Könül Nuriyeva: “Turist sayının çox olması valyuta axını deməkdir” Bahadur Bilalov: “Azərbaycan turizmində ilk dəfədir gedən turistlərin xərclədiyi vəsait gələn turistlərin xərclərindən azdır, bu, müsbət saldo hesab olunur”
Ötən illərə nisbətən bu il istirahət üçün ölkəmizi seçən turistlərin sayı çox olub. İstər Qərb, istərsə də Şərq ölkələrinin vətəndaşları bu il paytaxt Bakı ilə yanaşı, bölgələrimizdə də olublar. Açıqlanan statistik rəqəmlər turist sayının gündən-günə artdığını qeyd edir.
Xarici turistlərin Azərbaycandakı xərcləri 1,3 milyard dollar təşkil edib. Bu barədə Azərbaycan Mərkəzi Bankının təqdim etdiyi hesabatda məlumat verilir.
Qeyd olunur ki, 2017-ci ilin ilk 6 ayında qarşılıqlı turizm xidmətlərinin dövriyyəsi ötən ilin müvafiq dövrünə nisbətən 5,6 faiz artaraq, 2,5 milyard dollara bərabər olub. Hesabata əsasən, xarici turistlər Azərbaycanda azərbaycanlı turistlərin xərclədiyi vəsaitdən 100 milyon dollar daha çox vəsait xərcləyib. Belə ki, xarici turistlərin Azərbaycandakı xərcləri 1,3 milyard dollar, azərbaycanlı turistlərin xaricdəki xərcləri 1,2 milyard dollar təşkil edib.
İqtisadçı Könül Nuriyeva "Bakı-Xəbər"ə açıqlamasında qeyd etdi ki, turistlərin 6 ay ərzində xərclədiyi vəsait 1,3 milyard dollardan daha artıq ola bilər: “Bəzən elə alış-veriş prosesi olur ki, onlar qeydə alınmır. Regionlara istirahət üçün yollanan turistlər xərclədiyi vəsait əksər hallarda qeydə alınmır. Turistlərin xərcləri tam olaraq qeydə alınsa, o zaman hesabatda qeyd olunan rəqəm daha yüksək olar”.
Həmsöhbətimizin sözlərinə görə, turistlərin ölkəmizi seçməsi müsbət haldır.Turist sayının çox olması valyuta axını deməkdir: “Onu da unutmaq lazım deyil ki, turist sayı çox olarsa, bu, inflyasiyaya da öz təsirini göstərəcək. Turistlərin bizim ölkəyə gəlişi Azərbaycanda əmtəə və xidmətlərin artmasına təsir göstərəcək. Bu səbəbdən də turistlərin gəlişi hər zaman müsbət hal olmaya bilər. O üzdən bu sahədə balans yaratmaq lazımdır. Bu templə davam etsək, turistlər bizdən razı qalsalar, təbii ki ölkəyə valyuta axını artacaq. Valyuta axınının artması yerli əhalinin həyat səviyyəsinə təsir edəcək. Onların rifah halı da yüksələcək”.
Turizm sahəsi üzrə ekspert Bahadur Bilalov qəzetimizə açıqlamasında bildirdi ki, Azərbaycan turizmində ilk dəfədir gedən turistlərin xərclədiyi vəsait gələn turistlərin xərclərindən azdır. Bu, müsbət saldo hesab olunur. Və bu sevindirici haldır: “Ölkələr çalışır ki, turizm sektoru daha çox inkişaf etsin və gələn turistlərin sayı artsın. Turist sayı çox olarsa, ölkəyə daxil olan valyutanın həcmi də yüksək olacaq. Azərbaycan artıq turizm sahəsində inkişaf dövrunu yaşayır. Yaxın illər ərzində bu inkişaf özünü daha qabarıq şəkildə göstərəcək. Nəzərə almaq lazımdır ki, Mərkəzi Bankın bəyan etdiyi statistik rəqəmlər rəsmi açıqlamadır. Gələn turistlər açıqlanan rəqəmdən daha artıq vəsait xərcləyib. Onların taksi xidmətlərindən yararlanması, alış-veriş mərkəzlərində şoppinq zamanı etdikləri ödəmələr, ekskursiyalar zamanı vəsait xərcləmələri və digər hallar statistik rəqəmlərə daxil deyil. Bunlardan əldə olunan gəlir hesablansa, o zaman turistlərin ölkədə sərf etdikləri vəsait daha çox olar”.
Günel CƏLİLOVA
