Əkrəm Həsənov: “…bank sahəsində qeydə alınan istənilən korrupsiya faktını yerindəcə aşkar edib və lazımi tədbirlər görülüb”
“Azərbaycanda banklardan şikayətlər artıb”. Bunu Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev jurnalistlərə açıqlamasında deyib. O qeyd edib ki, hazırda idarənin icraatında 118 cinayət işi istintaq olunur.
Bu il Azərbaycanda 215 vəzifəli şəxs barəsində 155 cinayət işi baxılması üçün məhkəmələrə göndərilib. “Mənzil-tikinti sahəsində, bank, bank olmayan kredit təşkilatlarının vəzifəli şəxsləri barəsində cinayət işləri istintaq olunur” – idarə rəisi bildirib.
Bank sahəsi üzrə ekspert Əkrəm Həsənov mövzu ilə bağlı “Bakı-Xəbər”ə açıqlamasında bunları qeyd etdi: “Əsasən şikayətlər kreditlərin verilməsi zamanı aşkar olunan korrupsiya faktları ilə bağlıdır. Bəllidir ki, banklar 3 əməliyyat növünü həyata keçirir. Əmanətlərin qəbulu, pul köçürülmələrinin həyata keçirilməsi və kreditlərin verilməsi. Aydındır ki, əmanətlərin qəbulu və pul köçürmələrində ciddi korrupsiya faktları o dərəcədə də aşkar olunmur. Ancaq kreditlərin verilməsində isə vəziyyət acınacaqlıdır. Ola bilsin ki, bank rəhbəri kredit götürən şəxslə əlbir olub ondan nəyinsə qarşılığında hansısa ucuz şərtlərlə kredit verir. Bəzi hallarda bu kimi problemlər ictimailəşir. Bəzi banklarda bu faktlar qeydə alınıb”.
Həmsöhbətimiz onu da vurğuladı ki, Korrupsiya Qarşı Mübarizə Baş İdarəsi bu sahədə xeyli iş görüb: “Bank sahəsində qeydə alınan istənilən korrupsiya faktını yerindəcə aşkar edib və lazımi tədbirlər görülüb”.
Ə.Həsənovun sözlərinə görə, problemli kreditlərin həcminin günü-gündən artması bank sektoruna öz təsirini göstərir.
Günel CƏLİLOVA
