Ruslan Atakişiyev: “Bu və digər səbəblər üzündən sözügedən kreditlərin verilməsində gecikmə yaranır”
“Hələ də Sahibkarlığa Kömək Milli Fondunun sərəncamında kifayət qədər vəsait - bölüşdürülməmiş, yaxud da ki, bölüşdürülmüş, ancaq verilməmiş kreditlər var”. Bunu Prezident İlham Əliyev Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxışı zamanı deyib.
Dövlət başçısının sözlərinə görə, ilin sonuna üç aydan az vaxt qaldığı üçün, bu müddət ərzində Dövlət İnvestisiya Proqramında nəzərdə tutulmuş bütün məsələlər öz həllini tapmalıdır: “Bu il Dövlət İnvestisiya Proqramı lazımi səviyyədə təmin edilir, kifayət qədər vəsait nəzərdə tutulmuşdur. Nəzərdə tutulmuş bütün məsələlər ilin sonuna qədər öz həllini tapmalıdır. Maliyyə məsələləri ilə bağlı heç bir problem yoxdur. Büdcə göstəriciləri yaxşıdır, tam icra edilir. Ona görə investisiya proqramının icrası əlbəttə ki, təmin ediləcəkdir. Mən buna şübhə etmirəm”.
Dövlət başçısının açıqlamasından o da məlum olub ki, sahibkarlığın inkişafı üçün bir çox işlər görülür: “Onların arasında güzəştli kreditlərin verilməsi də var. Artıq uzun illərdir ki, bu proses davam edir. Hazırda sahibkarlara verilən güzəştli kreditlərin, demək olar ki, tam həcmi əvvəllər verilmiş və qaytarılmış kreditlər hesabına təşkil edilir. Bu il kifayət qədər böyük proqram nəzərdə tutulmuşdur. Mənə məruzə edilib. Bu proqramın böyük hissəsi icra edilmişdir. Amma hələ də Sahibkarlığa Kömək Milli Fondunun sərəncamında kifayət qədər vəsait - bölüşdürülməmiş, yaxud da ki, bölüşdürülmüş, ancaq verilməmiş kreditlər var. Çalışmaq lazımdır ki, ilin sonuna qədər nəzərdə tutulmuş kreditləşmə tam həcmdə təmin edilsin”.
Maraqlıdır, həmin kreditlər niyə verilmir?
Sözügedən məsələyə aydınlıq gətirən İqtisadi Resursların Öyrənilməsi Mərkəzinin direktoru Ruslan Atakişiyev bunu müxtəlif amillərlə əlaqələndirdi: “Sahibkarlığa Kömək Milli Fondu tərəfindən sahibkarlara kreditlər müxbir banklar tərəfindən verilir. Bu da tələb edir ki, müxbir banklar sahibkarlar tərəfindən edilən müraciətlərə baxsınlar və onun əsasında qiymətləndirmə aparıb vəsait ayırsınlar. Xüsusən də bu sahədə əsas tapşırıq ondan ibarətdir ki, regionlara üstünlük verilsin. Regionlarda kredit verilən zaman girov məsələsi, biznes-kredit planının hazırlanması və digər məsələlər xeyli vaxt aparır. Bu da müəyyən yubanmalara səbəb olur. Digər tərəfdən, bəzən görürsən ki, regionlarda sahibkarlar bu minvalla faizə kredit götürmək əvəzinə, başqa alternativ mənbələrə müraciət etməyi üstün tuturlar. Çünki bu heç də o demək deyil ki, faizlə verilən kreditlər hər zaman rentabelliyin təmin olunmasına gətirib çıxarır. Kredit, faiz məhsulun maya dəyərinə oturduğuna görə bəzən sahibkarlar bundan çəkinir. Bu və digər səbəblər üzündən sözügedən kreditlərin verilməsində gecikmə yaranır. Hesab edirəm ki, bütün bunları aradan qaldırmaq üçün kredit şərtləri bir az da əlverişli olmalıdır”.
Vidadi ORDAHALLI
