəzərdə tutulub. Bu isə özlüyündə kənd təsərrüfatının inkişafına böyük təkan verir. Bəllidir ki, kənd təsərrüfatının inkişafı məhsuldarlığın artmasına, iqtisadiyyatın daha da inkişaf etməsinə səbəb olacaq. Bir sözlə, kənd təsərrüfatının müasir texniki vasitələrlə təmin olunması böyük bir inkişaf mərhələsinin bərqərar olunması deməkdir”.
Ekspert şərhi də təsdiqləyir ki, kənd təsərrüfatının davamlı inkişafı üçün zəruri olan elementi cənab Prezident təmin edib, yəni kifayət qədər aqrotexnika alınıb. İndi söz Kənd Təsərrüfatı Nazirliyinin və fermerlərindir. Buyurub cənab Prezidentin sektora etdiyi yatırımın əvəzini böyük məhsuldarlıqlara nail olmaq formasında geri qaytarsınlar.
Günel CƏLİLOVA
