Rəsul Cahangirli: “Bütün bunlar prioritet inkişaf istiqamətləridir”
Məlum olduğu kimi, Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxış edən Prezident İlham Əliyev bir sıra məsələlərə toxunub. Ölkə başçısı qeyd edib ki, ötən 9 ayda qeyri-neft sektorunun sənaye hissəsində artım 3,1 faiz, kənd təsərrüfatında 2,8 faiz təşkil edib, xarici ticarət dövriyyəsi 7 faiz artıb.
Ölkə başçısının çıxışından o da məlum olub ki, bu ilin doqquz ayında ölkənin neft-qaz sektorunda əlamətdar hadisələr baş verib. Ötən ay "Azəri", "Çıraq" və "Günəşli" yataqları üzrə yeni Saziş imzalanıb, "Cənub Qaz Dəhlizi" layihəsi ilə bağlı işlər də uğurla gedir. Əsas məqsədin qeyri-neft sektorunun inkişafı olduğunu deyən dövlət başçısı neftdən gələn gəlirlərin insan kapitalının inkişafına yönəldiyini diqqətə çatdırıb.
Yaxın vaxtlarda Bakı-Tiflis-Qars dəmir yolunun rəsmi açılışının olacağını deyən Prezident İlham Əliyev bildirib ki, Azərbaycanın iştirak etdiyi və bir çox hallarda təşəbbüskarı olduğu layihələr qlobal xarakter daşıyır və dünyada ölkəmizin mövqeyinin daha da güclənməsinə töhfə verir.
Bütün bu deyilənlərlə yanaşı, Prezidentin çıxışından belə qənaət hasil oldu ki, yaxın dövr üçün ölkənın perspektiv iqtisadi inkişaf planı əsasən aşağıdaki sahələrin inkişafı hesabına təmin ediləcək. Bunlar sənayenin, kənd təsərrüfatının inkişaf etdirilməsi, Bakı-Tiflis-Qars dəmir yolunun işə salınması, "Cənub Qaz Dəhlizi" layihəsinin başa çatdırılması və "Azəri", "Çıraq" və "Günəşli" yataqları üzrə imzalanan yeni sazişdən irəli gələn işlərin görülməsidir. Ölkənin iqtisadi inkişafını özündə ehtiva edən sözügedən strateji istiqaməti ekspertlər necə dəyərləndirir?
Məsələyə münasibət bildirən ekspert Rəsul Cahangirlinin sözlərinə görə, bütün bunlar çox uğurlu prioritet inkişaf istiqamətləridir: “Ölkə iqtisadiyyatının inkişafı ilə bağlı sənayenin dirçəldilməsi prioritet olaraq qarşıya məqsəd qoyulub. Söhbət əsasən qeyri-neft sənayesinin inkişaf etdirilməsindən gedir. Belə ki, bu istiqamətdə bir sıra işlər görülür. Bununla bağlı sənaye parkları, sənaye məhəllələri tikilir. Eyni zamanda, kənd təsərrüfatı məhsullarına olan tələbatın əsas hissəsinin daxili istehsal hesabına təmin olunması istiqamətində ölkədə kompleks tədbirlər görülür. Çox güman ki, yaxın bir neçə il ərzində bu sahədə ciddi dönüş əldə olunacaq. Bununla yanaşı, Bakı-Tiflis-Qars dəmir yolunun istismara verilməsi ölkəyə gətirilən bir sıra idxal məhsullarının dəyərini aşağı salacaq. Azərbaycanın ixrac imkanlarını daha da yaxşılaşdıracaq. Ən başlıcası isə, Azərbaycanın tranzit ölkə olaraq rolu artacaq və yük daşımalarından ölkəyə valyuta gəlirləri daxil olacaq. "Cənub Qaz Dəhlizi" layihəsi işə düşdükdən sonra Azərbaycan qazı Avropa bazarına çıxarılacaq. Bu da yeni valyuta gəlirlərinin ölkəyə daxil olmasına gətirib çıxaracaq. Ən nəhayət, "Azəri", "Çıraq" və "Günəşli" yataqları üzrə işlərin davam etdirilməsi ölkədə dinamik iqtisadi inkişafın təmin olunmasında mühüm rol oynayacaq. O baxımdan sözügedən sahələrdə işlərin görülməsi yaxın perspektivdə ölkədə iqtisadi sıçrayışın olacağından xəbər verir”.
Vidadi ORDAHALLI
