Ruslan Atakişiyev: “Çünki bu, ölkədə iqtisadiyyatın inkişafına təkan verir”
“Azərbaycanda ixrac həyata keçirən kiçik və orta sahibkarlıq subyektlərinin sayı 1333-ə çatıb". Bunu Stateji Yol Xəritələrinin ilk 6 ay ərzində icrasının monitorinqi ilə bağlı keçirilən tədbirdə çıxış edən İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı deyib.
Onun sözlərinə görə, Azərbaycanın ixrac coğrafiyasında ən böyük paya malik ölkələr Rusiya, Türkiyə, Türkmənistan,Gürcüstan və İsveçrə olub. Bununla belə, Avropa İttifaqı, Körfəz ölkələri və Cənub-Şərqi Asiya ölkələri üzrə də böyük ixrac potensialı var.
Ümumilikdə, kiçik və orta sahibkarlıq işgüzar fəaliyyət növü olaraq, hazırda dünyada çox geniş yayılıb və getdikcə inkişaf etməkdədir. Bu fəaliyyət növünün geniş yayılması onun bir sıra üstün cəhətləri ilə əlaqədardır. Belə ki, kiçik və orta sahibkarlığın iqtisadiyyatda ən mühüm rollarından biri məhz rəqabət mühitini yaratmaq və onu gücləndirməkdən ibarətdir. Bu müəssisələr iqtisadiyyatda məşğulluğun artırılması və ya yeni iş yerlərinin açılmasına imkan yaradır. Bundan başqa, KOS-lar əhalinin tələbatına daha həssas olduğu üçün bazar konyukturunun dəyişikliklərinə daha çevik və cəld şəkildə reaksiya verə bilirlər. Kiçik və orta sahibkarlığın yüksək inkişafı, həmçinin, istehsal vasitələrinin daha çox subyekt arasında bölüşdürülməsinə nail olaraq, iqtisadi cəhətdən daha eqalitar cəmiyyət yaratmağa vasitəçi olur.
Kiçik və orta sahibkarlıq bir çox inkişaf etmiş və inkişaf etməkdə olan ölkələrdə iqtisadiyyatın aparıcı qüvvələrindən biridir.
Azərbaycanda ixrac həyata keçirən kiçik və orta sahibkarların sayının artması ölkədə bu sahənin inkişaf etməsindən xəbər verir. Maraqlıdır, bəs ekspertlər bunu necə dəyərləndirir? Məsəəyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, ixracla məşğul olan sahibkarların sayı nə qədər çox olsa, bu bir o qədər yaxşıdır: “Çünki bu, ölkədə iqtisadiyyatın inkişafına təkan verir. Həmçinin, ölkəyə valyuta axınını təmin edir. Azərbaycanda hüquqi şəxslərin sayı hardasa 83 mindən çoxdur. Həmçinin, 610 min nəfər də fiziki şəxs olaraq fəaliyyət göstərir. Ümumilikdə 700 minə qədər sahibkarlıq subyekti fəaliyyət göstərir. Bunlarla müqayisədə ixrac həyata keçirən kiçik və orta sahibkarlıq subyektlərinin sayının 1333 olması yetərli deyil. Ona görə də ixracla məşğul olan sahibkarlıq subyektləri nə qədər çox olsa, bu bir o qədər ölkə iqtisadiyyatının xeyrinədir. O baxımdan hesab edirəm ki, ixracyönümlü iqtisadiyyatın inkişafına xüsusi önəm verilməlidir. Bu da qeyri-neft sektorunun inkişafından keçir. Ölkədə çoxşaxəli qeyri-neft sektorunun inkişafına nail ola bilsək, o zaman ixracla məşğul olan sahibkarlıq subyektlərinin sayı daha çox olacaq”.
Vidadi ORDAHALLI
