Bu günlərdə bəzi internet saytlarında yayımlanan "Psixotrop maddələrin qaçaqmalçılıq yolu ilə Azərbaycana gətirilməsi davam edir" başlıqlı məqalədə müəllif psixotrop maddələrin qaçaqmalçılığı ilə mübarizədə gömrük xidmətinin gördüyü işi, həyata keçirdiyi əməliyyat və tədbirləri araşdırmadan, bu barədə səlahiyyətli dövlət qurumundan, yəni müvafiq gömrük orqanından rəsmi münasibət öyrənmədən Dövlət Gömrük Komitəsinin fəaliyyətinə kölgə salan mövqe nümayiş etdirib.
Dövlət Gömrük Komitəsinin mətbuat xidmətindən “Bakı-Xəbər”ə verilən məlumata görə, sözügedən materialda son bir ildə psixotrop maddələrin qaçaqmalçılığı ilə mübarizədə irimiqyaslı əməliyyatların həyata keçirildiyi və guya bu əməliyyatlardan gömrük orqanlarının xəbərsiz olduğu, psixotrop maddələrin qanunsuz dövriyyəsi ilə bağlı daxil olan məlumatlara etinasız yanaşdığına dair həqiqətə uyğun olmayan iddialar irəli sürülür.
Məqalənin yekununda isə ekspertə istinadən əlavə olunan bir cümlə ilə mövzu dəyişdirilir, qida əlavələri adı altında ölkəyə qaçaqmalçılıq yolu ilə dərman preparatlarının gətirildiyi iddia edilir və ən sonda müəllif tərəfindən əldə edilən, mövzuya o qədər də aidiyyəti olmayan rəsmi mövqe verilir. Belə ki, müəllifin məqaləni psixotrop maddələrin qaçaqmalçılığına həsr etməsinə, məqalənin başlığını ona görə seçməsinə baxmayaraq, rəsmi mövqedə yalnız qida əlavələrindən bəhs olunur. Onu da qeyd edək ki, Dövlət Gömrük Komitəsinə ünvanlanan sual da qida əlavələri adı altında ölkəyə dərman preparatlarının gətirilməsinə dair idi. Hazırda bütün dünyanı narahat edən ən vacib məsələlərdən biri, psixotrop maddələrin qaçaqmalçılığı barədə araşdırma aparan, məlumat hazırlayan jurnalist və ya ekspertin ilk növbədə gömrük orqanlarına müraciət edəcəyi şübhəsizdir. Çünki söhbət "qaçaqmal"dan gedir ki, bu sahə ilə gömrük orqanlarının da məşğul olduğu hər kəsə bəllidir.
Lakin adıçəkilən məqalədə gömrük orqanlarının rəsmi mövqeyinə yer verilməməsi başadüşülən deyil.
Maraqlı məqamlardan biri də ondan ibarətdir ki, gömrük orqanları mütəmadi olaraq psixotrop maddələrin qaçaqmalçılığına qarşı həyata keçirilən tədbirlər, aşkar edilən psixotrop maddələr barədə mütəmadi olaraq ictimaiyyəti məlumatlandırır. Çünki DGK-nın internet saytında təkcə son aylarda yayımlanan məıumatlara nəzər yetirmək bu sahədə görülən işlərə dair məlumatlanmaq üçün kifayət idi. Güclü təsiredici və psixtotrop maddələrin qaçaqmalçılığına qarşı mübarizə sahəsində görülən işlərə gəlincə isə, bu barədə rəqəmlər əslində hər şeyi deyir. Belə ki, sadəcə 2017-ci ilin ötən dövrü ərzində 125 fakt üzrə müxtəlif adda 3 flakon, 1869 həb, 10 qutu, 4,5 kiloqram və 79 konvalyut güclü təsiredici və psixotrop maddələr, 3,5 kiloqrama yaxın isə psixotrop maddələrin prekursorları aşkar edilərək ölkənin gömrük sərhədindən keçirilməsinin qarşısı alınıb.
Dövlət Gömrük Komitəsi bir daha media qurumları və nümayəndələrini komitənin fəaliyyəti ilə bağlı məlumatlar hazırlayarkən diqqətli olmağa, rəsmi mövqe öyrənməklə məsələyə obyektiv yanaşmağa çağırır.
Baki-xeber.com
