Rəşad Həsənov: “Yeni yaradılan iş yerlərində sahibkarlara təşviq mexanizmi tətbiq olunacaqsa, bu ilk növbədə sahibkar tərəfindən qeyri-leqal işlədilən vətəndaşların rəsmi işlə təmin olunmasına səbəb olacaq”
Azərbaycanda yeni iş yerləri yaradan və ya işçilərinə yüksək maaş verən sahbkarlara vergi güzəştləri tətbiq ediləcək. Bu barədə Vergilər Nazirliyinin yaydığı məlumatda qeyd olunur. Nazirlikdən qeyd olunub ki, hazırda kiçik və orta sahibkarlar üçün yeni vergi güzəştlərinin tətbiqi ilə bağlı işlər aparılır. Vergi güzəştləri həm sadələşdirilmiş vergi, həm də mənfəət vergisinin ödəyicilərinə aid olacaq.
Güzəştlərin verilməsi zamanı müxtəlif mexanizmlərdən istifadə ediləcək. Belə ki, güzəşt təkcə vergi dərəcələrinin azaldılması yolu ilə deyil, həm də şirkətin və ya iş adamının gəlirlərinin məbləğinin azaldılması formasında həyata keçiriləcək.
Qeyd edək ki, bu yeniliklərin parlamentdə təsdiqlənərək gələn ilin əvvəlindən qüvvəyə minməsi planlaşdırılır. Yeni iş yaradan və ya yüksək maaş verən sahibkarlara vergi güzəştlərinin tətbiq olunması sahibkarlıq sahəsinə marağı daha da artıracaq.
İqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, Dünya Bankının qiymətləndirməsinə görə, Azərbaycanda vergi yükü 39,6 faiz olub. Bu isə hökumətin hazırda həyata keçirdiyi qeyri-neft iqtisadiyyatının inkişafı, sahibkarlığın dəstəklənməsi siyasətinə ziddir: “Çünki qonşu ölkələrə nəzər salsaq, bu göstəricinin kifayət qədər aşağı olduğu bəlli olar”.
R.Həsənovun sözlərinə görə, istənilən növ təşviqedici addım iqtisadiyyatın, o cümlədən sahibkar aktivliyinin inkişaf etməsinə səbəb olar: “Yeni yaradılan iş yerləri üçün sahibkarlara təşviq mexanizmi tətbiq olunacaqsa, bu ilk növbədə sahibkar tərəfindən qeyri-leqal işlədilən vətəndaşların rəsmi işlə təmin olunmasına səbəb olar. Son nəticədə vətəndaşların təminatı daha da yüksələ bilər. İşçilərin sosial-sığortası və digər gələcək təminatı müəyyən qədər formalaşdırıla bilər. Eyni zamanda sahibkarlar üçün şərait yaradılar ki, işin genişləndirilməsi istiqamətində müəyyən qərarlar qəbul olunsun. Bu da, təbii ki, həmin sahəyə yeni investisiyanın cəlb olunmasına səbəb ola bilər. Hər hansı bir iqtisadi sahədə cəlb olunan investisiyaların həcmi artarsa, bu, sahibkarlığın inkişafına səbəb olar bilər. Sahibkarlığın inkişafı isə işçilərin işlə təmin olunması deməkdir”.
Günel CƏLİLOVA
