Vüqar Bayramov: “Azərbaycanda artıq qeyri-neft sektorunun inkişafı ilə bağlı aparılan islahatlar həm ölkənin investisiya...”
Məlum olduğu kimi, Dünya İqtisadi Forumu “2017-2018 Qlobal Rəqabətlilik Hesabatı”nı açıqlayıb. Azərbaycan bir çox inkişaf etmiş ölkələri qabaqlayaraq reytinqdə iki pillə yüksəlib və 35-ci yerdə qərarlaşıb. İtaliya, Rusiya, Türkiyə kimi ölkələrdən reytinq cədvəlində yuxarıda dayanan ölkəmizin bu uğurunun əsasında aparılan sistemli iqtisadi islahatlar dayanır.
Beləliklə, dünyanın ən mötəbər reytinqində Azərbaycan dünya ölkələrinin hər 4-ündən 3-nü geridə qoyaraq, MDB-də liderliyini qoruyub.
Hətta ölkəmiz düzgün qurulan iqtisadi siyasi xəttin sayəsində "G-20"yə daxil olan bəzi ölkələri də qabaqlayıb. İtaliya, Rusiya, İndoneziya, Hindistan, Türkiyə, Cənubi Afrika Respublikası kimi ölkələrin iqtisadiyyatları da rəqabət qabiliyyəti indeksinə görə ölkəmizdən geridə qalıb. Bəzi qonşu ölkələr isə reytinq cədvəlində qat-qat aşağıda qərarlaşıb. Rusiya 38-ci, Qazaxıstan 57-ci, Gürcüstan 67-ci və Ermənistan 73-cü sırada yer alıb. Görünən odur ki, Ermənistan Azərbaycandan 2 dəfə geridədir.
Onu da qeyd edək ki, bu reytinq hesabatı xarici investorların sərmayə yatırmaqla bağlı qərarlarında böyük rol oynayır. Əksər nüfuzlu ölkələr məhz bu hesabat əsasında investisiya yatıracaqları ölkəni seçirlər. Bu isə o deməkdir ki, ölkəmizə maraq daha da artacaq. Azərbaycan münbit investisiya mühitinə görə müsbət imicini daha da möhkəmləndirmiş oldu.
Ümumilikdə, Azərbaycanın əldə etdiyi bu uğurları ekspertlər necə dəyərləndirir? Məsələyə münasibət bildirən iqtisadçı-ekspert Vüqar Bayramovun sözlərinə görə, sevindirici haldır ki, Azərbaycan MDB ölkələri arasında ən rəqabətqabiliyyətli ölkədir: “Dünya İqtisadi Forumunun "2017-2018 Qlobal Rəqabətlilik Hesabatı"nda Azərbaycanın mövqeyinin yaxşılaşması və MDB ölkələri arasında birinci olması ölkəmizdə investisiya mühitinin yaxşılaşmasından, eyni zamanda, ölkənin rəqabət qabiliyyətinin güclənməsindən xəbər verir. Ölkəmiz regionda ən rəqabətqabiliyyətli iqtisadiyyata malikdir. Eyni zamanda, Azərbaycan həm də qonşu İran və Türkiyə ilə müqayisədə rəqabət qabiliyyətinə görə daha öndədir. Bu isə ondan xəbər verir ki, Azərbaycan rəqabətqabiliyyətliliyinə görə regionun ən aparıcı ölkəsidir. Neftin qiyməti dünya bazarında aşağı olduğu dövrdə Azərbaycanın rəqabət qabiliyyətinin yüksək olması və bunun dünyanın ən aparıcı iqtisadi forumu tərəfindən qiymətləndirilməsi təqdirəlayiqdir. Bu, əslində, Azərbaycanda qeyri-neft sektorunun inkişafı ilə bağlı aparılan islahatlara beynəlxalq qiymət kimi də xarakterizə edilməlidir. Nəticə etibarilə bu ondan xəbər verir ki, postneft dövründə aparılan islahatlar Azərbaycanın rəqabət qabiliyyətinin yüksəlməsinə gətirib çıxarıb. Nəticədə neftin dünya bazarında qiymətinin aşağı olmasına və ölkəyə daxil olan neft gəlirlərinin azalmasına baxmayaraq, Azərbaycan rəqabətqabiliyyətli ölkə mövqeyini nəinki qoruyub saxlayıb, hətta gücləndirə bilib. Bu isə ondan xəbər verir ki, Azərbaycanda artıq qeyri-neft sektorunun inkişafı ilə bağlı aparılan islahatlar həm ölkənin investisiya mühitinin daha da yaxşılaşmasına, ölkənin rəqabət qabiliyyətinin gücləndirilməsinə və mövcud infrastrukturdan və potensialdan iqtisadi diversifikasiya imkanları üçün istifadə edilməsinə gətirib çıxarıb. Bu həm də Azərbaycana mövcud potensialını təqdim etməyə, xüsusilə də qeyri-neft sektoruna xarici sərmayələrin cəlb edilməsini davam etdirməyə imkan verir”.
Vidadi ORDAHALLI
