Vüqar Bayramov: “Görürük ki, hər bir fəaliyyət üzrə konkret icra vəziyyəti qiymətləndirilib və nəticəsi yaxşıdır”
İqtisadiyyatın müxtəlif sahələrini əhatə edən “Strateji Yol Xəritəsi”nin yarımillik monitorinqi və qiymətləndirmə hesabatı açıqlanıb. Hesabatda “Strateji Yol Xəritəsi”nin həyata keçirilməsi üçün cavabdeh 47 dövlət qurumunun fəaliyyət göstəriciləri əksini tapıb.
Məlum olub ki, bu ilin 6 ayı ərzində 16 qurum “Strateji Yol Xəritəsi”ndə nəzərdə tutulan tədbirlərin 50 faizini icra edib. Ən yüksək icra göstəricisi 62 faizlə “Milli iqtisadiyyat perspektivi” üzrə əldə olunub. “Kiçik və orta sahibkarlıq səviyyəsində istehlak mallarının istehsalına dair”, eləcə də “Telekommunikasiya və informasiya texnologiyalarının inkişafına dair” strateji yol xəritələrində icra göstəricisi 27 faiz təşkil edir. “Milli iqtisadiyyat perspektivi”, “Kənd təsərrüfatı məhsullarının istehsalı və emalı”, “Logistika və ticarətin inkişafı”, “Maliyyə xidmətləri”, “Kommunal xidmətlərin inkişafı” üzrə streteji yol xəritələrinin icra göstəricilərini əks etdirən bu rəqəmlər “Strateji Yol Xəritəsi”nin ilk yarımillik monitorinqində və qiymətləndirmə hesabatında əksini tapıb.
Maliyyə Sabitliyi Şurası və “Azərbaycan Respublikasında biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılmasını nəzərdə tutan əlavə tədbirlər haqqında” ölkə başçısının tapşırığı ilə yaradılan komissiya isə üzərinə düşən işi yüz faiz icra edib. Sənəddə qeyd edilir ki, fiskal dayanıqlılığın gücləndirilməsi və davamlı monetar siyasətin qəbul edilməsi, özəlləşdirmə və dövlət mülkiyyətində olan müəssisələrlə bağlı islahatların həyata keçirilməsi üzrə tədbirlərin 33 faizi icra olunub, 67 faizinin icrasına başlanıb, insan kapitalının inkişafı üzrə tədbirlərin 46 faizi icra olunub, 36 faizinin icrasına start verilib, əlverişli biznes mühitinin inkişaf etdirilməsi üzrə tədbirlərin 13 faizi icra olunub, 75 faizinin isə icrası həyata keçirilir. Beynəlxalq reytinqlərdə Azərbaycanın mövqeyinin irəliləməsi isə ölkədə aparılan iqtisadi islahatların bəhrə verdiyini sübut edir.
Maraqlıdır, bəs ekspertlər “Strateji Yol Xəritəsi”nin yarımillik nəticələrini necə dəyərləndirir? Məsələyə münasibət bildirən iqtisadçı-ekspert Vüqar Bayramovun sözlərinə görə, bu hesabat əhatə etdiyi bütün sahələr üzrə inkişafa dəstək olacaq: “Strateji Yol Xəritəsi”nin yarımillik monitorinq və qiymətləndirmə hesabatları ayrı-ayrı sahələr üzrə inkişafa təkan verəcək. Bunun qiymətləndirilməsi və monitorinqinin aparılması tamamilə müstəqil həyata keçirilib. Düşünürəm ki, dövlət qurumları tərəfindən belə müstəqil qiymətləndirmələrin aparılmasına ehtiyac var. Bu hesabat çox vacib idi. Nəzərə alsaq ki, bu tip monitorinqin aparılması praktikasına rast gəlinməyib. Yayımlanan hesabatla tanış olanda görürük ki, hər bir fəaliyyət üzrə konkret icra vəziyyəti qiymətləndirilib və nəticəsi yaxşıdır. Qiymətləndirmə və monitorinq həm də dövlət qurumlarının məsuliyyətinin artırılması baxımından vacibdir. “Yol xəritəsi”nin qiymətləndirilməsi və monitorinqinin aparılması eyni zamanda növbəti dövrdə nəzərdə tutulan fəaliyyətlərin icrası üçün məsuliyyəti artıracaq. 2017-ci il başa çatandan sonra illik qiymətləndirmə olacaq. Həmin qiymətləndirmədə də dövlət qurumları daha yaxşı mövqedə olmağa çalışacaqlar”.
Vidadi ORDAHALLI
