Qulu İsmayılov: “Təhlillər göstərir ki, Azərbaycanı yaxın gələcəkdə daha böyük inkişaf gözləyir”
Prezident İlham Əliyev Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında Azərbaycanın əldə etdiyi uğurlardan geniş söz açıb.
İlham Əliyev bildirib ki, digər vacib olan sahələrdə də yaxşı nəticələr var: “Bakı-Tbilisi-Qars dəmir yolunun tikintisi, demək olar ki, başa çatıb. Yaxın vaxtlarda bu yolun rəsmi açılışı nəzərdə tutulur. Bu da tarixi layihədir. Yəni Azərbaycanın iştirak etdiyi və bir çox hallarda təşəbbüskarı olduğu layihələr qlobal xarakter daşıyır. Onların əsas məqsədi və mahiyyəti ondan ibarətdir ki, bu layihələr, bu kontraktlar ölkəmizi gücləndirir. Azərbaycanın qüdrəti, iqtisadi potensialı, siyasi çəkisi, regional müstəvidə rolu artır və bu kontraktlar bizə böyük iqtisadi mənfəət, səmərə verir. Təsəvvür etmək mümkün deyil ki, əgər “Əsrin kontraktı” imzalanmasa idi, biz indi hansı vəsaitlə bütün bu abadlıq-quruculuq işlərini görə bilərdik. Düzdür, bu gün əsas məqsədimiz qeyri-neft sektorunun inkişafıdır və biz əsas gücü bu istiqamətə yönəldirik. Ancaq onu da hamımız bilməliyik ki, əgər neft gəlirlərindən səmərəli şəkildə istifadə etməsəydik, Neft Fondunda böyük vəsaiti yığmasaydıq, infrastruktur layihələrinə və digər layihələrə yönəltməsəydik, əlbəttə, bizim indiki vəziyyətimiz kəskin şəkildə fərqlənə bilərdi.
Biz bütün bu işləri düşünülmüş şəkildə görmüşük, neftdən və qazdan gələn gəlirlər insan kapitalına yönəldilib, infrastruktur layihələrinin icrasına, özəl sektorun inkişafına istiqamətləndirilib. Eyni zamanda, bu layihələr ölkəmizin beynəlxalq arenadakı rolunu, çəkisini artırır. Bu gün bizim iştirakımız olmadan bu regionda heç bir layihə, hətta heç bir siyasi təşəbbüs reallaşa bilməz. Azərbaycan bu gün dünya miqyasında özünü güclü dövlət kimi təsdiqləyib. Əlbəttə ki, bu bizim hamımızı çox sevindirir. Növbəti illərdə ölkəmizin qüdrəti daha da artacaq”.
Göründüyü kimi, ölkə başçısı qeyd edib ki, Azərbaycanın iştirakı olmadan regionda heç bir layihə, hətta siyasi təşəbbüs reallaşa bilməz. Azərbaycan bu cür təsirli mövqeyə nə ilə nail olmağı bacarıb?
Ekspert Qulu İsmayılov qəzetimizə bildirdi ki, Azərbaycanın bu cür təsiredici mövqeyə sahib olması ilə bağlı izahatın ən gözəlini elə Prezident özü çıxışında verdi: “Prezidentin çıxışı çox əhatəli və konkret rəqəmlərə söykənirdi. Bu səbəbdən də əldə olunan uğurlarla bağlı aydın təsəvvür asanlıqla formalaşa bilər. Mən həmin rəqəmləri təkralamaq istəmirəm. Çünki ölkə başçısı bu haqda ətraflı danışıb. Qısa olaraq onu deyə bilərəm ki, bu mövqeyə Azərbaycan düzgün rəhbərliyin edilməsi sahəsində çata bilib. Strategiyanın doğru müəyyənləşməsi, hədəfə doğru inamla addımlamaq, heç bir təzyiqdən qorxmamaq, əldə olunan gəlirlərdən səmərəli və qənaətlə istifadə və s. kimi amillərə əməl olunması bizi belə söz sahibi edib. Bu gün biz tam əminliklə deyə bilırik ki, ölkəmiz regionun lider ölkəsidir. Bəli, bizim iştirakımız olmadan heş bir layihə reallaşa bilməz. Siz regionu əhatə edən ən böyük layihələrə diqqət edin. Əksəriyyətinin təşəbbüskarı bizik. Ermənistan yürütdüyü siyasət ucbatından kənarda qalıb və bu gün acından ölür. Belə iqtisadi qüdrətə sahib olmağımız bizim siyasi çəkimizi də artırır. Təhlillər göstərir ki, Azərbaycanı yaxın gələcəkdə daha böyük inkişaf gözləyir. Cünki iqtisadiyyatımızla bağlı biz doğru strategiya müəyyən etmişik”.
Məhəmmədəli QƏRİBLİ
