Zakir Əhmədov: “Ölkənin ixracdan əldə etdiyi gəlirlər artacaq”
Xəbər verildiyi kimi, dünyanın ən məşhur elektron satış portalı "Alibaba" "Azexport" portalının fəaliyyətini uğur hekayəsi kimi qəbul edərək, bu haqda öz rəsmi səhifəsində məqalə paylaşıb.
Məqalədə "Azexport"un fəaliyyəti əməkdaşlıq nümunəsi kimi təqdim edilib. Qeyd olunub ki, "Azexport" məhz "Alibaba" vasitəsilə Azərbaycan məhsullarını bütün dünyaya nümayiş etdirmək şansı əldə edib. Hazırda "Alibaba"da "Made in Azerbaijan" brendi ilə tanınan 300-dən artıq məhsul nümayiş olunur.
O da məlum olub ki, bu ilin ilk 8 ayı ərzində "Alibaba"da "Azexport" tərəfindən təqdim olunan Azərbaycan mallarına dünyanın müxtəlif ölkələrindən 150 mindən çox müştəri tərəfindən baxış olub.
Qeyd edək ki, "Azexport" 1 il öncə Prezident İlham Əliyevin sərəncamı əsasında Azərbaycan mənşəli malların "Made in Azerbaijan" (Azərbaycan məhsulu) brendi kimi xarici bazarlarda təmsil olunmasını təmin etmək üçün yaradılıb. 2016-cı ilin ən önəmli yeniliklərindən hesab olunan "Azexport" portalı etibarlı ödəniş sistemləri və nəqliyyat-logistika şirkətləri ilə əməkdaşlıq edərək, istifadəçilərin tam məmnunluğunu təmin edir. Həmçinin, məhsulların daha geniş kütləyə çatdırılması məqsədilə portal "Alibaba" ilə yanaşı, həm də "All.biz", "TradeKey", "Amazon", "Agroserver" kimi dünyanın populyar elektron satış şəbəkələrinə inteqrasiya olunub. "Azexport" "Alibaba" portalının qızıl üzvüdür.
Ümumilikdə, bütün bunların nə kimi əhəmiyyəti var?
Məsələyə münasibət bildirən ekspert Zakir Əhmədovun sözlərinə görə, Azərbaycan məhsullarının dünyada tanıdılması baxımından bunun mühüm əhəmiyyəti var: “Məhsulu ixrac etmək üçün təkcə keyfiyyət önəmli faktor deyil. Bunun üçün lazım olan həm də onun reklamını təşkil etməkdir. Bu baxımdan "Alibaba"da 300 sayda Azərbaycan məhsulunun reklam olunması bazar tapmaq baxımından mühüm əhəmiyyət kəsb edir. Bunun sayəsində Azərbaycan məhsullarına çoxsaylı müştəri tapılacaq. Nəticdə yeni bazarlara Azərbaycan məhsullarının çıxması üçün imkanlar yaranacaq. Ölkənin ixracdan əldə etdiyi gəlirlər artacaq. Xüsusən də qeyri-neft sektorunun inkişaf etdirilməsi baxımından bunun mühüm əhəmiyyəti var. Fikrimcə, mümkün olan qədər bundan səmərəli istifadə etmək lazımdır ki, Azərbaycanın ixrac imkanları artsın. O üzdən, bu istiqamətdə görülən işlərə müsbət yanaşıram”.
Vidadi ORDAHALLI
