Rəşad Həsənov: “Bu minvalla, neftin qiymətini daha optimal müəyyənləşdirməklə dövlət büdcəsində problemlərin yaranmasının qarşısını almaq mümkün olacaq”
Xəbər verildiyi kimi, gələn ilin dövlət büdcəsi haqqında qanun layihəsi hökumətə təqdim edilib. Bu barədə Maliyyə Nazirliyindən daxil olan məlumata görə, "Büdcə sistemi haqqında" Qanuna və "Azərbaycan Respublikasının 2018-ci il dövlət büdcəsi layihəsinin hazırlanması ilə bağlı" Nazirlər Kabinetinin 2017-cı il 25 yanvar tarixli Sərəncamına uyğun olaraq, 2018-ci il dövlət büdcəsinin və icmal büdcənin layihələri, habelə növbəti üç il üçün icmal büdcənin göstəriciləri 2017-cı il 15 sentyabr tarixində Nazirlər Kabinetinə təqdim olunub.
Bu arada maliyyə naziri Samir Şərifov mətbuata açıqlamasında bildirib ki, gələnilki büdcədə sosial sahəyə diqqət yetiriləcək: "2018-ci ilin dövlət büdcəsində, həmişəki kimi, sosial sahəyə diqqət yetiriləcək. Həmçinin Azərbaycanın müdafiə potensialının gücləndirilməsi, dövlət borcuna xidmət və s. məqamlar da nəzərə alınacaq. Büdcə layihələri Nazirlər Kabinetinə təqdim olunub. Müzakirələrin nəticəsi olaraq həmin layihə Prezidentə təqdim olunmalıdır. Parametrlər daha sonra açıqlanacaq".
Gələn ilin büdcəsində neftin bir barrelinin neçə dollardan götürülməsi hələlik məlum deyil. Məlumat üçün qeyd edək ki, 2017-ci ilin büdcəsində neftin bir barreli 40 dollardan götürülüb. Ancaq bu il ərzində neftin qiyməti 50 dollar ətrafında dəyişib. Bu kontekstdən yanaşsaq, növbəti ilin dövlət büdcəsində neftin 45 dollardan götürülməsi optimal sayıla bilərmi? Ekspertlərin buna münasibəti necədir?
Məsələyə münasibət bildirən iqtisadçı-ekspert Rəşad Həsənovun fikrincə, neftin bir barrelinin 45 dollardan götürülməsi daha optimal variantdır: “Maliyyə institutları 2015-2016-cı illəri neftin qiyməti üçün risqli illər hesab edirdilər. Ancaq əksər maliyyə institutları 2018-ci ildə neftin qiymətində müəyyən artımlar proqnozlaşdırırlar. Buna dəstək verən faktorlardan biri də bu günlərdə Səudiyyə Ərəbistanı ilə Rusiya arasında neft hasilatının tənzimlənməsi ilə bağlı sazişin uzadılması hesab olunur. Bu isə onu deməyə əsas verir ki, OPEC və bu təşkilata daxil olmayan müəyyən bazar iştirakçıları növbəti dövrlərdə bazarda təklifin həcmini tənzimləmək məsələsində qərarlıdırlar. Belə bir şəraitdə 2018-ci ildə neftin qiymətinin təxminən 50 dollar ətrafında olacağı proqnozlaşdırılandır. Düşünürəm ki, dövlət büdcəsinin layihəsi hazırlanarkən aidiyyəti qurumlar bu nüansları nəzərə alacaq. Böyük ehtimalla 2018-ci ilin dövlət büdcəsində neftin bir barreli üçün qiymət 45-50 dollar arasında müəyyən ediləcək. Bu isə büdcə üçün doğru yanaşma olacaq. Bu minvalla, neftin qiymətini daha optimal müəyyənləşdirməklə dövlət büdcəsində problemlərin yaranmasının qarşısını almaq mümkün olacaq”.
Vidadi ORDAHALLI
