Natiq Cəfərli: “Elmi nailiyyətlərin istehsalda və təcrübədə tətbiqinə geniş yer verilməlidir ki, əqli məhsulların həm ixracı, həm də istehsalı mümkün olsun”
"Bu gün Azərbaycan nəinki sənaye və kənd təsərrüfatı, o cümlədən əqli məhsullarını ixrac edir. Vətəndaşlara Xidmət və Sosial İnnovasiyalar üzrə Dövlət Agentliyi – “ASAN xidmət” ictimai münasibətlərin və xidmətlərin müasir modelidir". Bu fikri sentyabrın 20-də Nyu-Yorkda BMT Baş Assambleyasının 72-ci sessiyasının açılışındakı nitqində Azərbaycan Respublikasının Prezidenti İlham Əliyev söyləyib.
Dövlət başçısı bildirib ki, eyni yerdə 251 xidmətin göstərilməsi, tam şəffaflıq, korrupsiya və rüşvətxorluğun sıfıra endirilməsi “ASAN xidmət”i bir çox ölkələr üçün cəlbedici edib. Sırf Azərbaycan brendi olan “ASAN xidmət” yaradıldığı gündən ötən 5 il ərzində 5 milyon insana 1 milyon 600 min xidmət göstərib. Müraciətlərin ümumi sayı 17 milyona çatıb. “ASAN xidmət”in ictimaiyyət tərəfindən bəyənilməsi 98 faiz təşkil edir.
Prezident İlham Əliyev bildirib ki, 2015-ci ildə dövlət xidmətlərinin əhəmiyyətli dərəcədə sadələşdirilməsinə, təkmilləşməyə verdiyi töhfəsinə və yaradıcı olmağına görə “ASAN xidmət” BMT-nin Dövlət Xidməti Mükafatına layiq görülüb.
Əqli məhsulların ixracı barədə danışan iqtisadçı-ekspert Natiq Cəfərli “Bakı-Xəbər”ə açıqlamasında qeyd etdi ki, hazırda bir neçə texnobank yaradılır. Rabitə, İnformasiya Texnologiyaları və Nəqliyyat Nazirliyinin xəttilə intellektual məhsullar istehsal edən inqubatorlar hazırlanır: “Bir müddət sonra əqli məhsulun istehsalı və ixracı ilə bağlı daha ciddi işlər görüləcək. Hələlik bir brend kimi bir neçə ölkə “ASAN xidmət”in yayılmasına maraq göstərir. Bəzi ölkələr “ASAN xidmət” təcrübəsini öyrənirlər. Əfqanıstanda “ASAN xidmət” Təcrübə Mərkəzi yaradılıb. “ASAN xidmət”in innovasiya məhsulu kimi Əfqanıstanda tətbiqi nəzərdə tutulur”.
Həmsöhbətimizin sözlərinə görə, əqli məhsulların inkişafı və ixracı uzunmüddətli prosesdir. Bunun üçün ilk növbədə elm də inkişaf etməlidir: “Elmi nailiyyətlərin istehsalda və təcrübədə tətbiqinə geniş yer verilməlidir ki, əqli məhsulların həm ixracı, həm də istehsalı mümkün olsun. Etiraf etmək lazımdır ki, dünyada bu sahədə geniş rəqabət var. Hər hansı formada bu rəqabətə davam gətirmək üçün rəqiblərdən hər zaman bir addım üstün olmaq lazımdır. Bunun üçün isə elmi baza lazımdır. Elmi baza və universitetlərdə elmi təcrübə mərkəzləri olmadan, elm ciddi şəkildə inkişaf etmədən bu sahədə Azərbaycanın rəqabət aparması asan olmayacaq”.
İqtisadçı onu da əlavə etdi ki, əqli məhsulların istehsalı və ixracatı daha çox valyuta gətirən sahədir. Həmçinin, əqli məhsulların ixracı ölkədə innovasiyaların inkişafına təkan verəcək bir sahədir. Onun fikrincə, bu sahəyə diqqət artırılmalıdır.
Günel CƏLİLOVA
