Rasif Bağırov: “Həmin firmaları dəvət edib ölkədə birgə dərman sənayesinin inkişafına kömək etmək olar”
“Azərbaycanla Rusiya arasında əczaçılıq və sənaye sahələrində əlaqələrin inkişafı üçün böyük potensial var”. Bu barədə mətbuata açıqlamasında Rusiyanın Azərbaycandakı ticarət nümayəndəsi Eldar Tlyabiçov bildirib.
Ticarət nümayəndəsinin sözlərinə görə, əczaçılıq sahəsində əməkdaşlıq artmaqdadır, lakin bu sahədə gələcək inkişaf üçün imkanlar var: “Biz bir çox sahələrdə ticarət əlaqələrini genişləndirə bilərik. İki ölkə arasında kənd təsərrüfatı sahəsində əlaqələrin genişləndirilməsi ilə bağlı işlər gedir. Ancaq digər sektorlar da var. Onlardan biri də əczaçılıqdır. Azərbaycanda hazırda “Hayat Pharm”la birlikdə dərman istehsalı üzrə birgə zavod inşa edilir. Lakin bununla məsələ bitmir. Bu istiqamətdə hələ də əməkdaşlıq imkanları var”.
Ticarət nümayəndəsinin açıqlamasından o da məlum olub ki, şirkət ümumilikdə 89 növ dərmanın sərbəst buraxılmasını təmin edəcək. Zavodun gücü 22.5 milyon ədəd, ya da 500 milyon tablet və kapsuldur. Onun sözlərinə görə, sənaye, nəqliyyat və İKT perspektivli sahələrdir: “Azərbaycan böyük sənaye potensialına malikdir. Beləliklə, burada bir çox iş var. “Şimal-Cənub” nəqliyyat dəhlizinin işə düşməsi bu sahədə perspektiv imkanları daha da artıracaq”.
Qeyd edək ki, Rusiya Azərbaycanın əsas ticarət tərəfdaşlarından biridir. Dövlət Gömrük Komitəsinin məlumatına görə, 2017-ci ilin yanvar-avqust aylarında Azərbaycan və Rusiya arasında ticarət dövriyyəsinin həcmi 1,28 milyard dollar təşkil edib. Bütün bu deyilənlərin fonunda, Azərbaycanla Rusiya arasında əczaçılıq sahəsində əməkdaşlığın genişləndirilməsi ilə bağlı nə kimi perspektivlər var?
Məsələyə münasibət bildirən tanınmış həkim Rasif Bağırovun sözlərinə görə, Rusiya ilə yanaşı, digər Avropa ölkələri ilə də əczaçılıq sənayesinin inkişafı ilə bağlı əməkdaşlıq etmək olar: “Azərbaycanda elə böyük dərman istehsal edən zavod yoxdur. Bir-iki belə zavod var ki, onlar da ölkəyə gətirilən dərman malları ilə rəqabətə girə bilmirlər. Nəticədə dərman istehsalında müəyyən çətinliklə rastlaşırlar. Bu da ölkənin dərman sənayesinin inkişafına imkan vermir. Ona görə də Azərbaycanda dərman sənayesinin inkişafı ilə bağlı Rusiya və digər ölkələrin təklifləri müsbət qarşılanmalıdır. Ancaq yaxşı olardı ki, texnoloji vasitələri daha yüksək olan ölkələrlə bu istiqamətdə əməkdaşlıq edilsin. İnkişaf etmiş Avropa ölkələri ilə birlikdə Azərbaycanda dərman sənayesini inkişaf etdirmək olar. Məsələn, Macarıstanın bu sahədə 200 ildən artıq bir təcrübəsi var. Şərqi Avropa ölkələri ilə birlikdə Azərbaycanda dərman istehsalını təşkil etmək olar. Həmin firmaları dəvət edib Azərbaycanda birgə dərman sənayesinin inkişafına kömək etmək olar. Bu sahədə texnologiya nə qədər yüksək səviyyədə olsa, daha effektiv nəticə ortaya qoymaq olar”.
Vidadi ORDAHALLI
