Fikrət Yusifov: “Nə qədər çox investisiya təşviqi sənədi veriləcəksə, Azərbaycan iqtisadiyyatına daha çox yatırımlar ediləcək” Pərviz Heydərov: “Ölkədə istehsal olunan qeyri-neft məhsulları ixracını həm kəmiyyət, həm də çeşid baxımından genişləndirmək istiqamətində həyata keçirilən tədbirlər keçən ildən etibarən daha da sürətləndirilib”
Prezident İlham Əliyevin sədrliyi ilə Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilib. İclasda bir sıra məsələlərə toxunulub.
Qeyd olunub ki, ilin doqquz ayında da ölkədə iqtisadi islahatlarla bağlı ciddi addımlar atılıb, sahibkarlara hərtərəfli şərait yaradılıb, strateji yol xəritələrinin icrası təmin edilib, investisiya təşviqi mexanizmi işə düşüb. İndiyədək 200-dən artıq investisiya təşviqi sənədi verilib ki, bunun da nəticəsində Azərbaycana özəl sektor tərəfindən 1,7 milyard manat sərmayə cəlb edilib. Dövlət başçısı xüsusi vurğulayıb ki, bu il Azərbaycan tarixində çox ciddi iqtisadi islahatlar ili kimi qalacaq.
İxracın təşviqi mexanizminin işə düşməsi Azərbaycana nə verəcək? Mövzu ilə bağlı mütəxəssislərə müraciət etdik.
"Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, ötən dövr ərzində 200-dən artıq investisiya sənədi sahibkarlara verilib. Nəticə etibarilə yatırılan investisiyaların ümumi həcmi 1,7 milyard manat təşkil edir: “Bu rəqəm bir daha sübut edir ki, investisiya təşviqi mexanizminin tətbiqi iş adamları və ya sahibkarlarda hər hansı bir iş qurmaq marağının artmasına səbəb olur. Burada maraq investisiya təşviqi sənədinin verdiyi güzəştlərdən ibarətdir. Sahibkar çalışır ki, yatırımlar etdiyi üçün müəyyən qədər ona güzəşt sənədi verilsin. Güzəştlərdə təşviq sənədi verilir.Yaxın gələcəkdə bu tipli sənədlərin verilməsinin çox olacağı istisna deyil. Nə qədər çox investisiya təşviqi sənədi veriləcəksə, Azərbaycan iqtisadiyyatına daha çox yatırımlar ediləcək. Bizim məqsədimiz iqtisadiyyatın qeyri-neft sektoruna daha çox investisiya cəlb etməkdir. Söhbət yerli və xarici investisiyaların cəlb olunmasından gedir. Mexanizmin özü qeyri-neft sektorunun inkişafı istiqamətində çox ciddi adıımların atılmasına səbəb olacaq”.
İqtisadiyyat Nazirliyinin İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov bizimlə söhbətində bildirdi ki, son vaxtlar qeyri-neft sektorunun inkişafı ilə bağlı həyata keçirilən müvafiq dövlət proqramları və görülən işlər nəticəsində sözügedən sektorun davamlı inkişafı, sahibkarlıq mühitinin yaxşılaşması, investisiyaların artması, yeni müəssisələrin və iş yerlərinin açılması istiqamətində böyük nailiyyətlər əldə olunmaqdadır: “Məlumdur ki, ölkədə istehsal olunan qeyri-neft məhsulları ixracını həm kəmiyyət, həm də çeşid baxımından genişləndirmək istiqamətində həyata keçirilən tədbirlər keçən ildən etibarən daha da sürətləndirilib. Belə ki, Prezident tərəfindən bir sıra mühüm dövlət sənədlərinin imzalanması ilə hökumətə verilən müvafiq tapşırıqlar sayəsində stimullaşdırıcı tədbirlər dövlət siyasətinə çevrildi. Məsələn, qeyri-neft məhsullarının ixracının stimullaşdırılması ilə bağlı əlavə tədbirlər haqda 2016-cı il yanvarın 18-də imzalanan sərəncamda hökumətə kənd təsərrüfatı və emalı məhsullarına ixracla bağlı geri ödəniş dəstəyi vermək, xarici ölkələrə ixrac missiyaları təşkil etmək, xarici bazarları araşdırmaq və marketinq fəaliyyəti, “Made in Azerbaijan” brendini xarici bazarlarda təşviq etmək, yerli şirkətlərin ixracla bağlı xarici ölkələrdə sertifikat və patentlər alması, ixracla əlaqəli tədqiqat-inkişaf proqramına və layihələrə çəkilən xərclərin dövlət büdcəsi hesabına ödənilən hissəsinə dair mexanizmlər hazırlamaq haqda göstərişlər verildi.
2016-cı il martın 1-də isə qeyri-neft məhsullarının ixracının təşviqi ilə bağlı əlavə tədbirlər haqda sənəd də imzalandı. Bu sənədlə isə 2016-2020-ci illər ərzində Azərbaycanda istehsal olunan qeyri-neft məhsullarının ixracı ilə məşğul şəxslərə dövlət büdcəsindən xüsusi ixrac təşviqi rüsumunun ödənilməsi qaydası müəyyən edildi.
Bunlar hamısı stimullaşdırıcı əhəmiyyətli tədbirlərdir. Məqsəd isə iqtisadiyyatın qeyri-neft sektoruna investisiya cəlb etmək idi. Prezidentin də qeyd etdiyi kimi, nəticədə 200-dən çox investisiya təşviqi sənədinin verilməsi böyük nailiyyətdir. Bu yeni iş yerlərinin açılacağı, iqtisadi artım, ixracın genişlənəcəyi, yeni valyuta gəlirləri deməkdir. Bəli, biz buna çoxdan keçməli idik.
Ümumiyyətlə, bu mövzuda şərhlərimdə də qeyd etmişəm ki, ölkənin postneft dövrünə gözlənildiyindən daha tez daxil olması səbəbindən iqtisadiyyatın yeni ixrac imkanlarının araşdırılması və bu sahədə mövcud potensialdan tam istifadə edilməsi məqsədilə, birincisi, “Made in Azerbaijan” brendinin xarici bazarlarda təşviqi və ixrac missiyalarının təşkili olmaqla, ikincisi, “azexport.az” internet portalının yaradılması, üçüncüsü isə ölkənin xaricdəki səfirlik və konsulluqlarında ticarət nümayəndəliklərinin təsis və təyin edilməsi ilə çox böyük işlər görülüb və mühüm addımlar atılmağa başlanıb. Azərbaycanın çox böyük ixrac potensialı var, sadəcə, bunu reallaşdırmaq lazımdır. Sevindirici haldır ki, bu sahədə əldə olunan ilkin nəticələr də uğurludur”.
Günel CƏLİLOVA
