Fikrət Yusifov: “Azərbaycanın coğrafi mövqeyi imkan verir ki, ölkənin aqrar sektoru daha da inkişaf etsin”
"Azərbaycan coğrafi mövqeyi sayəsində bir çox sahələri inkişaf etdirə bilər". Bunu jurnalistlərə Beynəlxalq Valyuta Fondunun (IMF) Orta Şərq və Mərkəzi Asiya Departamentinin direktoru Cihad Azur deyib. O qeyd edib ki, 2014-2015-ci illərdə baş verən qlobal iqtisadi sarsıntılar bir çox ölkələrə təsir edib. C.Azur hesab edir ki, yaranmış vəziyyətdən çıxmaq üçün əlavə xərclərə yol verilməməli, tədiyyə balansının kəsirlə bitməməsinə çalışılmalıdır: "Bu vaxta qədər çox yaxşı addımlar atılıb, bundan sonra da bu addımları davam etdirmək lazımdır".
Eyni zamanda IMF rəsmisi Azərbaycanın Ümumdünya Ticarət Təşkilatına üzvlüyü prosesinin sürətləndirilməsini vacib sayır. Onun fikrincə, ölkədəki iqtisadi artım prosesini isə əhalinin bütün təbəqələri hiss etməlidir: “Çünki aşağı təbəqələr artıma mənfi təsir edir”.
Bununla yanaşı, C.Azur bildirib ki, hazırda dünya bazarında neft qiymətləri 50-55 dollar/barrel dəhlizində dəyişir: “Düşünürük ki, növbəti iki ildə də qiymətlər bu civarda qalacaq”.
Maraqlıdır, Azərbaycan coğrafi mövqeyinə görə hansı sahələrdə inkişaf əldə edə bilər?
İqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, Azərbaycanın coğrafi iqlimi imkan verir ki, istənilən sahədə inkişaf yaşansın: “Nəzərə almaq lazımdır ki, 11 iqlim qurşağından 9-u Azərbaycan ərazisindən keçir. Bu, təbiətin Azərbaycana bəxş etdiyi ən böyük nemətdir”.
İqtisadçının sözlərinə görə, Azərbaycanın coğrafi mövqeyi imkan verir ki, ölkənin aqrar sektoru daha da inkişaf etsin. Aqrar sektorun inkişafı ilə bağlı son iki il ərzində hökumət tərəfindən müəyyən işlər görülür: “Görülən tədbirlər nəticəsində məhsulların istehsalı artıb”.
Həmsöhbətimiz onu da vurğuladı ki, Azərbaycan şərqlə qərb, şimalla cənub arasında böyük bir qapı rolunu oynayır. Tranzit yükdaşımaların nizamlanması ilə bağlı Azərbaycan hökumətinin bir sıra qərarları olub: “Prezident İlham Əliyevin sərəncamı ilə tranzit yükdaşımaları ilə bağlı xüsusi bir struktur yaradılıb. Hazırda layihələrin icrası başa çatmaq üzrədir. Bakı-Tiflis-Qars dəmir yolunun açılışı gözlənir. Bu dəmir yolu vasitəsilə Azərbaycan üzərindən böyük həcmdə yüklərin daşınması realdır. Şimal-cənub ticarət dəhlizində böyük işlər qeydə alınacaq. Bu yükdaşımalar isə Azərbaycana kifayət qədər valyuta daxil olmasına imkan verəcək”.
F.Yusifov onu da bildirdi ki, Azərbaycanın coğrafi mövqeyi imkan verir ki, turizm sahəsi daha da inkişaf etsin. Turizmin inkişafı üçün ölkədə geniş imkanlar var. Bu sahədə görülən işlər artıq öz bəhrəsini vermək üzrədir. Azərbaycanda turizm sektorunun inkişafı hazırda göz qabağındadır.
Günel CƏLİLOVA
