Rəşad Həsənov: “Bu imkan verəcək ki, Azərbaycanla yanaşı, bütün region ölkələri bundan yararlanıb öz iqtisadiyyatlarını inkişaf etdirsinlər”
“Azərbaycan özünün coğrafi mövqeyindən istifadə edərək Avrasiyada böyük nəqliyyat mərkəzlərindən birinə çevrilmək niyyətindədir”. Bu sözləri Azərbaycan Prezidenti İlham Əliyev BMT Baş Assambleyasının 72-ci sessiyasında çıxışı zamanı deyib.
Onun fikrincə, Azərbaycan qlobal enerji bazarında vacib rol oynayır. Dövlət başçısı qeyd edib ki, bu gün Azərbaycan öz beynəlxalq tərəfdaşları ilə birgə “Cənub Qaz Dəhlizi” layihəsinin yekunlaşmasına çox yaxındır: "40 milyard dollardan artıq investisiyaya malik “Cənub Qaz Dəhlizi” dünyanın ən böyük infrastruktur layihələrindən biridir. Bizim üçün digər prioritetlərdən biri də nəqliyyatdır. Avropa ilə Asiyanın arasında yerləşən Azərbaycan özünün coğrafi mövqeyindən istifadə edərək Avrasiyada böyük nəqliyyat mərkəzlərindən birinə çevrilmək niyyətindədir. Azərbaycan “Şimal-Cənub”, “Şərq-Qərb” nəqliyyat dəhlizlərinə maliyyə ayırır. Ölkəmizdən keçən bu dəhlizlər hər iki istiqamətdə ən qısa yol olacaq”.
Prezidentin çıxışından o da məlum olub ki, inkişaf müstəqil olmaqdan keçir. Ölkənin uğurlu inkişafı bir daha göstərir ki, yalnız azad və müstəqil olanda, ölkənin taleyi xalqın əlinə veriləndə uğur əldə etmək mümkündür. Azərbaycan azad siyasət yürüdür və bu siyasət xalqın marağına uyğundur.
Son illər Azərbaycanda həyata keçirilən kompleks islahatlar bütün sahələrdə ölkənin önəmini artırır. Azərbaycanın əlverişli mövqeyi burada bir sıra nəqliyyat layihələrinin həyata keçirilməsinə imkan verir. “Şərq-Qərb”, “Şimal-Cənub” nəqliyyat dəhlizləri buna əyani sübutdur. Bu baxımdan Azərbaycanın potensialı böyükdür.
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Rəşad Həsənov bir sıra arqumentlərə əsaslanaraq vacib məqamlara toxundu: “Azərbaycanın strateji inkişafla bağlı ortaya qoyduğu əsas mövqelərdən biri də ölkəni Asiya ilə Avropa arasında böyük nəqliyyat qovşağına çevirmək idi. Ötən illər ərzində bu istiqamətdə müxtəlif layihələr həyata keçirilib. TRASEKA proqramı çərçivəsində görülən işlər nəticəsində Azərbaycan artıq qlobal İpək Yolunun əsas qovşaqlarından birinə çevrilir. Onu da nəzərə almaq lazımdır ki, artıq növbəti ay istifadəyə verilməsi nəzərdə tutulan Bakı-Tiflis-Qars dəmir yolu Asiya ilə Avropa arasında quru yolu ilə yüklərin daşınmasını təmin etmək üçün şərait yaradacaq. Sözügedən layihə yükdaşımada böyük uğur hesab edilə bilər. O baxımdan ki, artıq yükdaşımaların həm həcmi, həm tezliyi kifayət qədər irəli düşəcək. Ən başlıcası isə, məhsulun maya dəyəri aşağı düşəcək. Bu imkan verəcək ki, Azərbaycanla yanaşı, bütün region ölkələri bundan yararlanıb öz iqtisadiyyatlarını inkişaf etdirsinlər. Ümumiyyətlə, bu layihələr son nəticədə Azərbaycanın geostrateji mövqeyi ilə yanaşı, eyni zamanda, ölkənin gəlirlərinin artırılması məqsədi daşıyır. Layihələrin tam olaraq işə düşməsi ölkənin tranzit gəlirlərinə də ciddi şəkildə müsbət təsir göstərəcək. Bu, gələcəkdə ölkənin maliyyə gəlirlərinin artmasında mühüm rol oynayacaq. Bunun Azərbaycan üçün digər əhəmiyyətli tərəfi ondan ibarətdir ki, yerli sahibkarlar çox rahatlıqla öz məhsullarını dünya bazarına çıxaracaqlar. Həmçinin, Azərbaycanın istehsal etdiyi məhsulların da maya dəyərində azalma müşahidə ediləcək. Bu da yerli istehsalın rəqabətliliyinə müsbət təsir göstərəcək. Ona görə də Prezidentin bu fikri doğru yanaşma olaraq qiymətləndirilməlidir. Azərbaycanın coğrafi mövqeyi, qeyd edilən istiqamətlərdə fəaliyyətləri həyata keçirmək üçün şərait yaradır. Bu imkanlardan maksimum yararlanmaq lazımdır”.
Vidadi ORDAHALLI
