Əli Əlirzayev: “Biznes mühitində yoxlamaların sayının azaldılması həm mənəvi, həm də maddi baxımdan böyük əhəmiyyət kəsb edir”
Kiçik sahibkarlıq subyektlərində səyyar vergi yoxlamalarının və operativ nəzarət tədbirlərinin keçirilməsi də müvəqqəti olaraq azaldılıb. Vergilər Nazirliyinin kollegiya iclasının qərarına əsasən, kiçik və orta bizneslə məşğul olan sahibkarlar dedikdə, illik dövriyyəsi 200 min manatdan aşağı və sadələşdirilmiş vergi ödəyiciləri olan sahibkarlıq subyektləri nəzərdə tutulur. Həmin sahibkarlıq subyektlərində səyyar vergi yoxlamaları əhəmiyyətli dərəcədə məhdudlaşdırılıb.
Operativ nəzarət tədbirləri zamanı isə əmək müqavilələrinin bağlanmasına, vergi ödəyicilərinin dövriyyəsinin müəyyənləşdirilməsi məqsədilə xronometraj metodu ilə yoxlamaların keçirilməsi və aksizli məhsulların satışı zamanı aksizlərin tətbiqinə nəzarət istisna olmaqla, digər yoxlamaların keçirilməsi məhdudlaşdırılıb. Bu məhdudlaşdırmadan sonra vergi yoxlamaları təxminən iki dəfə azalıb.
Ekspertlərin fikrincə, kiçik və orta sahibkarlıq subyektlərində vergi yoxlamalarının azaldılması sahibkarlıq sahəsində inkişafa səbəb olacaq.
İqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, vergi yoxlamalarının azalması biznes sahəsinin inkişafına səbəb olacaq: “İlk növbədə bizneslə məşğul olmaq istəyənlərin sayı artacaq. Kiçik və orta sahibkarlıq sektorunda vergi yoxlamasının müvəqqəti olsa belə məhdudlaşdırılması gəlirliliyin artmasına səbəb olacaq”.
İqtisadçının sözlərinə görə, biznes mühitində yoxlamaların sayının azaldılması həm mənəvi, həm də maddi baxımdan böyük əhəmiyyət kəsb edir. Vergi yoxlamalarının məhdudlaşdırılması kiçik sahibkarlıq sahəsində rəqabət mühitinin formalaşmasına səbəb olacaq: “Bazarda dəyişiklik hiss olunacaq. Qiymətdə dəyişiklik baş verəcək. Biznes mühitində vergi yoxlamalarının azalması iqtisadiyyata yeni stimul verəcək. Sahibkarlıqla məşğul olmaq istəyənlər artıq düşünmədən öz ideyalarını gerçəkləşdirəcəklər. Biznes aləmində yeni canlanma hiss olunacaq”.
Günel CƏLİLOVA
