Vüqar Bayramov: “Sahibkarlar logistik mərkəzlərin xidmətlərindən istifadə etməklə daha çox məhsulun bazara çıxarılmasını təmin edəcəklər”
“Bölgələrdə logistik mərkəzlərin tikintisinə başlanıbdır. Biz, əslində, artıq neçə ildir ki, soyuducu anbarlar, taxıl anbarları, logistika ilə bağlı digər məsələləri uğurla həll edirik. Demək olar ki, bütün bölgələrdə bu məsələlər öz həllini tapıbdır. İndi vaxt gəlib ki, böyük ixraca hesablanmış logistik mərkəzlərin yaradılması təmin edilsin.
Çünki biz əvvəlki dövrlərdə bu işləri daha çox məhsulun xarab olmaması, saxlanması və daxili tələbatın təmin edilməsi üçün görürdük. Ancaq bizim ixrac imkanlarımız artacaq və belə olan halda, mütləq böyük logistik mərkəzlər tikilməlidir”.
Bu sözləri Prezident İlham Əliyev Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında deyib.
“Onlardan birini mən Şəmkir rayonunda olarkən görmüşəm. Əslində, o logistik mərkəzin də təməlini qoymuşam. İndi deyə bilərəm ki, bu bölgədə ən böyük logistik mərkəz yaradılıbdır. Hesab edirəm ki, bundan sonra bizə ən azı üç böyük logistik mərkəz lazımdır - Mərkəzi Aran, şimal və cənub zonalarında. Mən sahibkarları da bu işlərə dəvət edirəm. Dövlət öz dəstəyini verəcək, kreditlər ayıracaq, bütün lazımi infrastruktur təşkil ediləcək. Çünki bu bizim böyük ixrac potensialımızın inkişafı üçün mütləq lazım olacaq”.
Logistik mərkəzlərin faydası barədə danışan iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, belə mərkəzlərin olması ixrac olunan məhsulun xarici bazara çıxarılması baxımından vacibdir. Həmçinin, daxili bazarda da məhsulların bazara çıxarılması baxımından logistik mərkəzlərin olmasına ehtiyac var: “Daha çox xarici bazara çıxış imkanının genişləndirilməsi baxımından logistik mərkəzlərin olması vacibdir. Logistik mərkəzlər qeyri-neft sektoru sahəsində istehsal olunan məhsulların xaricə çıxarılması baxımından vacibdir. Bu səbəbdən də logistik mərkəzlərin olması qeyri-neft sektorunun inkişafını stimullaşdırır. Bu imkan verəcək ki, sahibkarlar logistik mərkəzlərin xidmətlərindən istifadə etməklə daha çox məhsulun bazara çıxarılmasını təmin etsinlər. Belə olan halda, istehsal olunan məhsulların dünya bazarına və ya qeyri-bazarlara çıxış imkanı artırılacaq”.
Həmsöhbətimiz onu da vurğuladı ki, logistik mərkəzlərin olması qeyri-neft sektorunun inkişafı baxımından çox kreativdir: “Bu birmənalı şəkildə qeyri-neft sektorunun inkişafını stimullaşdıran fəaliyyətə aid olunur. Adıçəkilən mərkəzlərin yaradılması Azərbaycanın potensialını daha da artıracaq və yerli məhsulların rahat şəkildə dünya bazarına çıxarılmasına şərait yaradacaq”.
Günel CƏLİLOVA
