Rəşad Həsənov: “Manatın məzənnə sabitliyinin olmasına baxmayaraq, ictimai inamın olmadığı müşahidə olunur, bu isə bank sektorunda...”
"Azərbaycan əhalisində manata inam yaranmalıdır. Azərbaycanda dedollarizasiya səviyyəsinin aşağı düşməsi yalnız manata etibarın bərpasından sonra mümkün olacaq". Bunu Beynəlxalq Valyuta Fondunun (BVF) Orta Şərq və Mərkəzi Asiya Departamentinin direktoru Cihad Azur Bakıda keçirdiyi mətbuat konfransında bildirib.
O qeyd edib ki, yalnız manata etibar təmin olunduğu təqdirdə, dollarlaşmanın səviyyəsi aşağı düşəcək: “Dollarlaşmanın səviyyəsini aşağı salmaq üçün isə bir neçə tədbir görmək lazımdır. İlk növbədə güclü və möhkəm makroiqtisadi çərçivə, büdcə kəsiri aşağı, Mərkəzi Bankın valyuta ehtiyatları yüksək olmalıdır. Əhalidə inam yaranmalıdır ki, onlar öz əmanətlərini yerli valyutada yerləşdirdikdə əldə etdikləri gəlir əmanətlərini xarici valyutada yerləşdirənlərlə müqayisədə az olmayacaq. Məndə olan məlumata görə, ölkədə əmanətlərə tam zəmanət də verilir. Bu baxımdan dollarlaşmanın səviyyəsini aşağı salmaq yalnız iqtisadiyyatı yox, eləcə də bank sistemini möhkəmləndirəcək. Buna görə bank sistemində restrukturizasiya davam etdirilməli, yeni hüquqi aktlar qəbul edilməlidir ki, bankların stabilliyi təmin edilsin".
Mövzu ilə bağlı fikir bildirən iqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, Azərbaycan manatına inamı bərpa etmək üçün hökumət tərəfindən müvafiq addımlar atılmalıdır: “İlk növbədə manatın məzənnəsində sabitlik təmin olunmalıdır. Demək olar ki, son 7 ay ərzində bu prosesi hiss edirik. Eyni zamanda, xarici və daxili klubtasiyalara qarşı manatın məzənnəsində ciddi risqlərin olmaması təəssüratı yaranmalıdır. Bunun üçün görüləcək ilk iş ölkənin yerli istehsalını, o cümlədən ixracını neft asılılığından aradan qaldırmaqdır. Bu asılılıq aradan qalxmadığı təqdirdə, neftin qiyməti birbaşa olaraq manatın məzənnəsinə təsir göstərir . Hesab edirəm ki, hökumət bu sahədə yaşanan problemlərdən xəbərdardır və növbəti dövrlərdə müvafiq addımların atılmasını davam etdirəcək”.
Həmsöhbətimizin sözlərinə görə, Mərkəzi Bank növbəti dövrlərdə bazarlarda iştirak etməklə və daha optimal məzənnə siyasəti yolu ilə öz valyuta ehtiyatlarını artırmalıdır. Valyuta ehtiyatlarının çox olması valyuta bazarları iştirakçılarına və vətəndaşlara risqlərə qarşı sığortanın yüksək səviyyəli mesajının verilməsi deməkdir: “Bu da manata inamı bərpa edən amillərdən biridir”.
İqtisadçının sözlərinə görə, manatın məzənnəsində qeydə alınan hazırkı sabitlik yetərincə deyil. Nəzərə almaq lazımdır ki, ümumi sabitliyin təmin olunmasında hər zaman risqlər var: “Və risqlərə qarşı görülən tədbirlər yetərincə deyil. Bu səbəbdən də manatın məzənnə sabitliyinin olmasına baxmayaraq, ictimai inamın olmadığını müşahidə edirik. Bu isə bank sektorunda və hökumətin iqtisadi siyasətində mühum problemlərdən biri olmaqda davam edir. Hazırda ölkədə dollarlaşma səviyyəsi maksimum həddədir”.
Günel CƏLİLOVA
