Aydın Hüseynov: “Çünki bir sıra indikatorlar üzrə Azərbaycan çox öncül yerdədir”
Məlum olduğu kimi, beynəlxalq aləmin ən mötəbər reytinqində Azərbaycan dünya ölkələrinin hər dördündən üçünü geridə qoyaraq MDB-də liderliyini qoruyub. Hətta G-20-yə daxil olan İtaliya, Rusiya, İndoneziya, Hindistan, Türkiyə, Cənubi Afrika Respublikası kimi ölkələr də iqtisadiyyatın rəqabət qabiliyyəti indeksinə görə Azərbaycandan geridə qalır. Qlobal rəqabət qabiliyyəti reytinqində Rusiya 38-ci, Qazaxıstan 57-ci, Gürcüstan 67-ci və Ermənistan 73-cü sırada yer alıb.
“2017-2018 Qlobal Rəqabətlilik Hesabatı”nda Azərbaycanın mövqeyi 12 indikatordan aşağıdakı doqquz indikator üzrə yaxşılaşıb: institutlar (15 pillə irəliləyərək 33-cü yer), infrastruktur (4 pillə irəliləyərək 51-ci yer), səhiyyə və ibtidai təhsil (1 pillə irəliləyərək 74-cü yer), ali təhsil və təlim (10 pillə irəliləyərək 68-ci yer), əmtəə bazarının səmərəliliyi (19 pillə irəliləyərək 31-ci yer), əmək bazarının səmərəliliyi (9 pillə irəliləyərək 17-ci yer), maliyyə bazarının inkişafı (18 pillə irəliləyərək 79-cu yer), biznesin mürəkkəbliyi (20 pillə irəliləyərək 40-cı yer) və innovasiya (11 pillə irəliləyərək 33-cü yer). Beləliklə, ölkəmiz ən böyük irəliləyişi biznesin mürəkkəbliyi kateqoriyası üzrə əldə edib – 20 pillə. Bu sahədə xüsusilə klaster inkişafı və rəqabət üstünlüyü meyarlarında daha çox irəliləyiş əldə edilib.
Sözügedən hesabatda Azərbaycanın yüksək yerdə qərarlaşmasına təsir göstərən bir neçə mühüm amil var. “Azərbaycan Respublikasında biznes mühitinin əlverişliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər haqqında” Azərbaycan Prezidentinin 2016-cı il 13 iyul tarixli Sərəncamından sonra bu sahədə kompleks tədbirlər davam etdirilib. Bütün bu deyilənlərin fonunda, Azərbaycanın yeni 35-ci yer reytinqi ölkəyə yeni investisiyalar cəlbində necə rol oynayacaq?
Məsələyə münasibət bildirən millət vəkili Aydın Hüseynovun sözlərinə görə, bu, ölkəyə sərmayə axınında mühüm rol oynayacaq: “Çünki bir sıra indikatorlar üzrə Azərbaycan çox öncül yerdədir. Bu da nəticə etibarilə Azərbaycanın daha yaxşı pillədə qərar tutmasına gətirib çıxarıb. Müqayisə üçün qeyd edək ki, Azərbaycan 35-ci, Ermənistan isə 73-cü yerdədir. Gürcüstan 67-ci yerdə, Rusiya isə Azərbaycandan aşağıda qərar tutub. Bu onu göstərir ki, doğrudan da ölkədə aparılan iqtisadi islahatlar düzgün şəkildə həyata keçirilir, bütün risqlər, beynəlxalq iqtisadi proseslər nəzərə alınıb. Bütün bunlar ölkəyə yeni investisiya axınının təmin olunmasında mühüm rol oynayacaq. Məsələ ondadır ki, böyük maliyyə qaynaqlarına malik olan investorlar Dünya İqtisadi Forumunun reytinq cədvəllərinə istinad edirlər. Bu reytinq cədvəllərində hansı ölkədə biznes mühiti, rəqabət qabiliyyəti yüksəkdirsə, iqtisadi islahatlar düzgün aparılırsa, həmin ölkələrə investisiya qoymağa daha çox həvəs göstərirlər. Bu doğrudan da ölkədə sahibkarlığın inkişafına, iqtisadi tərəqqiyə və eləcə də investisiya qoyuluşuna təkan verəcək mühüm göstəricidir”.
Vidadi ORDAHALLI
