Ruslan Atakişiyev: “Bu, iqtisadiyyatın qeyri-neft sektorunda görülən tədbirlərlə bağlıdır”
Prezident İlham Əliyev Salyan rayonunun Çuxanlı-Gəncəli-Piratman-Parça Xələc-Seyidan avtomobil yolunun açılışında rayon ictimaiyyətinin nümayəndələri ilə görüşdə ölkənin iqtisadi həyatı ilə bağlı mühüm məqamlara toxunub.
Dövlət başçısının sözlərinə görə, Azərbaycanın qeyri-neft sektoru uğurla inkişaf edir: “Son vaxtlar mənim təşəbbüsümlə kənd təsərrüfatının müxtəlif sahələrinə dəstək, yeni təkan vermək üçün müşavirələr keçirilib – pambıqçılıq, tütünçülük, baramaçılıq, fındıqçılıq, çayçılıq, çəltikçilik, sitrusçuluq – biz bütün bu sahələrə xüsusi diqqət göstəririk. Hər bir rayonun özünə xas olan kənd təsərrüfatı sahələri var və ixtisaslaşma istiqamətində də çox ciddi addımlar atılır”.
Prezidentin fikrincə, ölkə inkişaf edir, sosial-iqtisadi layihələr icra olunur: “Baxmayaraq, neftin qiymətinin kəskin aşağı düşməsinə görə bizim gəlirlərimiz azalıb, ancaq sosial və infrastruktur layihələrində heç bir geriləmə yoxdur. Gələn ilin iqtisadi göstəriciləri daha da yaxşı olacaq. Gələn il bu ilə nisbətən daha da böyük həcmdə Dövlət İnvestisiya Proqramı icra ediləcək. Gələn ilin büdcəsi də daha böyük olmalıdır və dövlət investisiya xərcləri daha da böyük olacaq. Yəni iqtisadi, maliyyə sahələrində qarşımızda heç bir problem yoxdur. Azərbaycan möhkəm iqtisadi potensiala malik olan bir ölkədir. Gələcək illərdə bizim iqtisadi gücümüz ancaq artacaq və beləliklə, bütün rayonlarda işlər daha da yaxşı gedəcək”.
Bütün bu deyilənlərin fonunda, gələn il büdcənin daha böyük olmasını şərtləndirən amillər hansılardır? Ekspertlərin bununla bağlı fikirləri nədən ibarətdir?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev bunu bir sıra iqtisadi faktorlarla əsaslandırdı: “Hələlik gələnilki icmal büdcənin həcmi açıqlanmayıb. Gələn ilin büdcəsinin böyük olmasını şərtləndirən amillər gəlirlər və Neft Fondundan edilən transferlərin həcmindən asılıdır. Son dövrlərə qədər büdcə kəsirlə icra olunurdu və bu əsasən Neft Fondundan edilən transferlər hesabına bağlanırdı. Görünən odur ki, bu istiqamətdə vəziyyət müsbətə doğru dəyişir. O baxımdan, növbəti dövlət büdcəsinin əvvəlkinə nisbətən böyük olmasını şərtləndirən digər amillər də var. Son dövrlər dövlət xətti ilə verilən investisiyalar artıb. Bu da iqtisadiyyatın qeyri-neft sektorunda görülən tədbirlərlə bağlıdır. Qeyri-neft sektorunun inkişafı ilə bağlı olan tədbirlərin daha da artırılması məqsədilə dövlət xərclərinin artması və bununla bağlı digər işlərin görülməsi öz səmərəsini verir”.
Vidadi ORDAHALLI
