Vüqar Bayramov: “Bu həm də ölkə iqtisadiyyatının diversifikasiyası baxımından kifayət qədər vacib hesab edilir”
Qeyri-neft sektorunun inkişafı nəticəsində Azərbaycan iqtisadiyyatı getdikcə daha çox şaxələnir. Yeni sahələrin yaranmasında müsbət tendensiya müşahidə edilir. Böyük sənaye müəssisələri yaradılır. Onların istehsal etdiyi xammalın səmərəli şəkildə istifadə edilməsi üçün dövlət eyni zamanda emal müəssisələrinin yaradılmasını stimullaşdırır.
Ölkədə istehsal olunan hazır məhsulların siyahısının genişləndirilməsi isə idxaldan asılılığın azalması, ixrac imkanlarının artması deməkdir. Ölkə iqtisadiyyatının, xüsusən də qeyri-neft sektorunun inkişafı istiqamətində atılan addımlar artıq öz səmərəli nəticələrini verir. Bu gün məhz qeyri-neft sektorunun ümumi iqtisadi inkişafda xüsusi çəkisi sürətlə artır. Eyni zamanda ixrac məhsulları sırasında yenə qeyri-neft məhsullarının payı sürətlə çoxalır. Belə vəziyyət ölkənin xarici ticarət dövriyyəsinə də müsbət istiqamətdə öz təsirlərini göstərir.
Yeri gəlmişkən qeyd edək ki, cari ilin yanvar-avqust aylarında Azərbaycanın hüquqi və fiziki şəxsləri dünyanın 180 ölkəsindəki tərəfdaşları ilə ticarət əməliyyatları həyata keçirib. 2017-ci ilin yanvar-avqust aylarında xarici ticarət dövriyyəsi 12 milyard 523.79 milyon dollar, ixracın dəyəri 7 milyard 223 milyon dollar, idxalın dəyəri isə 5 milyard 300 milyon dollar təşkil edib. Beləliklə, cari ilin yanvar-avqust ayları ərzində xarici ticarət dövriyyəsində 1 milyard 922 milyon dollar həcmində müsbət saldo yaranıb ki, bu da ötən ilin eyni dövrü ilə müqayisədə 7,7 dəfə çoxdur. Artımda qeyri-neft sektoru da öz sözünü deyib. Belə ki, qeyri-neft sektoru üzrə ixracın həcmi bu ilin 8 ayında 20 % artaraq 855 milyon manat olub.
Görünən odur ki, ölkədə qeyri-neft sektoru inkişaf etdiyi üçün bu sahədə ixracın həcmi artır. Maraqlıdır, bəs ekspertlər buna necə yanaşır? Məsələyə münasibət bildirən iqtisadçı-ekspert Vüqar Bayramov buna bir neçə prizmadan yanaşdı: “Həm qeyri-neft sektorunun inkişafı, həm də balanslı iqtisadi inkişafın bərqərar edilməsi bu günün iqtisadi siyasətinin əsas prioritetlərindəndir. Nəticə etibarilə qeyri-neft sektorunda əldə olunan uğurlar ixracata söykənən iqtisadi inkişafı dayanıqlı edir. 2017-ci il Azərbaycan hökuməti tərəfindən sabitlik ili kimi xarakterizə olunur. Növbəti illərdə artıq iqtisadi artımın bərpa edilməsi və dayanıqlı inkişafın qeydə alınacağı hətta beynəlxalq qurumlar tərəfindən də proqnozlaşdırılır. Nəticədə yalnız Azərbaycan hökumətinin və İqtisadiyyat Nazirliyinin deyil, eyni zamanda, beynəlxalq maliyyə institutlarının da proqnozlarında artıq qeyri-neft sektorunun inkişafı hesabına 2018-ci ildən başlayaraq iqtisadi artımın bərpa ediləcəyi qeyd edilir. Bu da artımın birbaşa qeyri-neft sektoru hesabına formalaşmasından xəbər verir. Bu gün iqtisadiyyatdakı sabitlik birbaşa qeyri-neft sektorunun inkişafı hesabına baş verir. Nəticədə, təbii ki, qeyri-neft sektorunun inkişaf etməsi Azərbaycan üçün daha dayanıqlı və balanslı inkişafın yaranmasına gətirib çıxarır. Qeyri-neft sektorunun inkişafı həm də regionların inkişafı baxımından vacibdir. Təbii ki, bu həm də ölkə iqtisadiyyatının diversifikasiyası baxımından kifayət qədər vacib hesab edilir”.
Vidadi ORDAHALLI
