Rəsul Cahangirli: “Bu yöndə işlərin sürətləndirilməsi ümumi işin xeyrinədir”
2017-ci il sentyabrın 15-nə Azərbaycan "Cənub Qaz Dəhlizi" QSC layihəsində öz payının maliyyələşdirilməsi çərçivəsində 7,6 milyard investisiya yatırıb. Bu barədə mətbuata açıqlamasında neft-qaz bazarındakı mənbə deyib. Mənbənin sözlərinə görə, layihə çərçivəsində 2014-2020-ci illərdə QSC-nin xərclərinin ümumi həcmi 12,3 milyard dollar təşkil edir: “15 sentyabr tarixinə bu məbləğdən 7,6 milyard dollar (və ya zəruri vəsaitin 62 faizi) sərmayə qoyulub".
Məlumat üçün onu da qeyd edək ki, “Cənub Qaz Dəhlizi” layihəsi çərçivəsində “Şahdəniz” qaz-kondensat yatağının istismarının ikinci mərhələsinin işlənməsi üzrə görüləcək işlərin (ilk qazın hasilatına dair) 95,9 faizi, Cənubi Qafqaz Boru Kəmərinin Genişləndirilməsi (CQBKG) üzrə işlərin 89,8 faizi, Trans-Anadolu (TANAP) boru kəmərinin inşası üzrə işlərin 80 faizi, Trans-Adriatik (TAP) kəmərinin inşası üzrə işlərin 50,7 faizi icra edilib. Cari ilin əvvəlindən sentyabrın 15-dək “Cənub Qaz Dəhlizi” layihələrində CQD-nin mülkiyyətində olan iştirak paylarının maliyyələşdirilməsinə 1 milyard 671 milyon dollar məbləğində investisiya qoyulub.
Qeyd edək ki, Avropa İttifaqı üçün prioritet enerji layihələrindən biri olan “Cənub Qaz Dəhlizi”nin seqmentlərini “Şahdəniz-2”, CQBKG, TANAP və TAP layihələri təşkil edir. Bu boru xətti Xəzər dənizinin Azərbaycan sektorundakı “Şahdəniz-2” yatağından hasil olunacaq qazı Türkiyəyə və bu ölkədən də Avropaya çatdıracaq.
Görünən odur ki, Azərbaycan 2014-cü ildən bəru CQD ilə bağlı öhdəliklərini tam məsuliyyətlə və vaxtında yerinə yetirir. İndiyə qədər layihəyə 7,6 milyard dollar vəsaitin yatırılması buna ən bariz nümunədir. Bu baxımdan ekspertlər Azərbaycanın üzərinə düşən öhdəlikləri yerinə yetirməsinə necə yanaşırlar? Sözügedən məsələ ilə bağlı fikirlərini “Bakı-Xəbər”lə bölüşən ekspert Rəsul Cahangirlinin sözlərinə görə, bunun bir sıra üstünlükləri var: “Başlıca üstünlüyü ondan ibarətdir ki, Azərbaycan etibarlı tərəfdaş olduğunu bir daha bütün dünyada sübut etdi. Nəzərə alsaq ki, layihənin həyata keçməsi Azərbaycan üçün mühüm əhəmiyyət kəsb edir, bu baxımdan görülən işlər müsbət dəyərləndirilməlidir. Azərbaycanın öz öhdəliklərinə sadiq qalması “Cənub Qaz Dəhlizi”nin vaxtında ərsəyə gəlməsini sürətləndirəcək. Çünki qarşıda duran başlıca məsələ boru kəmərinin vaxtında istismara verilməsidir. Plana görə, “Şahdəniz-2” layihəsi çərçivəsində hasil olunacaq qaz 2018-ci ildə Türkiyə bazarına, 2019-cu ildə isə Avropa bazarına çıxarılacaq. Ona görə də bu yöndə işlərin sürətləndirilməsi ümumi işin xeyrinədir. Bunun nəticəsində Azərbaycanın Avropanın enerji təchizatında rolu daha da artacaq”.
Vidadi ORDAHALLI
