Taleh Ələkbərov: “Yerli turistlərin Türkiyəni seçməsi səbəblərindən biri də adıçəkilən ölkədə çimərlik turizminin inkişaf etməsidir”
Bu il Azərbaycandan Türkiyəyə gedən turistlərin sayında böyük artım müşahidə edilir. Türkiyə mediasının yaydığı məlumata əsasən, ötən ilin 8 ayı ilə müqayisədə bu ilin eyni dövründə qardaş ölkəyə gedən vətəndaşlarımızın sayında 28 % artım olub.
Hesabat dövründə Qərbi Avropa ölkələrindən Türkiyəyə səfər edənlərin sayında azalma baş versə də, ümumilikdə MDB ölkələrindən səfər edən turistlərin sayı artıb.
Türkiyəyə gələn turistlərin sayında artıma görə siyahıya Rusiya liderlik edir. Belə ki, bu ilin 8 ayı ərzində Rusiyadan Türkiyəyə səfər edən turistlərin sayı 9,9 dəfə artıb. Daha sonra siyahıda 2,25 dəfə artımla Belarus, 74 %-lə Qazaxıstan, 47 %-lə Tacikistan, 28 %-lə Azərbaycan və 23 %-lə Ukrayna gəlir.
Azərbaycan vətəndaşlarının istirahət üçün niyə məhz Türkiyəni seçməsi səbəblərini araşdırmaq məqsədilə ekspertlərə müraciət etdik.
Turizm sahəsi üzrə ekspert Taleh Ələkbərov bizimlə söhbətində qeyd etdi ki, azərbaycanlı turistlər dincəlmək üçün ən çox Türkiyəyə gedirlər: “Azərbaycanda indiyədək getmə turizm sahəsində hələ bu qədər axın qeydə alınmayıb, Türkiyəyə bu dərəcədə çox turist getməyib. Ötən il, ondan əvvəlki illərdə Türkiyəyə gedənlərin sayı bir qədər azalmışdı”.
Həmsöhbətimizin sözlərinə görə, Türkiyənin istirahət mərkəzlərinə tələbat daha çoxdur. Bunun müxtəlif səbəbləri var: “İlk növbədə bildirim ki, Türkiyədə siyasi sabitlikdir. Bu məqama bizim ölkəmizə gələn turistlər də fikir verirlər. Azərbaycanda olan sabitlik, sakitlik turist axınına səbəb olur. Bundan başqa, ölkə seçimində göstərilən xidmətin də rolu böyükdür. Məsələn, şirkətlərin ilk tövsiyə etdikləri ölkə Türkiyə olur. Daha sonra Gürcüstan, Rusiya, Ukraynanın müalicəvi istirahət zonalarını, xüsusilə də Qara dəniz sahillərində olan ölkələri məsləhət görürlər”.
T.Ələkbərov onu da vurğuladı ki, insanların Avropadan daha çox Türkiyəyə getməsinə səbəb olan amillərdən biri də avro və lirə arasındakı fərqdir: “Avronun bahalaşması, gediş haqqının yuxarı olması Avropaya gedənlərin sayını azaldır. Belə olan halda, istirahət üçün Türkiyəni seçənlərin sayı artır.
Yerli turistlərin Türkiyəni seçməsi səbəblərindən biri də adıçəkilən ölkədə çimərlik turizminin inkişaf etməsidir: “Məsələn, Azərbaycanda çimərlik vaxtı 3 ay davam edir. Amma Türkiyədə, Aralıq dənizi sahillərində 7-8 ay davam edir. Bu baxımdan deyə bilərəm ki, çimərlik turizmini sevən vətəndaşlarımız həmin ölkəyə üz tuturlar”
Günel CƏLİLOVA
