Əli Əlirzayev: “Bu, ölkə iqtisadiyyatı üçün müsbət perspektivlər vəd edir”
Azərbaycanda qeyri-neft sənayesinin inkişafı üçün hökumət müxtəlif tədbirlər həyata keçirir. Bunların sırasında sənaye park və məhəllələrinin yaradılması önəmli yer tutur. Hazırda Azərbaycanda 7 sənaye parkı var. Sənaye parklarının yaradılmasında məqsəd qeyri-neft sənayesində idxalı əvəz edən, rəqabətqabiliyyətli və ixracyönümlü məhsullar istehsal edən müəssisələrin təşkilinə nail olmaqdır.
Azərbaycanda sənaye parklarının yaradılmasına başlanmasının ciddi əsasları var. Xarici ölkələrin təcrübəsinə istinad edərək deyə bilərik ki, sənaye parkları sahibkarlığı dəstəkləmək, qeyri-neft sektorunun davamlı inkişafını təmin etmək və əhalinin istehsal sahəsində məşğulluğunu artırmaq imkanına sahibdir. Buna görə də müxtəlif sənaye sahələrinin, ölkə iqtisadiyyatının tarazlı inkişafında maraqlı olan dövlətlər iqtisadi siyasətlərində sənaye parklarının yaradılmasına əsas yer verirlər. Türkiyə, Almaniya, Polşa, Latviya, Rusiya, Çin və Cənubi Koreya təcrübələri göstərir ki, sənaye parklarının yaradılması ölkə iqtisadiyyatının ixrac, rəqabət qabiliyyətinin, idxalı əvəz edən məhsulların istehsalının artırılması, ətraf rayonlarda məşğulluğun təmini, investisiyaların və müasir texnologiyaların cəlb edilməsi kimi prioritet vəzifələrin həyata keçirilməsində xüsusi əhəmiyyətə malikdir.
Sənaye parklarının əhəmiyyətli cəhətlərini nəzərə alaraq Azərbaycan hökuməti də sahibkarlığın dəstəklənməsinin bir yolu kimi sənaye parklarının ölkəmizdə yaradılmasına başlayıb. Bu arada Prezident İlham Əliyev Neftçala Sənaye Məhəlləsi ilə tanışlıq zamanı bildirib ki, bu zonaların yaradılması ilə iş adamlarına dövlət tərəfindən növbəti dəstək göstərilir.
Onu da qeyd edəık ki, sənaye parkları bir sıra vergilərdən azad edilib. Ümumilikdə sənaye parkları ilə bağlı yeridilən bu siyasət ölkə iqtisadiyyatının perspektiv inkişafı baxımından nə vəd edir?
Məsələyə münasibət bildirən iqtisadçı-alim Əli Əlirzayev buna bir neçə prizmadan yanaşdı: “Sənaye parklarının yaradılması böyük bir prosesdir. Ora xidmət, istehsal daxildir. Yəni sənaye parkları ayrı-ayrı fəaliyyət növünü bir-birinə birləşdirir və vahid sistem halında bir-birilə əlaqələndirib genişləndirir. Yeni ehtiyatlar, rezervlər axtarıb tapmağa imkan verir. Digər tərəfdən, institusional idarəetmə baxımından da bu çox səmərəlidir. Rəqabət mühitinə dözümlüdür və kompleks bazara uyğundur. Ona görə də Azərbaycanda sənaye parklarını inkişaf etdirmək mühüm əhəmiyyət kəsb edir. İndiki müasir şəraitdə həm sahə, həm ərazi, həm də bazar baxımından müxtəlif nüanslar, müəyyən risqlər meydana çıxır. Bu nüansları, risqləri özündə birləşdirən, qabaqcadan görən sistem yaranır. Nəticədə iqtisadiyyatda boşluq olmur və bir-birini tamamlayır. Eyni zamanda, alınan məhsulun da maya dəyəri sərfəli olur. Bütövlükdə, sənaye parkları daha səmərəli və effektiv təşkil olunan formadır. Bu, ölkə iqtisadiyyatı üçün müsbət perspektivlər vəd edir”.
Vidadi ORDAHALLI
