Azərbaycanla Aİ arasında aviasiya sazişi bu il imzalana bilər
Bu ayın sonu Büsseldə Azərbaycanla Avropa İttifaqı (Aİ) arasında sazişin əsas sektoral bloku müzakirə olunacaq. Trend-in məlumatına görə, bunu Azərbaycan xarici işlər nazirinin müavini Mahmud Məmməd-Quliyev deyib.
Onun sözlərinə görə, ticarət, investisiya siyasəti və təhlükəsizlikdən başqa digər məsələlər də müzakirə olunacaq: “Biz bir neçə məsələni müzakirə etməyə çalışacağıq. Həmçinin Brüsseldə yeni tərəfdaşlıq prioritetləri müzakirə olunacaq. Bu, yeni addımdır. Artiq biz birinci növbədə öz təkliflərimizi vermişik. Aİ də baxıb, öz təkliflərini verib. Biz bunun əsasında da təklif hazırlayıb təqdim etmişik. Sentyabrın 29-da müzakirələr aparılacaq”.
Nazir müavini bildirib ki, sentyabrın 27-də Brüsseldə Aİ ilə Azərbaycan arasında Ticarət üzrə alt komitənin iclası keçiriləcək: "Həmin görüşdə investisiya və ticarətə dair məsələlər müzakirə ediləcək".
O qeyd edib ki, oktyabrın 2-ci yarısında isə Təhlükəsizlik və İnsan hüquqları və demokratiya alt komitələrinin iclası keçiriləcək: "Sonuncu, Enerji alt komitəsinin toplantısı ilə bağlı hələlik tarix bəlli deyil. Çünki Şərq Tərəfdaşlığı sammitinə hazırlıq getməldir. Düşünmürəm ki, sammitdən əvvəl bu komitənin iclası olsun. Hazırda alt komitələrin iclasına Brüssel ev sahibliyi edir. Ona görə də biz onların təkliflərinə baxıb fikir bildiririk".
Nazir müavini hazırda Azərbaycan ilə Avropa İttifaqı arasında yeni saziş üzrə sənədin hansı mərhələdə olduğunu deməyin çox çətin olduğunu deyib. Nazir müavini bildirib ki, sənədin ilk növbədə keyfiyyəti çox vacibdir: "Biz tələsmirik. Hər iki tərəfin mövqeyi var. Onları uzlaşdırmaq lazımdır. Bu bir hüquqi sənəddir. Gec olsun, amma keyfiyyətli olsun. Sənəd çərçivəsində siyasi məsələlər də müzakirə olunur”.
Nazir müavini qeyd edib ki, sənəddə Azərbaycanın müstəqilliyi, suverenliyi, ərazi bütövlüyü, sərhədlərin toxunulmazlığı öz əksini tapıb: “Bu ilin sonuna kimi bu saziş imzalana bilməyəcək. Bu yalnız o halda baş verə bilər ki, biz onların dediyi hər şeyi qəbul edək. Amma bu, düzgün olmaz”.
O, noyabrda Brüsseldə keçiriləcək Şərq Tərəfdaşlığı sammitinə hazırlıqdan da danışıb: "Sammitdə 2 ildə hansı işlərin görüldüyü müzakirə ediləcək. Bizim də deməyə sözümüz olacaq. Çünki bir neçə ildə yaxşı nailiyyətlər əldə etmişik. İlk növbədə çalışacağıq ki, bu sammit çərçivəsində Riqa Sammiti təkrar olunmasın. Həmin sammitdə 3 münaqişə ilə bağlı bir, Ermənistan-Azərbaycan, Dağlıq Qarabağ münaqişəsinə dair başqa mövqe var idi. Aİ-nin hazırda yeni qlobal strategiyası var. Orada aydın göstərilir ki, bütün tərərfdaş ölkələrin ərazi bütövlüyü, təhlükəsizliyi dəstəklənməlidir. Bununla yanaşı, enerji və nəqliyyat sahəsində irəliləyişlər var".
M.Məmmədquliyev bildirib ki, sammit çərçivəsində aviasiya sazişinin da imzalanması mümkündür: "Ola bilsin ki, müvafiq qurumumuz olan Azərbaycan Dövlət Mülki Aviasiya Administrasiyası Aİ ilə sazişi bitirə bilsin. Amma vaxt azdır. Bu istiqamətdə oktyabrın axırı görüş olmalıdır. Ondan sonra biləcəyik ki, bu sənədi sammitdə imzalaya biləcəyik, ya yox".
“Azərbaycanın ÜTT-yə daxil olması istiqamətində danışıqlarda elə bir ciddi irəliləyiş yoxdur”. Bunu Azərbaycan xarici işlər nazirinin müavini Mahmud Məmməd-Quliyev deyib.
Nazir müavini qeyd edib ki, iyulun axırında Cenevrədə keçirilən görüşlərdə çox ciddi müzakirələr oldu: "Qarşı tərəf narahatdır ki, Azərbaycan 20 ildir danışıqlar aparır, amma nəticələr yüksək deyil. Biz görüşdə razılaşdıq ki, nə zaman hazır olsaq və ya onların hansısa təkliflərini qəbul etsək, onda yeni bir görüş keçirə bilərik".
